އާޖެންޓީނާ މޮޅުވާން ބޭނުން ނުވާ ބަޔަކު އެބަ ތިބި، އެއީ ހިތްވަރެއް: ސްކަލޯނީ

ފީފާ ވޯލްޑް ކަޕްގެ ސެމީ ފައިނަލްގެ ޖާގަ އެންމެ ފަހުގެ ޗެމްޕިއަން އާޖެންޓީނާ އިން ހޯދާފައިވާއިރު، އެ ޓީމު މޮޅުވާން ބޭނުން ނުވާ ބަޔަކު އެބަ ތިބި ކަމަށް އާޖެންޓީނާގެ ކޯޗު ލިއޮނަލް ސްކަލޯނީ ބުނެފި އެވެ.

މިހާރު ކުރިއަށްދާ ވޯލްޑް ކަޕްގެ ސެމީ ފައިނަލްގެ ޖާގަ އާޖެންޓީނާ އިން ހޯދާފައިވާއިރު، ބުދަ ދުވަހުގެ ރޭ ކުޅޭ ސެމީ ފައިނަލްގައި އާޖެންޓީނާ އިން ނިކުންނާނީ އިންގްލެންޑްއާ ދެކޮޅަށެވެ. މުބާރާތުގެ ސެމީ ފައިނަލްގެ ޖާގަ ހޯދުމަށް އާޖެންޓީނާ އިން ކުރަން ޖެހުނީ އުނދަގޫ ދަތުރެކެވެ. އެގޮތުން ނޮކްއައުޓް ބުރުގައި ކުޅުނު ތިން މެޗުން ވެސް އާޖެންޓީނާ މޮޅުވެފައި ވަނީ ޕްރެޝަރުގައި އެވެ.

މުބާރާތުގެ ކުއާޓާ ފައިނަލްގައި ސްވިޒަލެންޑް ބަލި ކުރި މެޗަށް ފަހު ނޫސްވެރިންނާ ވާހަކަ ދައްކަމުން އާޖެންޓީނާގެ ކޯޗު ސްކަލޯނީ ބުނީ، އާޖެންޓީނާ މޮޅުވާން ބޭނުންވާ ނުވާ އެތައް ބައިވަރު މީހުން ތިބި ކަމަށެވެ. ސްކަލޯނީ ބުނީ އެންމެ ފަހުން އޮތް ވޯލްޑް ކަޕް އާޖެންޓީނާ އިން ކާމިޔާބު ކޮށްފައިވާއިރު، އެކަމާ ވެސް ހިތް ނުރުހޭ ބަޔަކު ތިބޭނެ ކަމަށެވެ.

ތިބޭނެ، އާޖެންޓީނާ މޮޅުވާން ބޭނުން ނުވާ އެތައް ބައިވަރު މީހުން ތިބޭނެ. އަހަރަމެންނަށް އެކަން އިނގޭ، އެއީ އައު ކަމެއް ނޫން. އަހަރަމެން އެކަން ދެކެނީ ވަރަށް ބޮޑު ހިތްވަރެއްގެ ގޮތުގައި، އަދި އެއީ ކުރިއަށް އޮތް ތަނުގައި ކަންކަން ރަނގަޅު ކުރަން ލިބޭ ފުރުސަތެއް ގޮތަށް ދެކެނީ. މީގެ ކުރިން ވެސް އާޖެންޓީނާ އަށް ނިސްބަތްކޮށް އެކަހަލަ ވާހަކަ ދެކެވުނު، އެކަމަކު އެއީ ހަގީގަތެއް ނޫން. 

ލިއޮނަލް ސްކަލޯނީ / އާޖެންޓީނާގެ ކޯޗު

އާޖެންޓީނާ އަށް އެކަން ވަރަށް ރަނގަޅަށް އިނގޭ ކަމަށާއި، އެ ޓީމުން އެކަން ދެކެނީ ހިތްވަރެއްގެ ގޮތުގައި ކަމަށް ސްކަލޯނީ ބުންޏެވެ. އޭނާ ބުނީ މުބާރާތުގައި ކުރިއަށްދާ ވަރަކަށް އާޖެންޓީނާ އަށް އޮންނަ ޕްރެޝަރު ބޮޑު ވަމުން އަންނާނެ ކަމަށާއި، ނަމަވެސް އެއީ ކަންކަން ރަނގަޅު ކުރަން ލިބޭ ވަރަށް ރަނގަޅު ހިތްވަރެއް ކަމަށެވެ. 

ސްކަލޯނީ މިހެން ބުނެފައި ވަނީ އާޖެންޓީނާއާ އެއްކޮޅަށް ރެފްރީން ބައެއް ނިންމުންތައް ނިންމާ ކަމަށް ބުނެ ދެކެވެމުން އަންނަ ވާހަކަތަކާ ގުޅިގެންނެވެ. ސްކަލޯނީ ބުނީ އާޖެންޓީނާ ކުރިއަށް ދަނީ އެއްވެސް ބައެއްގެ ރުހުން އަދި އެހީ ލިބިގެން ނޫން ކަމަށާއި، އެއީ ޓީމެއްގެ ގޮތުގައި ކުޅުންތެރިން ކުރާ މަސައްކަތުގެ ނަތީޖާ ކަމަށެވެ. މާޒީގައި ވެސް އާޖެންޓީނާ އަށް ނިސްބަތްކޮށް އެފަދަ ވާހަކަ ތަކެއް ދެކެވުނު ކަމަށާއި، އެކަމާ ފަރުވާލެއް ނެތް ކަމަށް ސްކަލޯނީ ބުންޏެވެ.

މުބާރާތުގެ ސެމީ ފައިނަލްގައި އާޖެންޓީނާ އިން އިންގްލެންޑްއާ ދެކޮޅަށް ނިކުންނާނީ، އެ މެޗުން މޮޅުވެ ފައިނަލްގެ ޖާގަ ހޯދުމަށެވެ. އާޖެންޓީނާގެ އެންމެ ބޮޑު އަމާޒަކީ މިއަހަރުގެ މުބާރާތުގެ ޗެމްޕިއަންކަން ހޯދައި، ވޯލްޑް ކަޕްގެ ތަށި ދިފާއު ކުރުމެވެ.