ހުރްމުޒް އޮތީ ހުޅުވިފައި ކަމަށް ޓްރަމްޕް ވިދާޅުވާއިރު ހިސާބުތަކުން ދައްކަނީ އެ ކަނޑުއޮޅިން ދަތުރުކުރި އުޅަނދުތައް ވަރަށް ބޮޑަށް ދަށްވެއްޖެ ކަމަށް
އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތަކާ ގުޅިގެން ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުގެ އަދަދު ފާއިތުވި ފަސް ހަފުތާގެ ތެރޭގައި އެންމެ ދަށްވި ދުވަހަކަށް އާދީއްތަ ދުވަސް ވެއްޖެ. ސަލާމަތީ ނުރައްކާ ބޮޑުވުމުގެ ސަބަބުން ގިނަ އުޅަނދުތަކުން ސިގްނަލް ދޭ ނިޒާމުތައް ނިއްވާލައިގެން ދަތުރުކުރަމުންދާއިރު، އީރާނުން ވަނީ އެ ސަރަހައްދުން ދަތުރުކުރި ދެ އުޅަނދެއް ހިފަހައްޓާފައި. އީރާނުގެ އަމާޒުތަކަށް އެމެރިކާއިން ވަރުގަދަ ހަމަލާތަކެއް ދީފައިވާއިރު، މި މަސްރަހާ ގުޅިގެން ބައިނަލްއަގުވާމީ ތެލާއި ގޭސް އުފުލާ އުޅަނދުފަހަރުގެ ދަތުރުތަކަށް ވަނީ ބޮޑެތި ބަދަލުތަކެއް އައިސްފައި.
އީރާނުގެ ލާރަކް އައިލެންޑް ކައިރީގައި ހުރްމުޒް ކަނޑުއޮޅީގައި، 2026 ވަނަ އަހަރުގެ މޭ މަހުގެ 16 ވަނަ ދުވަހު ގިނަ އަދަދެއްގެ މުދާ އުފުލާ ބޯޓުފަހަރު ބަނދަރުކޮށްފައި އޮތް މަންޒަރު. | ގެޓީ އިމޭޖަސް
އެމެރިކާއާއި އީރާނާ ދެމެދު އަލުން ހަމަލާތައް ބަދަލުކުރަން ފެށުމާއި، މެދުއިރުމަތީގައި ދަތުރުކުރާ އުޅަނދުފަހަރަށް އަމާޒުކޮށް ދެމުންދާ ހަމަލާތަކާ ގުޅިގެން ސަލާމަތީ ކަންބޮޑުވުންތައް އިތުރުވެ، ހުރްމުޒް ކަނޑުއޮޅިން ދަތުރުކުރި އުޅަނދުފަހަރުގެ އަދަދު ފާއިތުވި ހަފުތާތަކާ އަޅާބަލާއިރު އާދީއްތަ ދުވަހު ވަރަށް ބޮޑަށް ދަށްވެފައިވާކަން ކަނޑުދަތުރުފަތުރާ ބެހޭ ތަފާސްހިސާބުތަކުން ދައްކައިފި އެވެ.
އުޅަނދުފަހަރު ޓްރެކްކުރާ "ކެޕްލަރ" ގެ ތަފާސްހިސާބުތަކުން ދައްކާ ގޮތުގައި، އާދީއްތަ ދުވަހު އެ ކަނޑުއޮޅިން ދަތުރުކޮށްފައިވަނީ އެންމެ ހަ އުޅަނދެވެ. މިއީ ފާއިތުވި ފަސް ހަފުތާގެ ތެރޭގައި އެ ސަރަހައްދުން އެންމެ މަދުން އުޅަނދުފަހަރު ދަތުރުކުރި ދުވަހެވެ.
ތަފާސްހިސާބުތަކުން އެނގޭ ގޮތުގައި، އެ ކަނޑުއޮޅިން ބޭރުވި އުޅަނދުފަހަރުގެ ތެރޭގައި އީރާނުގެ ދެ މިލިއަން ފީފާ ސާފުނުކުރާ ތެޔޮ ބަރުކޮށްގެން ދަތުރުކުރި "ހިއުމެނިޓީ" ނަމަކަށް ކިޔާ ކްރޫޑް ކެރިއަރ އާއި، ކުވެއިތުގެ ފަސްލައްކަ ފީފާގެ ތެޔޮ ބަރުކޮށްގެން ދަތުރުކުރި "ކެޕްޓަން އެންޑްރިއަސް" ނަމަކަށް ކިޔާ ޓޭންކަރު ހިމެނެ އެވެ. މީގެ އިތުރުން ތެޔޮ ބަރުކުރުމަށްޓަކައި ހުސްކޮށް އޮތް ތިން ޓޭންކަރެއް ގަލްފުގެ ތެރެއަށް ވަދެފައިވާއިރު، ކަނޑުއޮޅި ހުރަސްކުރި ގިނަ އުޅަނދުފަހަރުތަކުން ވަނީ އެ ތަކެތީގެ ޓްރާންސްޕޮންޑަރުތައް ނުވަތަ ސިގްނަލް ދޭ ނިޒާމުތައް ނިއްވާލާފަ އެވެ.
އުޅަނދުފަހަރު ޓްރެކްކުރާ ނިޒާމުތަކުން ދައްކާ ގޮތުގައި، ނިމިދިޔަ ހަފުތާ ބަންދުގައި ގުދުރަތީ ގޭސް (އެލް.އެން.ޖީ) އުފުލާ އެއްވެސް އުޅަނދެއް އެ ކަނޑުއޮޅިން ދަތުރުކޮށްފައެއް ނުވެ އެވެ.
ކެޕްލަރގެ ތަފާސްހިސާބުތަކުން ދައްކާ ގޮތުގައި، އަބޫދާބީ ނޭޝަނަލް އޮއިލް ކޮމްޕެނީގެ ބެލުމުގެ ދަށުން ދަތުރުކުރާ އެއް ޓޭންކަރު ޖުލައި 10 އާއި 12 އާ ދެމެދު އެ ކަނޑުއޮޅިން ބޭރުވެފައިވެ އެވެ. މި އުޅަނދު މިހާރު ދަތުރުކުރަމުންދަނީ އިންޑިއާގެ ދަހޭޖް ބަނދަރަށެވެ.
އެމެރިކާގެ ސެންޓްރަލް ކޮމާންޑުން ބުނި ގޮތުގައި، އެމެރިކާގެ ސިފައިން ވަނީ އާދީއްތަ ދުވަހު އީރާނަށް އަމާޒުކޮށް ވަރުގަދަ ހަމަލާތަކެއް ދީފަ އެވެ. މި ހަމަލާތަކުގައި އީރާނުގެ އެކި ސަރަހައްދުތަކުގައި ހުރި އެތައް އަމާޒަކަށް ސީދާ އަމާޒަށް ވާސިލްވާ ފަދަ ޒަމާނީ ހަތިޔާރު ބޭނުންކޮށްގެން ހަމަލާދީފައިވާ ކަމަށް އެމެރިކާއިން ބުނެ އެވެ.
އެމެރިކާގެ ރައީސް ޑޮނަލްޑް ޓްރަމްޕް އާދީއްތަ ދުވަހު ވިދާޅުވީ، ހުރްމުޒް ކަނޑުއޮޅި ވިޔަފާރި އުޅަނދުފަހަރަށް ހުޅުވާލެވިފައިވާ ކަމަށެވެ. ނަމަވެސް، ހުއްދަ ނެތް މަގަކުން ދަތުރުކުރި އުޅަނދަކަށް ހަމަލާދިނުމަށްފަހު، އެ ކަނޑުއޮޅި ބަންދުކޮށްފައިވާ ކަމަށް އީރާނުން މީގެ ކުރިން ވަނީ އިއުލާނުކޮށްފަ އެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސްއިން ހޯމަ ދުވަހު ބުނި ގޮތުގައި، އެ ގައުމުގެ ނޭވީން ވަނީ ރޭގެ ވަގުތެއްގައި ހުރްމުޒް ކަނޑުއޮޅިން ދަތުރުކުރި ދެ އުޅަނދެއްގެ މުވާސަލާތީ ސިސްޓަމްތައް ހުއްޓުވައި، އެ އުޅަނދުތައް ހިފަހައްޓާފަ އެވެ. އެހެންނަމަވެސް، ހިފެހެއްޓި އުޅަނދުތަކުގެ ނަމެއް އީރާނުން ހާމަކޮށްފައެއް ނުވެ އެވެ.
