ފަހަތުން އަރައި ދެ ލަނޑު ޖަހައިގެން ނޯވޭ ކަޓުވާލައި، އިންގްލެންޑް ސެމީ ފައިނަލް އަށް

މިހާރު ކުރިއަށްދާ ފީފާ ވޯލްޑް ކަޕްގެ ކުއާޓާ ފައިނަލްގައި ނޯވޭއާ ދެކޮޅަށް ކުޅުނު މެޗުން ފަހަތުން އަރައި މޮޅުވެ، އިންގްލެންޑުން މުބާރާތުގެ ސެމީ ފައިނަލް އިން ޖާގަ ހޯދައިފި އެވެ.

ހޮނިހިރު ދުވަހުގެ ރޭ ދަންވަރު ކުޅުނު މެޗު އިންގްލެންޑް އިން ކާމިޔާބު ކުރީ 2-1 އިންނެވެ. މެޗުގައި ނޯވޭ އިން ލަނޑު ޖަހައި ކުރި ހޯދާފައި ވަނިކޮށް، އިންގްލެންޑް އިން ވަނީ ފަހަތުން އަރައި ދެ ލަނޑު ޖަހައިގެން މޮޅުވެފައި އެވެ. 

މެޗު ފަށައިގެން 36 ވަނަ މިނެޓުގައި ނޯވޭ އަށް ލީޑު ނަގައިދިނީ އަންޑްރެސް ޝެލްޑްރަޕް އެވެ. އެއީ މާޓިން އޮޑެގާޑް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ނަމަވެސް، މެޗުގެ ފުރަތަމަ ހާފުގެ އިތުރު ވަގުތުގައި އިންގްލެންޑަށް ނަތީޖާ ހަމަހަމަ ކޮށްދިނީ ޖޫޑް ބެލިންހަމް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ އެންތަނީ ގޯޑަން އެވެ. 

މެޗުގައި އިތުރު ލަނޑު ޖަހަން ދެ ޓީމުން ކުރި މަސައްކަތް ކާމިޔާބު ނުވުމުން، އިތުރު ވަގުތުގެ ދެ ހާފު ވަނީ ކުޅެފައި އެވެ. އޭގެ ތެރެއިން ވެސް ދެ ވަނަ ހާފުގައި އިންގްލެންޑް މޮޅު ކޮށްދިނީ ބެލިންހަމް އެވެ. 

މޮޅާ އެކު އިންގްލެންޑް އިން މުބާރާތުގެ ސެމީ ފައިނަލް އިން ޖާގަ ހޯދިއިރު، އެންމެ ފަހުން އެ ޓީމު ސެމީ ފައިނަލްގައި ކުޅުނީ 2018 ވަނަ އަހަރު އެވެ.