ސްވިޒަލެންޑް ބަލިކޮށް، ޗެމްޕިއަން އާޖެންޓީނާ ސެމީ ފައިނަލް އަށް
12 ޖުލައި 2026 | އާދީއްތަ 05:35މެޗުގައި އާޖެންޓީނާ އިން ލީޑު ނަގާފައި ވަނިކޮށް، ސްވިޒަލެންޑް އިން ނަތީޖާ ހަމަހަމަ ވެސް ކުރި. ނަމަވެސް، ދެ ލަނޑު ޖަހައިގެން އާޖެންޓީނާ ވަނީ މެޗުން މޮޅުވެފައި.
މެޗުގައި ލަނޑު ޖެހުމަށް ފަހު އާޖެންޓީނާގެ އަލްވަރޭޒް އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ކުއާޓާ ފައިނަލްގައި ސްވިޒަލެންޑް ބަލިކޮށް، އެންމެ ފަހުގެ ޗެމްޕިއަން އާޖެންޓީނާ އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.
އާދީއްތަ ދުވަހުގެ ހެނދުނު ކުޅުނު މެޗު އާޖެންޓީނާ އިން ކާމިޔާބު ކުރީ 3-1 އިންނެވެ. މެޗުގައި އާޖެންޓީނާ އިން ލީޑު ނަގާފައި ވަނިކޮށް، ސްވިޒަލެންޑް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ލަނޑު ޖަހައިގެން އާޖެންޓީނާ ވަނީ މެޗުން މޮޅުވެފައި އެވެ.
މެޗު ފަށައިގެން 10 ވަނަ މިނެޓުގައި އާޖެންޓީނާ އިން ވަނީ ލަނޑު ޖަހައި ލީޑު ނަގައިފަ އެވެ. އާޖެންޓީނާ އަށް ލިބުނު ކޯނަރެއްގައި ކެޕްޓަން ލިއޮނަލް މެސީ ހުރަސްކޮށްދިން ބޯޅަ ގޯލަށް ވައްދާލައިގެން އެ ލަނޑު ޖަހައިދިނީ އެލެކްސިސް މެކް އަލިސްޓާ އެވެ.
މެޗުގައި ސްވިޒަލެންޑް އިން ވަނީ ލަނޑު ޖަހަން ރަނގަޅު ފުރުސަތު ތަކެއް ހޯދައިފަ އެވެ. މެޗުގެ ދެ ވަނަ ހާފުގެ 67 ވަނަ މިނެޓުގައި ސްވިޒަލެންޑް އަށް ނަތީޖާ ހަމަހަމަ ކޮށްދިނީ ޑަން އެންޑޯޔޭ އެވެ.
މެޗުގައި ސްވިޒަލެންޑް އަަށް އެންމެ ބޮޑު ގެއްލުމެއް ދެއްކީ އެ ޓީމުގެ ބްރީލް އެމްބޯލޯ އަށް ރަތް ކާޑު ދެއްކުމުންނެވެ. އެއީ ކުޅުމުގެ ތެރެއިން އޭނާ އަމިއްލަ އަަށް ޑައިވް ކުރުމުންނެވެ. އެ ކާޑު ރެފްރީ ދެއްކީ ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު އެވެ.
މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމުން، އިތުރު ވަގުތުގެ ދެ ހާފު ވަނީ ކުޅެފައި އެވެ. އިތުރު ވަގުތުގެ ދެ ވަނަ ހާފުގައި އާޖެންޓީނާ އަށް ލީޑު ނަގައިދިނީ ހޫލިއަން އަލްވަރޭޒް އެވެ.
އޭގެ ފަހުން މެޗުގެ ފަހު ވަގުތު އާޖެންޓީނާގެ ތިން ވަނަ ލަނޑު ޖަހައި ލީޑު ފުޅާ ކޮށްދިނީ ލައުޓާރޯ މާޓިނޭޒް އެވެ.
މުބާރާތުގެ ސެމީ ފައިނަލްގައި އާޖެންޓީނާ ނިކުންނާނީ އިންގްލެންޑާ ދެކޮޅަށެވެ.
