ވީއޭއާރުގެ ނިންމުން ތަކަށް ސްވިޒަލެންޑް ކޯޗުގެ ފާޑު ކިޔުން
12 ޖުލައި 2026 | އާދީއްތަ 13:43އާޖެންޓީނާ އަތުން ބަލިވެ ސްވިޒަލެންޑު މުބާރާތުން ކެޓިއިރު، އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޔަކިން ބުނީ، ސްވިޒަލެންޑުގެ ބްރީލް އެމްބޯލޯ އަށް ދެއްކި ރަތް ކާޑަކީ ބަަލައި ގަނެވޭނެ ކަމެއް ނޫން ކަމަށް. އަދި އެއީ ފުޓުބޯޅައާ އެއްވެސް ގުޅުމެއް ނެތް އުސޫލެއްގެ ދަށުން ނިންމި ނިންމުމެއް ކަމަށް އޭނާ ވަނީ ސިފަ ކޮށްފައި.
ސްވިޒަލެންޑުގެ ކޯޗު މުރާތު ޔަކިން. | ގެޓީ އިމޭޖަސް
ފީފާ ވޯލްޑް ކަޕްގެ ކުއާޓާ ފައިނަލްގައި އެންމެ ފަހުގެ ޗެމްޕިއަން އާޖެންޓީނާއާ ދެކޮޅަށް ކުޅެ ބަލިވި މެޗުގައި، ވީޑިއޯ އެސިސްޓެންޓް ރެފްރީ (ވީއޭއާރު)ގެ ނިންމުން ތަކަށް ސްވިޒަލެންޑުގެ ކޯޗު މުރާތު ޔަކިން ވަރަަށް ބޮޑަށް ފާޑު ކިޔައިފި އެވެ.
އާޖެންޓީނާ އަތުން ބަލިވެ ސްވިޒަލެންޑު މުބާރާތުން ކެޓިއިރު، އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޔަކިން ބުނީ، ސްވިޒަލެންޑުގެ ބްރީލް އެމްބޯލޯ އަށް ދެއްކި ރަތް ކާޑަކީ ބަަލައި ގަނެވޭނެ ކަމެއް ނޫން ކަމަށެވެ. އަދި އެއީ ފުޓުބޯޅައާ އެއްވެސް ގުޅުމެއް ނެތް އުސޫލެއްގެ ދަށުން ނިންމި ނިންމުމެއް ކަމަށް އޭނާ ވަނީ ސިފަ ކޮށްފައި އެވެ.
މެޗުގެ 72 ވަނަ މިނެޓުގައި އެމްބޯލޯ އަށް ރަތް ކާޑު ދެއްކީ އޭނާ ޑައިވް ކުރި ކަމަށް ނިންމުމަށް ފަހު އެވެ. މިއީ ސްވިޒަލެންޑުން މެޗުގެ ނަތީޖާ ހަމަހަމަ ކުރުމަށް ފަހު، ރަނގަޅަށް ކުޅެމުން އަންނަނިކޮށް ނިންމި ނިންމުމެކެވެ. އެންމެ ފުރަތަމަ ރެފްރީ ނިންމީ އާޖެންޓީނާގެ ލިއާންޑްރޯ ޕަރޭޑޭސް އަށް ރީނދޫ ކާޑު ދެއްކުމަށެވެ. ނަމަވެސް، ވީއޭއާރު އިން ރަނގަޅަށް ބެލުމަށް ފަހު އެމްބޯލޯ އަމިއްލަ އަށް ޑައިވް ކޮށްފައިވާތީ ރެފްރީ ވަނީ އޭނާ އަށް ރަތް ކާޑު ދައްކައިފަ އެވެ.
އެ ހާދިސާ އަށް އިޝާރާތްކޮށް ޔަކިން ބުނީ، އެމްބޯލޯ އަށް ރަތް ކާޑު ދައްކަން ޖެހޭ އެއްވެސް ސަބަބެއް ނެތް ކަމަށާއި، އެއީ ވަރަށް އާދައިގެ ޙާލަތެއް ކަމަށެވެ. އޭނާ ބުނީ ބަލައި ނުގަނެވޭ ފަދަ އުސޫލެއްގެ ދަށުން އޭނާގެ ޓީމަށް އަދަބު ދީފައިވާ ކަމަށާއި، އެ ޙާލަތުގެ ތެރެއަށް ވީއޭއާރު އިން ވަނުމަކީ މެޗު ހަލާކުވެގެން ދިޔަ ސަބަބު ކަމަށެވެ.
ޔަކިންގެ އިތުރުން ސްވިޒަލެންޑުގެ ރެމޯ ފްރޫލާ ވެސް ވަނީ ވީއޭއާރުގެ ނިންމުމަށް ފާޑު ކިޔައިފަ އެވެ. ޔަކިން އިތުރަށް ބުނީ ސްވިޒަލެންޑުން ދެއްކި ކުޅުމާ މެދު ފަޚުރުވެރިވާ ކަމަށާއި، ވީއޭއާރު އިން ނިންމި އެ ނިންމުން ފީފާ އިން ސާފު ކޮށްދޭން ޖެހޭ ކަމަށެވެ. އާޖެންޓީނާ އަކީ ދުނިޔޭގެ ޗެމްޕިއަނުން ކަމަށާއި، އެ ޓީމު ލީޑުގައި އޮއްވާ ފަހަތުން އަރައި ނަތީޖާ ހަމަހަމަކޮށް، ސްވިޒަލެންޑުން ދެއްކި ކުޅުމާ މެދު ފަޚުރުވެރިވާ ކަމަށް ޔަކިން ވަނީ ބުނެފައި އެވެ.
ސްވިޒަލެންޑް އިން މުބާރާތުގެ ކުއާޓާ ފައިނަލްއާ ހަމައަށް އައިސްފައިވާއިރު، މިއީ ފާއިތުވި 70 އަހަރުގެ ތެރޭގައި އެ ޓީމުން މުބާރާތުގައި ހޯދި އެންމެ ބޮޑު ކާމިޔާބެވެ. ފުރަތަމަ ފަހަރަށް ވޯލްޑް ކަޕްގެ ސެމީ ފައިނަލް އަށް ދިޔުމަށް ލިބުނު ފުރުސަތު ގެއްލުނު ނަމަވެސް، ޔަކިން ބުނީ ސްވިޒަލެންޑުގެ ކުޅުންތެރިންނަކީ ބަޠަލުން ކަމަށެވެ.
