އިންގްލެންޑާއި އާޖެންޓީނާގެ ސެމީ ފައިނަލް: ތާރީޚު ބުރަ ވަނީ އިންގްލެންޑު ކޮޅަށް، އާޖެންޓީނާގެ ހިތްވަރަކީ މެސީ!

މިހާރު ކުރިއަށްދާ ފީފާ ވޯލްޑް ކަޕްގެ ސެމީ ފައިނަލްގައި އިންގްލެންޑް އާއި އާޖެންޓީނާ އިން ވަރުގަދަ ސެމީ ފައިނަލް އަށް ނިކުންނައިރު، މި ދެ ޓީމު މީގެ ކުރިން ވެސް ވަނީ މުބާރާތުގައި އެކި ފަހަރު މަތިން ބައްދަލު ކޮށްފައި އެވެ.

އެންމެ ފަހުން 2022 ވަނަ އަހަރު ޤަތަރުގައި އޮތް ވޯލްޑް ކަޕް އާޖެންޓީނާ އިން ކާމިޔާބު ކުރިއިރު، އެއީ 36 އަހަރަށް ފަހު އާޖެންޓީނާ އަށް ވޯލްޑް ކަޕް ކާމިޔާބު ކުރެވުނު ފުރަތަމަ ފަހަރެވެ. ތަށި ދިފާއު ކުރަން މަސައްކަތް ކުރަމުން އަންނަ އާޖެންޓީނާ އިން ސެމީ ފައިނަލްގައި އިންގްލެންޑްއާ ދެކޮޅަށް ނިކުންނައިރު، މި މެޗު އެތައް ގޮތަކުން ޚާއްސަ ވެގެން ދާނެ އެވެ. 

އެގޮތުން މިއީ އާޖެންޓީނާގެ ކެޕްޓަން ލިއޮނަލް މެސީގެ ކެރިއަރުގައި އިންގްލެންޑްއާ ދެކޮޅަށް ކުޅޭ ފުރަތަމަ މެޗަށް ވެގެން ދާނެ އެވެ. އަނެއްކޮޅުން މިއީ ތޯމަސް ޓުޗެލްގެ އިރުޝާދުގެ ދަށުން ކުޅެމުން އަންނަ އިންގްލެންޑް އިން، އެ ޓީމުގެ 60 އަހަރުވީ އިންތިޒާރަށް ނިމުމެއް ގެނައުމަށް ކުރާ މަސައްކަތުގެ ތެރެއިން މުހިންމު މެޗަކަށް ވާނެ އެވެ. 

އިންގްލެންޑް އާއި އާޖެންޓީނާގެ ވާދަވެރިކަމަކީ ހަމައެކަނި ފުޓުބޯޅައިގައި އޮތް ވާދަވެރި ކަމެއް ނޫނެވެ. 1980 ގެ އަހަރު ތަކުގައި ހިނގި ފޯކްލޭންޑް ހަނގުރާމައާ ގުޅިގެން އުފެދުނު ސިޔާސީ ނުތަނަވަސްކަން މިއަދާ ހަމައަށް ވެސް މި ވާދަވެރި ކަމުގެ ތެރެއިން ފެނިފައިވެ އެވެ. 

ވޯލްޑް ކަޕްގެ ތާރީޚުގައި އިންގްލެންޑް އާއި އާޖެންޓީނާ އިން ފަސް ފަހަރެއްގެ މަތިން ބައްދަލު ކޮށްފައިވާއިރު، ހިސާބު ތަކުން އަދި ތާރީޚުން ކުރި ލިބެނީ އިންގްލެންޑަށެވެ. އެންމެ ފުރަތަމަ 1962 ވަނަ އަހަރުގެ ވޯލްޑް ކަޕްގައި މި ދެ ޓީމު ބައްދަލު ކުރިއިރު، އިންގްލެންޑް އިން ވަނީ 3-1 އިން އެ މެޗު ކާމިޔާބު ކޮށްފައި އެވެ. 

ނަމަވެސް މި ވާދަވެރިކަން ހަގީގީ މާނައިގައި އުފެދުނީ 1966 ވަނަ އަހަރުގެ ކުއާޓާ ފައިނަލްގައި އެވެ. އެ މެޗުގައި އާޖެންޓީނާގެ ކެޕްޓަން އެންޓޯނިއޯ ރަޓިން އަށް ރަތް ކާޑު ދެއްކުމުން އޭނާ ދަނޑުން ފޭބުމަށް އިންކާރު ކުރުމުން، އަށް މިނެޓަށް މެޗު މެދު ކަނޑާލަން ޖެހުނެވެ. އިންގްލެންޑް އިން 1-0 އިން އެ މެޗު ކާމިޔާބު ކުރިއިރު، އިންގްލެންޑުގެ އޭރުގެ ކޯޗު އަލްފް ރަމްސީ ވަނީ އާޖެންޓީނާގެ ކުޅުންތެރިންނަކީ "ޖަނަވާރުންގެ"ގޮތުގައި ސިފަ ކޮށްފައި އެވެ. މި މެޗަކީ ފުޓުބޯޅަ އަށް ރަތް ކާޑާއި ރީނދޫ ކާޑު ތައާރަފު ވުމަށް މެދުވެރިވި ސަބަބު ކަމަށް ވެސް ބެލެވެ އެވެ. 

މި ވާދަވެރި ކަމުގެ އެންމެ މަޝްހޫރު ހާދިސާ ފެނިގެން ގޮސްފައި ވަނީ 1986 ވަނަ އަހަރުގެ ކުއާޓާ ފައިނަލްގައި އެވެ. ފޯކްލޭންޑް ހަނގުރާާމަ އަށް ފަހު ކުޅުނު މި މެޗުގައި އާޖެންޓީނާގެ ލެޖެންޑު ޑިއޭގޯ މަރަޑޯނާ އަތުން ޖެހި ލަނޑަށް "ހޭންޑް އޮފް ގޯޑް"ގެ ނަމުން މަޝްހޫރުކަން ލިބިފައިވާއިރު، އޭނާ ވަނީ އެ މެޗުގައި ދުނިޔޭގެ ތަރީޚުގައި ވެސް ފެނުނު އެންމެ މޮޅު އެއް ލަނޑު ކާމިޔާބު ކޮށްފައި އވެެ. އެފަހަރު އާޖެންޓީނާ އިން ވަނީ 2-1 އިން އިންގްލެންޑު ބަލިކޮށްފައި އެވެ. އަދި އެ ފަހަރުގެ ފައިނަލްގައި ވެސްޓް ޖާމަނީ ބަލިކޮށް، އާޖެންޓީނާ އިން ވޯލްޑް ކަޕްގެ ތަށި އުފުލާލި އެވެ. 

އޭގެ ފަހުން 1998 ވަނަ އަހަރުގެ ވޯލްޑް ކަޕްގައި ޑޭވިޑް ބެކަމް އާޖެންޓީނާގެ ޑިއޭގޯ ސިމިއޯނީ އަށް ކުރި ފައުލަކާ ގުޅިގެން ރަތް ކާޑު ދެއްކި މެޗަކީ ވެސް ފާހަގަ ކޮށްލެވޭ މެޗެކެވެ. ގަދަ 16 ގައި ކުޅުނު އެ މެޗު އާޖެންޓީނާ އިން ވަނީ ޕެނަލްޓީ ޖަހައިގެން ކާމިޔާބު ކޮށްފައި އެވެ. 

އެންމެ ފަހުން ވޯލްޑް ކަޕްގައި މި ދެ ޓީމު ބައްދަލު ކޮށްފައި ވަނީ 2002 ވަނަ އަހަރު އެވެ. އެފަހަރު ދެ ޓީމު ލައްވާލީ އެއް ގުރޫޕެއްގައި އެވެ. އެ މެޗަކީ ބެކަމް އަށް ބަދަލު ހިފުމުގެ މެޗަކަށް ވެގެން ދިޔަ އެވެ. އާޖެންޓީނާގެ މައުރީސިއޯ ޕޮޗެޓީނޯ، އިންގްލެންޑުގެ މައިކަލް އޯވެން އަށް ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބުކޮށް، 1-0 އިން އިންގްލެންޑު މެޗުން މޮޅު ކޮށްދިނީ ބެކަމް އެވެ. އެ ނަތީޖާ އާއެކު އާޖެންޓީނާ ވަނީ މުބާރާތުން ކަޓައިފަ އެވެ.

އެއީ ވޯލްޑް ކަޕްގައި އާޖެންޓީނާ އާއި އިންގްލެންޑުގެ ވާދަވެރިކަން އެންމެ ފަހުން ފެނުނު މެޗެވެ. މިހާތަނަށް ވޯލްޑް ކަޕްގައި ފަސް ފަހަރު މި ދެ ޓީމު ބައްދަލު ކޮށްފައިވާއިރު، އޭގެ ތެރެއިން ތިން މެޗު ކާމިޔާބު ކޮށްފައި ވަނީ އިންގްލެންޑް އެވެ. ދެ މެޗު އާޖެންޓީނާ އިން ވަނީ ކާމިޔާބު ކޮށްފައި އެވެ. މިފަހަރުގެ ސެމީ ފައިނަލް އަކީ ވޯލްޑް ކަޕްގައި މި ދެ ޓީމު ބައްދަލު ކުރާނެ ހަ ވަނަ ފަހަރެވެ.