އެމެރިކާ އާއި މެކްސިކޯ މުބާރާތުން ކެޓުމުން ވޯލްޑް ކަޕް ޓިކެޓް އަގުތައް ދަށަށް

ވޯލްޑް ކަޕް ފުޓްބޯޅަ މުބާރާތުން އެމެރިކާ އާއި މެކްސިކޯ ކެޓުމަކީ، އަގުހެޔޮކޮށް ޓިކެޓް ހޯދަން ބޭނުންވާ ސަޕޯޓަރުންނަށް ލިބުނު ބޮޑު ކުރިއެރުމަކަށް ވަނީ ވެފަ އެވެ.

ޓިކެޓް ވިއްކާ ސެކަންޑަރީ މާކެޓްޕްލޭސްއެއް ކަމަށްވާ "ޓިކްޕިކް" އިން ހާމަކުރި ގޮތުގައި، ހުކުރު ދުވަހު ކުޅުނު ސްޕެއިން އާއި ބެލްޖިއަމް ބައްދަލުކުރާ މެޗުގެ ޓިކެޓްގެ އަގުތައް ވަނީ 65 އިންސައްތަ ދަށަށް ގޮސްފަ އެވެ. މި ހަފުތާގެ ކުރީކޮޅު ކުޅުނު މެޗުން އެމެރިކާ މޮޅުވި ނަމަ، މި މެޗުގައި ކުޅޭނީ އެމެރިކާ އެވެ.

މިދިޔަ ހޯމަ ދުވަހު އެމެރިކާ ބަލިވުމުގެ ކުރިން، ޓިކްޕިކް މެދުވެރިކޮށް އެންމެ އަގުހެޔޮކޮށް ލިބެން ހުރި ޓިކެޓެއްގެ އަގު ހުރީ ގާތްގަނޑަކަށް 3،200 ޑޮލަރުގަ އެވެ. ނަމަވެސް އެމެރިކާ ބަލިވި ފަހުން އަގުތައް ވަރަށް ބޮޑަށް ދަށަށް ގޮސް، ލޮސް އެންޖެލިސްގައި މެންދުރުފަހު ކުޅޭ މެޗުގެ ޓިކެޓެއްގެ އަގު މިހާރު ވަނީ 1،100 ޑޮލަރަށް ތިރިވެފަ އެވެ.

މެކްސިކޯގެ ހާލަތަށް ބަލާއިރު، މިދިޔަ އާދިއްތަ ދުވަހު އިންގްލެންޑް އަތުން އެ ގައުމު ބަލިވުމާ ގުޅިގެން ޓިކެޓްގެ އަގުތައް 45 އިންސައްތަ ދަށަށް ގޮސްފައިވާ ކަމަށް ޓިކްޕިކް އިން ބުނެ އެވެ. މިއާމީގައި ހޮނިހިރު ދުވަހު ކުޅޭ ފޯރިގަދަ މެޗުގެ އެންމެ އަގުހެޔޮ ޓިކެޓްތަކުގެ އަގު ކުރިން 4،000 ޑޮލަރާ ގާތްކުރި ނަމަވެސް، މިހާރު އެ އަގުތައް ވަނީ 2،000 ޑޮލަރަށް ދަށްވެފަ އެވެ.

ޓިކްޕިކްގެ ކޯ-ސީއީއޯ ބްރެޓް ގޯލްޑްބާގް ސީއެންއެންއަށް މައުލޫމާތު ދެމުން ބުނީ، ކުއާޓާ ފައިނަލްގެ ޓިކެޓްތަކުގެ އަގުތައް ކަނޑައަޅާފައިވަނީ މެކްސިކޯ އާއި އެމެރިކާ ވެސް މުބާރާތުގެ ކުރިއަށްދާނެ ކަމަށް ބަލައިގެން ކަމަށެވެ. ނަމަވެސް ގަދަ 16 ގެ ބުރުގައި ޖެހިޖެހިގެން ދެ ދުވަހު މި ދެ ގައުމު ބަލިވުމާއެކު، އެ ގައުމުތައް ކުޅެން އޮތް ކުއާޓާ ފައިނަލް މެޗުތަކުގެ ޑިމާންޑް ވަގުތުން އަދި ވަރަށް ބޮޑަށް ދަށަށް ދިޔައީ ކަމަށް އޭނާ ފާހަގަކުރި އެވެ.

މިދިޔަ ހަފުތާގައި ކެނެޑާ ވެސް މުބާރާތުން ކަޓާފައިވާއިރު، މިއީ މުބާރާތް ބާއްވާ ތިން ގައުމު ވެސް ވޯލްޑް ކަޕުން ވަކިވި ފަހަރެވެ. އެމެރިކާ އާއި ހާއްސަކޮށް މެކްސިކޯ މުބާރާތުން ވަކިވުމަކީ، އެމެރިކާގެ 18 ސަރަހައްދެއްގައި ހިންގާ "ޓޮމްސް ވޮޗް ބާ" ފަދަ ކުޅިވަރު ބާތަކުގެ ވިޔަފާރިއަށް ލިބުނު ބޮޑު ގެއްލުމެކެވެ.

އެ ކުންފުނީގެ ކޯ-ފައުންޑަރ އަދި ކޯ-ސީއީއޯ ބްރޫކްސް ޝާޑަން ބުނި ގޮތުގައި، މެކްސިކޯ އާއި އެމެރިކާ ކުޅޭ ދުވަސްތަކަކީ އެ ކުންފުނީގެ ވިޔަފާރި ވަރަށް ބޮޑަށް ކުރިއަރާ ދުވަސްތަކެކެވެ. ނަމަވެސް މި ދެ ގައުމު މުބާރާތުން ވަކިވުމާއެކު، ވޯލްޑް ކަޕްގެ ކުރިއަށް ހުރި ދުވަސްތަކުގައި ވިޔަފާރި 50 އިންސައްތަ ދަށަށް ދާނެ ކަމަށް އޭނާ މިހާރު ލަފާކުރެ އެވެ.