ޓުޗެލް ބުނީ އިންގްލެންޑްގެ ނަސީބު ރަނގަޅީ ކަމަށް
12 ޖުލައި 2026 | އާދީއްތަ 07:48ޓުޗެލް ބުނެފައި ވަނީ މެޗުގެ ނަތީޖާ އަކީ ވަރަށް ފުރިހަމަ ނަތީޖާއެއް ކަމަށް. އަދި ދުނިޔޭގެ އެންމެ މޮޅު ހަތަރު ޓީމުގެ ތެރޭގައި އިންގްލެންޑު ހިމެނުމަކީ އުފާވެރި ކަމެއް ކަމަށް ވެސް އޭނާ ބުނި. އެހެން ނަމަވެސް، ނޯވޭ މެޗުގައި ފެނުނީ އިންގްލެންޑުގެ ފަރާތުން ފެންނަން ޖެހޭ ކުޅުމެއް ނޫން ކަމަށާއި، އެ މެޗުގައި އިންގްލެންޑަށް އެހީތެރިވެދިނީ ނަސީބު ކަމަށް އޭނާ ވަނީ ބުނެފައި.
ފީފާ ވޯލްޑް ކަޕްގެ ކުއާޓާ ފައިނަލްގައި އިންގްލެންޑް އާއި ނޯވޭ ބައްދަލު ކުރި މެޗުގައި ތޯމަސް ޓުޗެލް. | ގެޓީ އިމޭޖަސް
ފީފާ ވޯލްޑް ކަޕްގެ ކުއާޓާ ފައިނަލްގައި ނޯވޭ ބަލިކޮށް އިންގްލެންޑް އިން މުބާރާތުގެ ސެމީ ފައިނަލްގެ ޖާގަ ހޯދިއިރު، އިންގްލެންޑުގެ ނަސީބު ރަނގަޅީ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.
ނޯވޭ ބަލިކޮށް އިންގްލެންޑް އިން މުބާރާތުގެ ސެމީ ފައިނަލްގެ ޖާގަ ހޯދިއިރު، މިއީ 2018 ވަނަ އަހަރުގެ ފަހުން އިންގްލެންޑް އިން މުބާރާތުގެ ސެމީ ފައިނަލްގެ ޖާގަ ހޯދި ފުރަތަމަ ފަހަރެވެ.
ނޯވޭ މެޗަށް ފަހު ނޫސްވެރިންނާ ވާހަކަ ދައްކަމުން ޓުޗެލް ބުނެފައި ވަނީ، މެޗުގެ ނަތީޖާއާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. ނަމަވެސް، އިންގްލެންޑުގެ ފަރާތުން ފެނުނު ކުޅުމާ މެދު ހިތްހަމަ ނުޖެހޭ ކަމަށް ޓުޗެލް ބުންޏެވެ. ޓުޗެލް އަކީ އިންގްލެންޑުގެ ތާރީޚުގައި ވެސް، ވޯލްޑް ކަޕްގެ ސެމީ ފައިނަލް އަށް އެ ޓީމު ގެންގޮސްދިން ހަތަރު ވަނަ ކޯޗެވެ.
މީގެ އިތުރުން ޓުޗެލް ބުނެފައި ވަނީ މެޗުގެ ނަތީޖާ އަކީ ވަރަށް ފުރިހަމަ ނަތީޖާއެއް ކަމަށެވެ. އަދި ދުނިޔޭގެ އެންމެ މޮޅު ހަތަރު ޓީމުގެ ތެރޭގައި އިންގްލެންޑު ހިމެނުމަކީ އުފާވެރި ކަމެއް ކަމަށް ވެސް އޭނާ ބުންޏެވެ. އެހެން ނަމަވެސް، ނޯވޭ މެޗުގައި ފެނުނީ އިންގްލެންޑުގެ ފަރާތުން ފެންނަން ޖެހޭ ކުޅުމެއް ނޫން ކަމަށާއި، އެ މެޗުގައި އިންގްލެންޑަށް އެހީތެރިވެދިނީ ނަސީބު ކަމަށް އޭނާ ވަނީ ބުނެފައި އެވެ.
އެހެން ނަމަވެސް، ޓީމުގެ ކުޅުންތެރިންގެ ފަރާތުން ފެނުނު ހިތްވަރާއި، ކުޅުމުގެ ރޫހާ މެދު އެއްވެސް ސުވާލެއް ނެތް ކަމަށް ޓުޗެލް ބުންޏެވެ. ދަނޑު މަތީގައި ޓީމު ރޭވިފައި އޮތް ގޮތުން ގިނަ ދަތި ތަކެއް ކުރިމަތިވި ކަމަށާއި، ކުޅުންތެރިންގެ ފަރާތުން ފަންނީ ގިނަ ގޯސް ތަކެއް ފެނި، ކުޅުން ލަސްވި ކަމަށް ޓުޗެލް ފާހަގަ ކުރި އެވެ.
މީގެ ކުރިން އިންގްލެންޑުގެ ކުޅުންތެރިންގެ ނަފްސާނީގޮތުން ވަރުގަދަކަމާ މެދު ގިނަ ފާޑު ކިޔުން ތަކެއް އަމާޒުވި ނަމަވެސް، މިހާރުގެ ޓީމުގައި އެފަދަ މައްސަލައެއް ނެތް ކަމަށް އޭނާ ބުންޏެވެ. ނަމަވެސް، މައްސަލަ އަކީ ކުޅުންތެރިންގެ ފެންވަރު ކަމަށާއި، ކުރިއަށް އޮތް މެޗު ތަކުގައި އެކަން ވަރަށް ބޮޑަށް ރަނގަޅު ކުރަން ޖެހޭނެ ކަމަށް ޓުޗެލް ވަނީ ބުނެފައި އެވެ.
އިންގްލެންޑް އިން މުބާރާތުގެ ސެމީ ފައިނަލްގެ ޖާގަ ހޯދިއިރު، ސެމީ ފައިނަލްގައި އެ ޓީމު ނިކުންނާނީ އެންމެ ފަހުގެ ޗެމްޕިއަން އާޖެންޓީނާއާ ދެކޮޅަށެވެ.
