ނޯވޭ މެޗުގެ ކުރިން ތިން ދުވަސް ވަންދެން ރައިސް އޮތީ އެނދުމަތީގައި!

ފީފާ ވޯލްޑް ކަޕްގެ ކުއާޓާ ފައިނަލްގައި ނޯވޭއާ ދެކޮޅަށް ކުޅުނު މެޗުގެ ކުރިން، އިންގްލެންޑުގެ މިޑްފީލްޑަރު ޑެކްލަން ރައިސް ބަލިވެ އުޅުމުގެ ސަބަބުން ގާތް ގަނޑަކަށް ތިން ދުވަސް ވަންދެން އެނދުމަތިވެފައި އޮންނަން ޖެހުނު ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ. 

އާދީއްތަ ދުވަހުގެ ރޭ ދަންވަރު މިއާމީ ސްޓޭޑިއަމްގައި ކުޅުނު މެޗު އިންގްލެންޑް އިން ކާމިޔާބު ކުރީ 2-1 އިންނެވެ. އެ މެޗުން އިންގްލެންޑު މޮޅުވެފައި ވަނީ، ނޯވޭ އިން ލަނޑު ޖަހައި ކުރި ހޯދާފައި ވަނިކޮށް ފަހަތުން އަރައި ދެ ލަނޑު ޖަހައިގެންނެވެ. 

މެޗުގެ ފުރަތަމަ 11 ގައި ހިމެނިގެން ރައިސް ކުޅުނު ނަމަވެސް، މިއާމީގެ ގަދަ ހޫނުގެ ސަބަބުން އޭނާ އަށް ދަނޑު މަތީގައި ވަރަށް ބޮޑަށް އުނދަގޫތަކާ ކުރިމަތިވި އެވެ. އެހެންކަމުން ދެ ވަނަ ހާފު ފެށުމާ އެކު، ޓުޗެލް ވަނީ ރައިސްގެ ބަދަލުގައި އާސެނަލްގައި އޭނާ އާއެކު ކުޅޭ އެބްރެޗީ އެޒީ ކުޅެން އަރުވައިފަ އެވެ. 

ނޯވޭ މެޗަށް ފަހު ވާހަކަ ދައްކަމުން ޓުޗެލް ބުނެފައި ވަނީ، ގަދަ ހޫނުގެ ސަބަބުން ބައެއް ކުޅުންތެރިންނަށް އުނދަގޫ ތަކެއް ދިމާާވި ކަމަށެވެ. އޭގެ ތެރޭގެ ފައިގެ މަސްގަނޑަށް ދިމާވި މައްސަލަތަކާ އެކު، އެޒްރީ ކޮންސާ ހިމެނޭ ކަމަށް އޭނާ ފާހަގަ ކުރި އެވެ. މެޗުގައި ރައިސް ބަދަލު ކުރަން ނިންމި ސަބަބާ ގުޅޭ ގޮތުން ނޫސްވެރިން ވަނީ ޓުޗެލްއާ ސުވާލު ކޮށްފައި އެވެ.

އެ ސުވާލަށް ޖަވާބު ދެމުން ޓުޗެލް ބުނެފައި ވަނީ ފުރަތަމަ ހާފު ނިމުނުއިރު، އެއް ލަނޑުން އިންގްލެންޑު ފަހަތުގައި އޮތުމާ އެކު، އެޓޭކް ކުރުމަށް ހާފް ޓައިމްގައި ނިންމީ ކަމަށެވެ. އޭގެ ފަހުން އިންގްލެންޑުގެ ޖޫޑް ބެލިންހަމް ލަނޑު ޖަހައި ނަތީޖާ ހަމަހަމަ ކުރި ނަމަވެސް، ކުރިން ނިންމި ނިންމުން ބަދަލު ކުރަން ބޭނުން ނުވީ ކަމަށް ވެސް ޓުޗެލް ވަނީ ބުނެފައި އެވެ. 

މީގެ އިތުރުން ޓުޗެލް ބުނެފައި ވަނީ ރައިސް ބަލިވުމުގެ ކުރިން ވެސް، އެ މެޗުގައި އޭނާ އަށް ކުޅެވޭނެ ކަމާ މެދު ޝައްކު އޮތް ކަމަށެވެ. އެއީ ރައިސްގެ ބުރަކަށީގެ ތިރި އަށާއި، ފައިގެ މަސްގަނޑަށް ދިމާވެފައިވާ ނާރުގެ މައްސަލައެއްގެ ސަބަބުން ކަމަށް ޓުޗެލް ބުންޏެވެ. އެކަން އެހެން ހުއްޓާ ރައިސް ބަލިވުމުން، އެ މައްސަލަ އިތުރަށް ބޮޑުވި ކަމަށް ޓުޗެލް ވަނީ ބުނެފައި އެވެ. ނޯވޭ މެޗުގެ ކުރިން އޮތް ފަރިތަކުރުން ތަކުަގއި ރައިސް ބައިވެރިވި ނަމަވެސް، އޭގެ ކުރިން ދިޔަ ތިން ދުވަހު އޭނާ އޮންނަން ޖެހުނީ އެނދު މަތިވެފައި ކަމަށް ޓުޗެލް ހާމަކުރި އެވެ. 

އެެހެން ދިމާވުމުން، މެޗުގެ 90 މިނެޓީ ހަމަ ކުރެވޭނެ ފެންވަރު ރައިސްގެ ގައިގައި ނެތްކަން ކުރިން ވެސް އިނގޭ ކަމަށް ޓުޗެލް ބުންޏެވެ. މެޗު 120 މިނެޓަށް ދިގުލައިގެން ދިޔުމުގެ ފުރުސަތު އޮތުމުން، ފަހުން ބަދަލެއް ބޭނުން ވެދާނެތީ ރައިސް ބަދަލު ކުރީ ކަމަށް ވެސް ޓުޗެލް ވަނީ ބުނެފައި އެވެ. 

އާސެނަލް އާއެކު ނިމުނު ސީޒަންގެ އިނގިރޭސި ޕްރިމިއާ ލީގު ކާމިޔާބު ކޮށްފައިވާ ރައިސް އަކީ، މިފަހަރުގެ ވޯލްޑް ކަޕްގައި އިންގްލެންޑުގައި ހިމެނޭ އެންމެ މުހިންމު އެއް ކުޅުންތެރިޔާާ އެވެ. މުބާރާތުގައި މިހާތަނަށް އިންގްލެންޑުން ކުޅުނު ހަ މެޗުގެ ތެރެއިން، ފަސް މެޗުގައި އޭނާ ވަނީ ފުރަތަމަ 11 ގައި ހިމެނިގެން ކުޅެފައި އެވެ. އޭނާ އަށް ނުކުޅެވުނީ ގުރޫޕު ސްޓޭޖުގައި ޕެނަމާއާ ދެކޮޅަށް ކުޅުނު މެޗުގައި އެވެ.