ގޮންޖެހުންތަކާ ކުރިމަތިލުމަކީ އާޖެންޓީނާގެ ލޭގައި ހުރި ކަމެއް: ސްކަލޯނީ

ފީފާ ވޯލްޑް ކަޕްގެ ކުއާޓާ ފައިނަލްގައި ސްވިޒަލެންޑު ބަލިކޮށް އާޖެންޓީނާ އިން މުބާރާތުގެ ސެމީ ފައިނަލްގެ ޖާގަ ހޯދިއިރު، ގޮންޖެހުންތަކާ ކުރިމަތިލުމަކީ އާޖެންޓީނާގެ ލޭގައި ހުރި ކަމެއް ކަމަށް އެ ޓީމުގެ ކޯޗު ލިއޮނަލް ސްކަލޯނީ ބުނެފި އެވެ. 

އާދީއްތަ ދުވަހުގެ ހެނދުނު ކުޅުނު މެޗަށް ފަހު ނޫސްވެރިންނާ ވާހަކަ ދައްކަމުން ސްކަލޯނީ ބުނީ، އުނދަގޫ ހާލަތްތަކާ ކުރިމަތިލާން ޖެހުމަކީ އާޖެންޓީނާގެ ލޭގައި ނުވަތަ ޑީއެންއޭގައި ހުރި ކަމެއް ކަމަށާއި، އެއީ ޓީމަށް ލިބޭ ހިތްހަމަ ޖެހުމެއް ކަަމަށެވެ. 

މުބާރާތުގެ ސެމީ ފައިނަލްއާ ހަމައަށް އާޖެންޓީނާ ގޮސްފައިވާއިރު، އެންމެ ފަހުން ކުޅުނު ތިން މެޗުގައި ވެސް އެ ޓީމު ވަނީ ޕްރެޝަރަށް ގޮސްފައި އެވެ. އެގޮތުން ގަދަ 32 ގައި ކޭޕް ވާޑްއާ ދެކޮޅަށް ކުޅުނު މެޗާއި، ގަދަ 16 ގައި މިޞްރާ ދެކޮޅަށް ކުޅުނު މެޗު އަދި ކުއާޓާ ފައިނަލްގައި ސްވިޒަލެންޑްއާ ދެކޮޅަށް ކުޅުނު މެޗުން އާޖެންޓީނާ އަށް ހޯދުނީ އުނދަގޫ މޮޅެކެވެ. 

ސްކަލޯނީ ބުނީ 2022 ވަނަ އަހަރު ޤަތަރުގައި އޮތް ވޯލްޑް ކަޕް އާޖެންޓީނާ އިން ކާމިޔާބު ކުރިއިރު، އެ ޓީމަށް ގިނަ ތަޖުރިބާ ތަކެއް ލިބިފައިވާ ކަމަށެވެ. އަދި އެކަމުގެ ސަބަބުން ޕްރެޝަރު ބޮޑު ވަގުތު ތަކުގައި ކުޅުންތެރިން ކެތްތެރިކަމާ އެކު ކުޅެ، ހިތްވަރު ދެއްކުމަށް ފަސޭހަވާ ކަމަށް އޭނާ ބުންޏެވެ. 

ގަތަރުގައި ކުރިއަށް ދިޔަ މުބާރާތުގައި ޕްރެޝަރާ ކުރިމަތިލުމަކީ އާޖެންޓީނާގެ ކުޅުންތެރިންނަށް އުނދަގޫ ކަމަކަށް ވީ ނަމަވެސް، މިހާރު އާޖެންޓީނާގެ ކުޅުންތެރިންނަކީ އިދިކޮޅު ޓީމު މެޗު ކޮންޓްރޯލް ކުރާ ވަގުތުގައި ވެސް ހަމަޖެހިގެން ކުޅޭ ކުޅުންތެރިން ތަކެއް ކަމަށް އޭނާ ފާހަގަ ކުރި އެވެ. 

ސްވިޒަލެންޑް އަކީ ވަރަށް ވަރުގަދަ ޓީމެއް ކަމަށް ފާހަގަ ކުރަމުން ސްކަލޯނީ ބުނީ، އެ ޓީމާ ދެކޮޅަށް ޖެހި ޖެހިގެން ފަސް ވަރަކަށް ޕާސް ޖެހުމަކީ ވެސް އުނދަގޫ ކަމެއް ކަމަށެވެ. އަދި ސްވިޒަލެންޑްއާ ދެކޮޅަށް ކުޅުނު މެޗުގައި އާޖެންޓީނާގެ ކުޅުންތެރިންނަށް ގިނަ އުނދަގޫ ތަކެއް ދިމާވި ކަމަށް އޭނާ ބުންޏެވެ. ނަމަވެސް، ބަދަލު ކުޅުންތެރިންގެ ގޮތުގައި ނިކުތް ކުޅުންތެރިންނާ އެކު އާޖެންޓީނާ އިން މެޗުގެ ނަތީޖާ އަނބުރާލީ ޓީމުގެ ޤާބިލުކަމުން ކަމަށް އޭނާ ބުންޏެވެ. 

މީގެ އިތުރުން ސްކަލޯނީ ބުނީ އާޖެންޓީނާ އަށް ލިބުނު ކާމިޔާބީ އަކީ ކުޅުންތެރިންގެ އެއްބައިވަންތަ ކަމުން ލިބުނު ކާމިޔާބެއް ކަމަށެވެ. މުބާރާތުގެ ސެމީ ފައިނަލްއާ ހަމައަށް އަންނައިރު ގިނަ ގޮންޖެހުންތަކާ ކުރިމަތިލާާން ޖެހޭނެ ކަމަށާއި، އެއީ ފުޓުބޯޅައިގެ ގޮތް ކަމަށް ވެސް ސްކަލޯނީ ބަނީ ބުނެފައި އެވެ. 

ބުދަ ދުވަހުގެ ރޭ ސެމީ ފައިނަލްގައި އާޖެންޓީނާ ނިކުންނާނީ އިންގްލެންޑްއާ ދެކޮޅަށެވެ. އެ މެޗުން މޮޅުވެ މުބާރާތުގެ ފައިނަލް އަށް ދިޔުމަކީ އާޖެންޓީނާގެ އެންމެ ބޮޑު އަމާޒެވެ. މިފަހަރުގެ މުބާރާތާ އާޖެންޓީނާ އިން ކުރިމަތިލީ ތަށި ދިފާއުކޮށް، ތާރީޚުން ޖާގަ ހޯދުމަށެވެ.