ވޯލްޑް ކަޕްގެ ސެމީ ފައިނަލަށް ދަތުރުކުރީ ކޮން ޓީމުތަކެއް؟ ޗެމްޕިއަން ޓީމާ ބެހޭ ގޮތުން ޕްރެޑިކްޝަން ބުނަނީ ކީކޭ؟

48 ޓީމާއެކު ފެށި މި މުބާރާތުގައި މިހާރު ބާކީ އޮތީ އެންމެ ހަތަރު ޓީމެވެ. 2026 ވަނަ އަހަރުގެ ވޯލްޑް ކަޕްގެ ސެމީ ފައިނަލްގެ ޖާގަތައް މިހާރު ކަށަވަރުވެފައިވާއިރު، ފަހު ހަތަރު ޓީމުގެ ތެރޭގައި ހިމެނެނީ ފްރާންސް، ސްޕެއިން، އިންގްލެންޑް އަދި އާޖެންޓީނާ އެވެ.

ދުނިޔޭގެ ރޭންކިންގެ އެންމެ ކުރީގައި އުޅޭ ހަތަރު ޓީމު، ޖުލައި މަހުގެ 19 ވަނަ ދުވަހު ތަށި އުފުލާލުމުގެ ޝަރަފު ހޯދުމަށް ވާދަކުރާއިރު، އެންމެ ފުރަތަމަ ޖެހޭނީ ފައިނަލުގެ ކުރިން އޮތް މި ހުރަސް ގިރާކުރާށެވެ.

މިހާތަނަށް ސެމީ ފައިނަލަށް ދަތުރުކުރީ ކޮން ޓީމުތަކެއް؟

ފްރާންސް (މޮރޮކޯ އަތުން 2-0 އިން މޮޅުވެގެން)

ސްޕެއިން (ބެލްޖިއަމް އަތުން 2-1 އިން މޮޅުވެގެން)

އިންގްލެންޑް (ނޯވޭ އަތުން 2-1 އިން މޮޅުވެގެން)

އާޖެންޓީނާ (އިތުރު ވަގުތު ކުޅެގެން ސްވިޒަލޭންޑް އަތުން 3-1 އިން މޮޅުވެގެން)

ވޯލްޑް ކަޕް ސެމީ ފައިނަލްގެ މެޗުތައް އޮތް ތާވަލަކީ ކޮބާ؟

ފްރާންސް އަދި ސްޕެއިން ބައްދަލުކުރާ މެޗު: ޖުލައި 14 ވާ އަންގާރަ ދުވަހު ޖީއެމްޓީން 19:00 - އެމެރިކާގެ ޑަލަސް ސްޓޭޑިއަމްގައި

އިންގްލެންޑް އަދި އާޖެންޓީނާ ބައްދަލުކުރާ މެޗު: ޖުލައި 15 ވާ ބުދަ ދުވަހު ޖީއެމްޓީން 19:00 - އެމެރިކާގެ އެޓްލާންޓާ ސްޓޭޑިއަމްގައި

ސެމީ ފައިނަލްގައި އެންމެ ބޮޑަށް ފާހަގަކޮށްލެވޭނެ ކުޅުންތެރިންނަކީ ކޮބާ؟

އަންގާރަ ދުވަހު ޑަލަސްގައި ފްރާންސާއި ސްޕެއިން ބައްދަލުކުރާ މެޗުގައި ދުނިޔޭގެ ފެންވަރުގެ ތަރިން ފެނިގެންދާނެ އެވެ.

ކީލިއަން އެމްބާޕޭ މި މުބާރާތުގައި ދައްކަމުންދަނީ އާދަޔާ ހިލާފު މޮޅު ކުޅުމެކެވެ. އޭނާ މަސައްކަތް ކުރާނީ ސްޕެއިނާ ދެކޮޅަށްވެސް ލަނޑު ޖެހުމުގެ ސިލްސިލާ ކުރިއަށް ގެންދިއުމަށެވެ. މީގެ އިތުރުން މައިކަލް އޮލީސޭ އާއި އޮސްމާން ޑެމްބެލޭ ވެސް ޓެކްސަސްގައި ކުޅޭ މި މެޗުގައި މުހިންމު ދައުރެއް އަދާކުރުމަށް ތިބީ ކެތްމަދުވެފަ އެވެ.

ސްޕެއިންގެ ފުރާވަރުގެ ހުނަރުވެރި ކުޅުންތެރިޔާ ލަމީން ޔަމާލް އޭނާގެ ފުރަތަމަ ވޯލްޑް ކަޕް ސެމީ ފައިނަލަށް ނުކުންނައިރު، އޭނާ ވެގެންދާނީ ޔޫރަޕްގެ މިހާރުގެ ޗެމްޕިއަނުންނަށް ކުޅުން ބައްޓަންކުރުމުގައި މުހިންމު ކުޅުންތެރިއަކަށެވެ.

މިކޭލް މެރީނޯ ވަނީ ސްޕެއިން އެންމެ ފަހުން ކުޅުނު ދެ މެޗުގައިވެސް ބަދަލު ކުޅުންތެރިއެއްގެ ގޮތުގައި ނުކުމެ، މެޗުގެ ފަހު ވަގުތު މޮޅުވި ލަނޑުތައް ޖަހައިދީފަ އެވެ. މި މެޗުގައިވެސް އޭނާ "ސުޕަ-ސަބް" އެއްގެ ގޮތުގައި ފެންނާނީތޯ ނުވަތަ ފުރަތަމަ އެގާރައިން ޖާގަ ހޯދާނެތޯ މިއީ އުފެދޭ ސުވާލެކެވެ.

އިންގްލެންޑުން މި މުބާރާތުގައި މިހާތަނަށް ހޯދި ކާމިޔާބީގެ ބިންގަލަކީ އެ ޓީމުގެ ކެޕްޓަން ހެރީ ކޭން ޖެހި ލަނޑުތަކެވެ. ނަމަވެސް ނޮކައުޓް ބުރުގައި ޖޫޑް ބެލިންހަމް ވަނީ ތަފާތު ދައްކަން ފަށާފަ އެވެ. އިންގްލެންޑްގެ ނަންބަރު 10، ބެލިންހަމް ވަނީ މިހާތަނަށް 6 ލަނޑު ޖަހައިގެން ރަން ބޫޓުގެ ރޭހުގައި ބައިވެރިވެފައެވެ. މީގެ ތެރެއިން ދެ ލަނޑު އޭނާ ކާމިޔާބުކުރީ ކުއާޓާ ފައިނަލްގަ އެވެ.

ވޯލްޑް ކަޕްގެ ތަށި ދިފާއުކުރުމަށް އާޖެންޓީނާއިން ކުރާ މަސައްކަތުގައި އެންމެ އިސް ދައުރެއް އަދާކުރަނީ 6 މެޗުން 8 ލަނޑު ޖަހާފައިވާ ލެޖެންޑް ލިއޮނަލް މެސީއެވެ. ކުއާޓާ ފައިނަލްގައި އޭނާއަށް ލަނޑެއް ނުޖެހުނު ނަމަވެސް، ސެމީ ފައިނަލްގައި އޭނާގެ ހުނަރު ދައްކާލައި، ޖެހިޖެހިގެން ދެވަނަ ފަހަރަށް އާޖެންޓީނާ ފައިނަލަށް ގެންގޮސްދިނުމަށް ކެޕްޓަން ހުރީ ތައްޔާރަށެވެ.

މުބާރާތް ކާމިޔާބުކުރާނެ ކަމަށް ބެލެވެނީ ކޮން ޓީމެއް؟

ތަފާސްހިސާބުތައް ދިރާސާކުރާ "އޮޕްޓާ" ގެ ސުޕަ ކޮމްޕިއުޓަރުން މި މުބާރާތުގައި ކުރަމުންދާ މަސައްކަތްތަކަށް ބަލާއިރު، މިހާރު ލަފާކުރެވެނީ ވޯލްޑް ކަޕް ކާމިޔާބުކުރާނީ ފްރާންސް ކަމަށެވެ.

ކޮމްޕިއުޓަރުގެ ހިސާބުތަކުން ދައްކާ ގޮތުގައި ފްރާންސް ފައިނަލަށް ދިއުމުގެ 57.70 އިންސައްތަ ފުރުސަތު އެބައޮތެވެ. އަދި ތަށި އުފުލާލުމުގެ 34.05 އިންސައްތަ ފުރުސަތު އެ ޓީމަށް އެބައޮތެވެ.

މި ރޭހުގައި ދެވަނައަށް އެންމެ ފުރުސަތު ބޮޑީ ސްޕެއިނަށެވެ. އެ ޓީމުން ދެވަނަ ފަހަރަށް ވޯލްޑް ކަޕް ކާމިޔާބުކުރުމުގެ 23.45 އިންސައްތަ ފުރުސަތު އެބައޮތް ކަމަށް ދައްކައެވެ.

އޮޕްޓާއިން ލަފާކުރާ ގޮތުގައި ތަށި ހޯދުމުގެ ތިންވަނައަށް އެންމެ ފުރުސަތު ބޮޑީ އިންގްލެންޑަށެވެ. އަދި ހަތަރުވަނައަށް އޮތީ އާޖެންޓީނާ އެވެ.