މެސީ އަށް އިތުބާރު ކުރަން، ޓީމު އޮތީ ރަނގަޅު ހިތްވަރެއްގައި: ސްކަލޯނީ

ފީފާ ވޯލްޑް ކަޕްގެ ކުއާޓާ ފައިނަލްގައި ސްވިޒަލެންޑާ ދެކޮޅަށް ނިކުންނައިރު އާޖެންޓީނާގެ ކެޕްޓަން ލިއޮނަލް މެސީ އަށް އިތުބާރު އޮންނަ ކަމަށާއި، ޓީމު އޮތީ ރަނގަޅު ހިތްވަރެއްގައި ކަމަށް އާޖެންޓީނާގެ ކޯޗު ލިއޮނަލް ސްކަލޯނީ ބުނެފި އެވެ.

ސްކަލޯނީ މިހެން ބުނެފައި ވަނީ އާދީއްތަ ދުވަހުގެ ހެނދުނު ކުއާޓާ ފައިނަލްގައި ސްވިޒަލެންޑާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. 

ސްކަލޯނީ ބުނީ މެސީ އަކީ އެންމެ މޮޅު ކުޅުންތެރިޔާ ކަމަށާއި، ޒަމާން ތަކެއް ވަންދެން އެގޮތުގައި މެސީ ދެމި ހުންނާނެ ކަމަށެވެ. ނަމަވެސް، މެސީގެ ކުޅުމަށް ވެސް ބަދަލު ތަކެއް އަންނާނެ ކަމަށާއި، ކޮންމެ ވެސް ދުވަހަކުން އެކަން ބަދަލު ވާނެ ކަމަށް ވެސް ސްކަލޯނީ ބުންޏެވެ. މިފަހަރުގެ ވޯލްޑް ކަޕްގައި އާޖެންޓީނާގައި ހުރި އެންމެ މުހިންމު ކުޅުންތެރިޔަކީ ވެސް މެސީ ކަމަށް ސްކަލޯނީ ބުންޏެވެ.

މުބާރާތުގައި އާޖެންޓީނާ އިން ދައްކަމުން އަންނަ ކުޅުމާ ގުޅޭ ގޮތުން ސްކަލޯނީ ބުނީ ގަދަ 32 ގައި ކޭޕް ވާޑްއާ ދެކޮޅަށް ކުޅުނު މެޗާއި، ގަދަ 16 ގައި މިޞްރާ ދެކޮޅަށް ކުޅުނު މެޗުގައި ހެދުނު ބައެއް ގޯސްތައް ފިޔަވައި، ޓީމުގެ ކުޅުން ރަނގަޅު ކަމަށެވެ. އެހެން ނަމަވެސް، އަދިވެސް އާޖެންޓީނާ އިން ރަނގަޅު ކުރަން ޖެހޭ ކަންކަން ހުރި ކަމަށް ސްކަލޯނީ ވަނީ ބުނެފައި އެވެ. 

ސްވިޒަލެންޑްއާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، އެ ޓީމަކީ ވެސް ވަރަށް ވަރުގަދަ ޓީމެއް ކަމަަށެވެ. އަދި ސްވިޒަލެންޑްއާ ދެކޮޅަށް ކުޅުމަކީ ފަސޭހަ ކަމަކަށް ނުވާނެ ކަމަށް ވެސް ސްކަލޯނީ ބުންޏެވެ. މުބާރާތުގެ މިހާ ހިސާބަށް އަންނަ ޓީމު އެއްވެސް ޓީމެއް ފަސޭހަ ނުވާނެކަން ފާާހަގަކޮށް ސްކަލޯނީ ބުނީ، ސްވިޒަލެންޑުގައި ވެސް ތިބީ ތަޖުރިބާާކާރު ކުޅުންތެރިން ކަމަށެވެ. 

ކުއާޓާ ފައިނަލްގެ މެޗު ކާމިޔާބުކޮށް، މުބާރާތުގެ ސެމީ ފައިނަލް އަށް ދިޔުމަށް އާޖެންޓީނާ އިން ހުރިހާ މަސައްކަތެއް ކުރާނެ ކަމަށް ސްކަލޯނީ ބުންޏެވެ. އޭނާ ބުނީ، އާޖެންޓީނާގެ ކުޅުންތެރިންގެ ކިބައިން އެދެން ބޭނުން ވަނީ އެންމެ ކަމަކަށް ކަމަށެވެ. އެގޮތުން އެންމެ ފަހު ވަގުތާ ޖެހެންދެން މަސައްކަތް ކުރުމާއި، ހިތްވަރު ދޫކޮށް ނުލުމަށް ސްކަލޯނީ ވަނީ އެދިފައި އެވެ.

މުބާރާތުގެ ގަދަ 16 ގައި މިޞްރާ ދެކޮޅަށް ކުޅުނު މެޗުން އާޖެންޓީނާ މޮޅުވެފައި ވަނީ ފަހަތުން އަރައި ތިން ލަނޑު ޖަހައިގެންނެވެ. މެޗުގައި މިޞްރުން ދެ ލަނޑު ޖަހައިގެން ލީޑު ނަގާފައި ވަނިކޮށް، މެޗުގެ ފަހު 11 މިނެޓުގައި ތިން ލަނޑު ޖަހަައިގެން އާޖެންޓީނާ ވަނީ މެޗުން މޮޅުވެފައި އެވެ. އެކަމަށް އިޝާރާތްކޮށް ސްކަލޯނީ ބުނީ، އާޖެންޓީނާގެ ކުޅުންތެރިންގެ ކިބައިން ފެންނަން ބޭނުން ވަނީ އެ ހިތްވަރު ކަމަށެވެ.

މުބާރާތުގެ ކުއާޓާ ފައިނަލްގައި އާޖެންޓީނާ އާއި ސްވިޒަލެންޑު ބައްދަލު ކުރާ މެޗު އޮންނާނީ އާދީއްތަ ދުވަހުގެ ހެނދުނު ހައެއް ޖަހާއިރު އެވެ.