ޓުޗެލް ދެކޭ ގޮތުގަައި އިންގްލެންޑަށް އޮތް އެންމެ ބޮޑު ގޮންޖެހުމަކީ ހާލަންޑް ހުއްޓުވުން
11 ޖުލައި 2026 | ހޮނިހިރު 05:09މުބާރާތުގައި އިންގްލެންޑުން ދައްކަމުން އަންނަ ކުޅުމާ މެދު ސުވާލު ތަކެއް އުފެދިފައިވާ މި ދަނޑިވަޅުގައި ޓުޗެލް ބުނީ، އިންގްލެންޑުން އެ ޓީމުގެ ކުޅުން ރަނގަޅު ކުރަން ޖެހޭ ކަމަށް. އޭނާ ބުނީ ބައެއް ޙާލަތް ތަކުގައި އިންގްލެންޑުގެ ކުޅުން ލަސްވާ ކަމަށެވެ. ކުއާޓާ ފައިނަލް އަށް ނިކުންނައިރު، ޓުޗެލް ބޭނުން ވަނީ ޕްރިމިއާ ލީގުގެ ފޯރި އިންގްލެންޑުން ފެންނަން.
ވޯލްޑް ކަޕްގެ ކުއާޓާ ފައިނަލްގައި ނޯވޭއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި އިންގްލެންޑުގެ ކޯޗު ތޯމަސް ޓުޗެލް ވާހަކަ ދައްކަނީ. | ގެޓީ އިމޭޖަސް
ފީފާ ވޯލްޑް ކަޕްގެ ކުއާޓާ ފައިނަލްގައި ނޯވޭއާ ދެކޮޅަށް ނިކުންނައިރު، އިންގްލެންޑަށް އޮތް އެންމެ ބޮޑު ގޮންޖެހުމަކީ ނޯވޭގެ ފޯވާޑް އާލިން ހާލަންޑު ކަމަށް، އިންގްލެންޑުގެ ކޯޗު ތޯމަސް ޓުޗެލް ބުނެފި އެވެ.
ޓުޗެލް މިހެން ބުނެފައި ވަނީ ހޮނިހިރު ދުވަހުގެ ރޭ ދަންވަރު ނޯވޭއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.
ނޯވޭއާ ދެކޮޅަށް ނިކުންނައިރު، މީގެ ކުރިން ބައެެއް ކުލަބު ތަކަށް އިރުޝާދު ދިންއިރު ހާލަންޑުގެ ފަރާތުން ކުރިމަތިވި ނުރައްކާ ތަކުގެ ހަނދާން ޓުޗެލް ވަނީ އައު ކޮށްފައި އެވެ. ޖަރުމަނުގެ ބަޔާން މިއުނިކް އަށް ޓުޗެލް އިރުޝާދު ދިންއިރު، ހާލަންޑު ވަނީ ޗެމްޕިއަންސް ލީގުގެ ދެ ލެގުގައި ވެސް ލަނޑު ޖަހައި ބަޔާން ކަޓުވާލައިފަ އެވެ.
މިފަހަރުގެ ވޯލްޑް ކަޕްގައި ހާލަންޑު މޮޅު ކުޅުމެއް ދައްކަމުން އަންނައިރު، ހަތަރު މެޗުގައި އޭނާ ވަނީ ހަތް ލަނޑު ޖަހައިފަ އެވެ. ނޯވޭ އިން މުބާރާތުގެ ގަދަ 16 ގައި ބްރެޒިލް ބަލި ކުރި މެޗުގައި ވެސް ހާާލަންޑު ވަނީ ދެ ލަނޑު ޖަހައިފަ އެވެ. އިންގްލެންޑު މެޗުގެ ކުރިން ހާލަންޑު ބުނެފައި ވަނީ ފޭވަރިޓުންނަކީ އިންގްލެންޑު ކަމަށާއި، ހުރިހާ ޕްރެޝަރެއް ވެސް އޮތީ އެ ޓީމަށް ކަމަށެވެ.
ނަމަވެސް، ޓުޗެލް ބުނީ ނޯވޭ އަކީ އާދައިގެ ޓީމެއް ނޫން ކަމަށެވެ. ޚާއްސަކޮށް ބްރެޒިލް ފަދަ ޤައުމެއް ބަލި ކުރުމަކީ، އެ ޓީމުގެ ފެންވަރު ސާބިތުވާ ކަމެއް ކަމަށް ވެސް އޭނާ ބުންޏެވެ.
މުބާރާތުގައި އިންގްލެންޑުން ދައްކަމުން އަންނަ ކުޅުމާ މެދު ސުވާލު ތަކެއް އުފެދިފައިވާ މި ދަނޑިވަޅުގައި ޓުޗެލް ބުނީ، އިންގްލެންޑުން އެ ޓީމުގެ ކުޅުން ރަނގަޅު ކުރަން ޖެހޭ ކަމަށެވެ. އޭނާ ބުނީ ބައެއް ޙާލަތް ތަކުގައި އިންގްލެންޑުގެ ކުޅުން ލަސްވާ ކަމަށެވެ. ކުއާޓާ ފައިނަލް އަށް ނިކުންނައިރު، ޓުޗެލް ބޭނުން ވަނީ ޕްރިމިއާ ލީގުގެ ފޯރި އިންގްލެންޑުން ފެންނާށެވެ.
މީގެ އިތުރުން ޓުޗެލް ބުނީ، އެމެރިކާގެ މިއާމީގެ ހޫނު މިން 34 ޑިގްރީ ސެލްސިއަސްގައި ހުރުމަކީ ވެސް ކުޅުންތެރިންނަށް ކުރިމަތި ވާނެ އިމްތިހާނެއް ކަމަށެވެ. ނަމަވެސް، ފްލޮރިޑާގައި ކުރިއަށް ގެންދިޔަ ތަމްރީނު ތަކުގެ ސަބަބުން ކުޅުންތެރިން ތިބީ ހޫނަށް ހޭނިފައި ކަމަށް ވެސް ޓުޗެލް ބުންޏެވެ.
ހާލަންޑު ހުއްޓުވާނެ ގޮތަކާ މެދު ސުވާލު ކުރުމުން ޓުޗެލް ބުނީ، އޭނާ އަކީ ހުރިިހާ ހަތިޔާރެއް ލިބިފައިވާ ކުޅުންތެރިޔެއް ކަމަށެވެ. ޑިފެންޑަރުން ހާލަންޑާ ކުރިމަތިލައިފި ނަމަ، އެ ޑިފެންޑަރުން ފަހަތަށް ޖައްސާލާފައި ވެސް ހާލަންޑު ލަނޑު ޖަހާ ކަމަށް އޭނާ ބުންޏެވެ. މި ހުރިހާ ކަމަކާ އެކު އިންގްލެންޑަށް ޕްރެޝަރު ބޮޑު މެޗެއް ކުރިމަތީގައި އޮތް ނަމަވެސް، ކުޅުންތެރިން ޖެހިލުންވެފައި ތިބި ކަމަށް ޤަބޫލު ނުކުރާ ކަމަށް ޓުޗެލް ވަނީ ބުނެފައި އެވެ.
މުބާރާތުގެ ކުއާޓާ ފައިނަލްގައި އިންގްލެންޑާއި ނޯވޭ ބައްދަލު ކުރާ މެޗު ފަށާނީ ހޮނިހިރު ދުވަހުގެ ރޭ ދަންވަރު ދޭއް ޖަހާއިރު އެވެ.
