އިންގްލެންޑުން ވޯލްޑް ކަޕް ކާމިޔާބު ކޮށްފި ނަމަ، ސަރުކާރު ބަންދު ކުރަނީ

މިހާރު ކުރިއަށްދާ ފީފާ ވޯލްޑް ކަޕް އިންގްލެންޑުން ކާމިޔާބު ކޮށްފި ނަމަ، އެ ޤައުމުގައި ސަރުކާރު ބަންދު ދުވަހެއް، ނުވަތަ ބޭންކް ހޮލިޑޭއެއް އިއުލާާން ކުރައްވާނެ ކަމުގެ އިޝާރާތެއް އެ ޤައުމުގެ ބޮޑު ވަޒީރު ކިއާ ސްޓާމާ ދެއްވައިފި އެވެ. 

ބޮޑު ވަޒީރު ސްޓާމާ މިފަދަ އިޝާރާތެއް ދެއްވާފައި ވަނީ، ވޯލްޑް ކަޕްގެ ކުއާޓާ ފައިނަލްގައި ހޮނިހިރު ދުވަހުގެ ރޭ ނޯވޭއާ ދެކޮޅަށް ނިކުންނަން އިންގްލެންޑުން ތައްޔާރު ވަމުން އަންނަ ވަގުތެއްގައި އެވެ. 

މިފަހަރުގެ ވޯލްޑް ކަޕްގެ ފައިނަލް މެޗު ކުޅުމަށް ހަމަޖެހިފައި ވަނީ ޖުލައި މަހުގެ 19 ވާ އާދީއްތަ ދުވަހުގެ ރޭ ނިއު ޖާޒީގައި އެވެ. އިންގްލެންޑުން މުބާރާތުގެ ފައިނަލް އަށް ދަތުރު ކޮށްފި ނަމަ، ބޮޑު ވަޒީރު ސްޓާމާ ފައިނަލް މެޗު ބައްލަވަން ވަޑައިގަންނަވާނެ ކަމަށް ބެލެވެ އެވެ. 

މިކަމުގެ ސަބަބުން އިނގިރޭސިވިލާތުގެ ސަރުކާރު ބަދަލުވުމަށް ކުޑަ މަޑު ޖެހުމެއް އައުމަކީ ވެސް އެކަށީގެންވާ ކަމެކެވެ. ބޮޑު ވަޒީރުގެ މަގާމުން އިސްތިއުފާ ދެއްވާނެކަން ސްޓާމާ އިއުލާން ކުރައްވާފައިވާއިރު، ދެން ބޮޑު ވަޒީރު ކަމަށް ވަޑައިގަންނަވާނެ ކަމަށް ބެލެވޭ އެންޑީ ބާންހަމް މަގާމާ ހަވާލުވާނެ ތާރީޚަކީ ޖުލައި މަހުގެ 20 ވަނަ ދުވަހެވެ. 

އިންގްލެންޑުން ވޯލްޑް ކަޕް ކާމިޔާބު ކޮށްފި ނަމަ ސަރުކާރު ބަންދު ކުރާނެތޯ ނޫސްވެރިޔަކު ސުވާލު ކުރުމުން ސްޓާމާ ވިދާޅުވީ، އެކަމާ ބެހޭ ގޮތުން މާ ކުރިން ވާހަކަ ދައްކައިގެން އިންގްލެންޑުގެ ނަސީބަށް ދެރައެއް ލިބެން ބޭނުންފުޅު ނުވާ ކަމަށެވެ. ނަމަވެސް، އިންގްލެންޑު މުބާރާތުގެ ފައިނަލް އަށް ގޮސްފި ނަމަ، އަލުން އެ ސުވާލު ތަކުރާރު ކުރެއްވުމަށް ސްޓާމާ އެދިވަޑައިގެންނެވި އެވެ. ރިޕޯޓު ތަކުގައި ބުނެފައިވާ ގޮތުން އިންގްލެންޑުން ވޯލްޑް ކަޕް ކާމިޔާބު ކޮށްފި ނަމަ، ސަރުކާރު ބަންދު ކުރާނެ އެވެ. 

މުބާރާތުގެ ފައިނަލް އަށް ދިޔުމަށް އިންގްލެންޑަށް އޮތީ ފަސޭހަ މަގެއް ނޫނެވެ. ކުއާޓާ ފައިނަލްގައި ނޯވޭއާ ދެކޮޅަށް ނިކުންނައިރު، ނޯވޭ އަކީ މުބާރާތުގައި ވަރުގަދަ ކުޅުމެއް ދައްކަމުން އަންނަ ޓީމެކެވެ.