ވޯލްޑް ކަޕް ފައިނަލް މެޗް ކުޅޭ ދަނޑުގެ ވިނަކޮޅުވެސް ފީފާ އިން ވިއްކާލަނީ، ވިނަކޮޅެއްގެ ފެށޭ އަގު އުޅެނީ 450 ޑޮލަށް

ފީފާ ވޯލްޑް ކަޕްގެ ފައިނަލް މެޗު ކުޅޭ ދަނޑުގެ ވިނަގަނޑުގެ ބައިތައް ވިއްކައިގެން، އެ އިދާރާއަށް އެތައް މިލިއަން ޑޮލަރެއްގެ އާމްދަނީއެއް ލިބޭނެ ކަމަށް ރިޕޯޓުތައް ބުނެފި އެވެ.

މި މުބާރާތުގެ ފައިނަލް މެޗު ކުޅޭ ދަނޑުގެ ވިނަގަނޑުގެ އެތިކޮޅުކޮޅު ހަނދާނީ ހަދިޔާގެ ގޮތުގައި ވިއްކުމަށް ހަމަޖެހިފައިވާއިރު، މީގެ އަގުތައް އުޅެނީ 450 ޑޮލަރާއި 1،200 ޑޮލަރާ ދެމެދުގަ އެވެ. ފީފާއިން އަމާޒު ހިފާފައިވަނީ މުބާރާތް ނިމި، ފައިނަލް މެޗު ކުޅެ ނިމުމަށްފަހުވެސް އެ މެޗުގެ ބޭނުން ހިފައިގެން އިތުރު އާމްދަނީ ހޯދުމަށެވެ.

ދުނިޔޭގެ ފުޓްބޯޅައިގެ މައި އިދާރާ، ފީފާއިން ހޮނިހިރު ދުވަހު އިއުލާންކުރި ގޮތުގައި، ފައިނަލް މެޗު ކުޅޭ ދަނޑުގެ ވިނަގަނޑުން ކޮށާފައިވާ ބައިތައް ވިއްކަން ފަށާނެ އެންމެ ކުޑަ އަގަކީ 450 ޑޮލަރެވެ.

ނިއު ޖާޒީގެ މެޓްލައިފް ސްޓޭޑިއަމަކީ އާންމުކޮށް އެމެރިކާގެ އެން.އެފް.އެލް ޓީމުތައް ކަމަށްވާ ނިއު ޔޯކް ޖަޔަންޓްސް އަދި ޖެޓްސް އިން އާޓިފިޝަލް ވިނަ ބޭނުންކޮށްގެން ކުޅޭ ދަނޑެކެވެ. ނަމަވެސް، މި ދަނޑުގެ ވިނަގަނޑުގެ ފެންވަރު ދަށްވުމުގެ ސަބަބުން ކުޅުންތެރިންނާއި ކޯޗުންގެ ފާޑުކިޔުން ވަނީ އަމާޒުވެފަ އެވެ. ވޯލްޑް ކަޕަށްޓަކައި ފީފާއިން މި ދަނޑުގެ ނަން ވަނީ "ނިއު ޖާޒީ ނިއު ޔޯކް ސްޓޭޑިއަމް" އަށް ބަދަލުކޮށްފަ އެވެ.

އެމެރިކާގައި މިއަހަރު ބާއްވާ މުބާރާތުގެ އަގުތައް އިންތިހާއަށް ބޮޑުކޮށްފައިވާ ކަމުގެ ފާޑުކިޔުން ފީފާއަށް އަމާޒުވެފައިވާއިރު، "ދަ އެތުލެޓިކް" ރިޕޯޓް ކުރާ ގޮތުގައި މި ވިނަގަނޑު ވިއްކައިގެން އެކަނިވެސް 11 މިލިއަން ޑޮލަރަށްވުރެ ބޮޑު އާމްދަނީއެއް އެ އިދާރާއަށް ލިބޭނެ އެވެ.

މިކަމާ ގުޅޭ ވެބްސައިޓުގައި ބުނެފައިވަނީ، 2026 ވަނަ އަހަރުގެ ފީފާ ވޯލްޑް ކަޕް ފައިނަލް ކުޅޭ ދަނޑުގެ އަސްލު ވިނަގަނޑުން ބައެއް، ޔޫ.އެސް.ބީ ހަނދާނީ ހަދިޔާއަކާއެކު ޕްރީމިއަމް އެކްރީލިކް ކޭސް އެއްގައި ރައްކާތެރިކޮށްފައިވާނެ ކަމަށެވެ. މިއީ ފުޓްބޯޅައިގެ ތާރީޚީ ހަނދާނެއް މިލްކުކުރުމުގެ ފުރުސަތެއް ކަމަށާއި، މިއީ، ދުނިޔޭގެ އެންމެ ބޮޑު ކުޅިވަރު ހަރަކާތުގެ ފައިނަލް ކުޅޭ ދަނޑުގެ އަސްލު ވިނަ ހިމެނޭ، އަގުހުރި ހަނދާނީ ހަދިޔާއެއް ކަމަށްވެސް ބުނެފައިވެ އެވެ.

ފީފާގެ ރަސްމީ ފިހާރައިން ބުނާ ގޮތުގައި ވިނަގަނޑުން ވިއްކާ އެތިކޮޅެއްގެ ސައިޒަކީ 17.5 ގުނަ 17.5 ގުނަ 17.5 އެވެ. ނަމަވެސް އެއީ އިންޗި، ސެންޓިމީޓަރު ނުވަތަ މިލިމީޓަރު ކަމެއް އެ އިދާރާއިން ސާފުކޮށްދީފައެއް ނުވެ އެވެ.

ފީފާއިން ބުނި ގޮތުގައި އެކްރީލިކް ޔޫ.އެސް.ބީގައި އެއީ އަސްލު އެއްޗެއްކަން އަންގައިދޭ ފިލްމެއް ހިމެނޭނެއެވެ. އަދި މިއީ ޒަމާނީ ފަރުމާއަކަށް ތައްޔާރުކޮށްފައިވާ، ކަލެކްޓަރުންނާއި ފުޓްބޯޅައަށް ލޯބިކުރާ ފަރާތްތަކަށް ޚާއްޞަ، ޕްރީމިއަމް ފެންވަރުގެ ފޮށްޓެއްގައި ބަންދުކޮށްފައިވާ އުފެއްދުމެކެވެ.

މި ވިނަގަނޑުން އެތިކޮޅެއް ގަތުމުގެ ފުރުސަތު ފީފާއިން ހުޅުވާލާފައިވަނީ ހަމައެކަނި އެމެރިކާ އަދި ޔޫރަޕްގެ އެޑްރެސްތަކަށް ފޮނުވައިދޭ ގޮތަށެވެ. އަދި އޯޑަރުތައް ފޮނުވަން ފަށާނީ 2026 ވަނަ އަހަރުގެ ވޯލްޑް ކަޕް ފައިނަލަށް ފަހުގަ އެވެ.

މުބާރާތުގެ ޓިކެޓާއި އެހެނިހެން ތަކެތީގެ އަގު ބޮޑުވުމުގެ އިތުރުން، ވިނަގަނޑުގެ ހަނދާނީ ހަދިޔާގެ އެންމެ އަގުބޮޑު ޕެކޭޖުގެ އަގަކީ 3،000 ޑޮލަރެވެ. ތިން އިންޗި ގުނަ ތިން އިންޗި (7.6 ސެންޓިމީޓަރު) ގެ މި ވިނަގަނޑާއެކު، ރަނުން ކުރެހުން އަޅާފައިވާ ފައިނަލް މެޗުގެ ޓިކެޓުގެ ރެޕްލިކާއަކާއި، ވޯލްޑް ކަޕް ބޯޅައިގެ ކުޑަ މޮޑެލްއެއްގެ އިތުރުން ކްރިސްޓަލުން ތައްޔާރުކޮށްފައިވާ ވޯލްޑް ކަޕް ތަށީގެ މޮޑެލްއެއް ލިބޭނެ އެވެ.

މީގެ އިތުރުން ވިނަގަނޑު ވިއްކުމަށް ހަމަޖެހިފައިވާ އަނެއް ތިން ކެޓަގަރީގެ އަގުތަކަކީ 450 ޑޮލަރު، 900 ޑޮލަރު އަދި 1،200 ޑޮލަރެވެ.

ކޮންމެ ކެޓަގަރީއަކުންވެސް ވިއްކުމަށް ހަމަޖެހިފައިވަނީ ގިނަވެގެން 2،026 ބައެވެ.

ފައިނަލް މެޗުގެ އާންމު ޓިކެޓެއްގެ އަގު 32،970 ޑޮލަރާ ހަމައަށް އުޅޭއިރު، ކެއުމާއި ބުއިން ހިމެނޭ ހޮސްޕިޓާލިޓީ ޓިކެޓްތައް ވިއްކަނީ 32،500 ޑޮލަރާއި 34،500 ޑޮލަރާ ދެމެދުގެ އަގުތަކެއްގަ އެވެ.

ރިޕޯޓްތައް ބުނާ ގޮތުގައި ވޯލްޑް ކަޕް ފައިނަލްގައި ބޭނުންކުރުމަށް ހަމަޖެހިފައިވާ މި ވިނަގަނޑަކީ ނޯތު ކެރޮލައިނާގެ ފާމެއްގައި ހައްދާފައިވާ ވިނައެވެ.

މުބާރާތުގެ ހުރިހާ ދަނޑެއްގެ ފެންވަރު އެއްވަރެއްގައި ހިފެހެއްޓުމަށްޓަކައި، ހުރިހާ ސްޓޭޑިއަމްތަކެއްގައިވެސް ވަނީ އަލުން ވިނަ އިންދާފަ އެވެ. މީގެ ތެރޭގައި އާންމުކޮށް އާޓިފިޝަލް ވިނަ ބޭނުންކުރާ ސިއާޓްލް، އެޓްލާންޓާ، އީސްޓް ރެޑަފޯޑް، ވެންކޫވަރު، އާލިންގްޓަން އަދި އިންގްލްވުޑްގެ ސްޓޭޑިއަމްތައް ހިމެނެ އެވެ.

ފައިނަލް މެޗަށް ބޭނުންނުކުރާ އެހެން ދަނޑުތަކުގެ ވިނަގަނޑަށް ހަދާނެ ގޮތެއް ފީފާއިން އަދި ހާމަކޮށްފައެއް ނުވެ އެވެ.