ހުރްމުޒް ކަނޑުއޮޅި އެމެރިކާގެ ބާރުގެ ދަށަށް ގެންނާނެ ކަމަށް އެމެރިކާގެ ރައީސް ޓްރަމްޕް ވިދާޅުވެއްޖެ

ދުނިޔޭގެ އިގްތިސާދަށް މުހިންމު ކަނޑުގެ މަގެއް ކަމަށްވާ ހުރްމުޒް ކަނޑުއޮޅީގެ ކޮންޓްރޯލް އެމެރިކާއިން ނަގައި، އެ ސަރަހައްދު ބެލެހެއްޓުމަށް ހިނގާ ޚަރަދު އެމެރިކާއަށް ލިބެންޖެހޭނެ ކަމަށް ރައީސް ޑޮނަލްޑް ޓްރަމްޕް ހޯމަ ދުވަހު ވިދާޅުވެއްޖެ އެވެ.

އެމެރިކާގެ ފޮކްސް ނިއުސްގެ "ފޮކްސް އެންޑް ފްރެންޑްސް" ޕްރޮގްރާމަށް ފޯނުން ދެއްވި އިންޓަވިއުއެއްގައި ޓްރަމްޕް ވިދާޅުވީ، އެމެރިކާއިން އެ ކަނޑުއޮޅި ހިފަހައްޓައި، އެތަނުގެ ހުރިހާ ކަމެއް ބަލަހައްޓާނެ ކަމަށެވެ. އަދި އެމެރިކާ ވެގެންދާނީ އެ ކަނޑުއޮޅީގެ ބަލަދުވެރިޔާ ނުވަތަ "ގާޑިއަން އެންޖެލް" އަށް ކަމަށާއި، އެ މަސައްކަތް ކުރުމުން އެމެރިކާއަށް އޭގެ ބަދަލު (ރީއިމްބާސްމަންޓް) ލިބެންޖެހޭނެ ކަމަށް ވެސް ޓްރަމްޕް ވިދާޅުވި އެވެ.