ޕާކިސްތާންގެ ބޮޑު ވަޒީރު އީރާން އަށް ގޮވާލެއްވީ، ސުލްޙަ ދެމެހެއްޓުމަށް
11 ޖުލައި 2026 | ހޮނިހިރު 10:26އީރާންގެ ރައީސް މަސްއޫދު ޕެޒެޝްކިއާންއާ މަޝްވަރާ ކުރެއްވުމަށް ފަހު އެކްސްގައި ކުރެއްވި ޕޯސްޓެއްގައި ޕާކިސްތާންގެ ބޮޑު ވަޒީރު ޝަރީފް ވިދާޅުވީ، ސަރަހައްދީ ޙާލަތު ދަނީ ވަރަށް ބޮޑަށް ބަދަލުވަމުން ކަމަށް. އޭނާ ވިދާޅުވީ މިފަދަ ދަނޑިވަޅެއްގައި އެންމެ މުހިންމީ ހަރުދަނާކަމާ އެކު ކަންކަން ކުރިއަށް ގެންގޮސް، ވާހަކަ ދައްކައިގެން ޑިޕްލޮމަސީގެ މަގު ބޭނުން ކުރުން ކަމަށް.
ޕާކިސްތާންގެ ބޮޑު ވަޒީރު ޝެހްބާޒް ޝަރީފް އަދި އީރާންގެ ރައީސް މަސްއޫދު ޕެޒެޝްކިއާން. | ގެޓީ އިމޭޖަސް
އެމެރިކާ އާއި އީރާންއާ ދެމެދު އޮތް ހަނގުރާމަ ހުއްޓާލުމުގެ އެއްބަސްވުން ނާޒުކު ޙާލަތަކަށް ގޮސްފައިވާއިރު، ބުރަ މަސައްކަތުން ހޯދި ސުލްޙަ ދެމެހެއްޓުމަށް ޕާކިސްތާންގެ ބޮޑު ވަޒީރ ޝެހްބާޒް ޝަރީފް ގޮވާލައްވައިފި އެވެ.
އީރާންގެ ރައީސް މަސްއޫދު ޕެޒެޝްކިއާންއާ މަޝްވަރާ ކުރެއްވުމަށް ފަހު އެކްސްގައި ކުރެއްވި ޕޯސްޓެއްގައި ޕާކިސްތާންގެ ބޮޑު ވަޒީރު ޝަރީފް ވިދާޅުވީ، ސަރަހައްދީ ޙާލަތު ދަނީ ވަރަށް ބޮޑަށް ބަދަލުވަމުން ކަމަށެވެ. އޭނާ ވިދާޅުވީ މިފަދަ ދަނޑިވަޅެއްގައި އެންމެ މުހިންމީ ހަރުދަނާކަމާ އެކު ކަންކަން ކުރިއަށް ގެންގޮސް، ވާހަކަ ދައްކައިގެން ޑިޕްލޮމަސީގެ މަގު ބޭނުން ކުރުން ކަމަށެވެ.
އެއާ އެކު ޕާކިސްތާންގެ ބޮޑު ވަޒީރު ޝަރީފް ވިދާޅުވީ، މިކަންކަން ކުރަން ޖެހޭނީ މިހާރު ދުވަސް ކޮޅަކަށް ލިބިފައިވާ ސުލްޙައިގެ ފައިދާތައް ދެމެހެއްޓުމަށް ކަމަށެވެ. އިތުރަށް އޭނާ ވިދާޅުވީ ސަރަހައްދީ ސުލްޙަ ދާއިމީކޮށް ދެމެހެއްޓުމަށް ޕާކިސްތާން އިން ތައްޔާރަށް އޮތް ކަމަށާއި، އިޚުލާސްތެރި އަދި ހަގީގީ މެދުވެރިއެއްގެ ގޮތުގައި އެ ޤައުމު މަސައްކަތް ކުރާނެ ކަމަށެވެ.
ފާއިތުވި ދުވަސް ތަކުގައި އެމެރިކާ އާއި އީރާން އިން ވެސް ވަނީ، އެއް ބަޔަކު އަނެއް ބަޔަކަށް އަމާޒުކޮށް ހަމަލާ ތަކެއް ދީފައި އެވެ. އެކަމުގެ ސަބަބުން ދެ ޤައުމުގެ ދެ މެދުގައި އޮތް ނުތަނަވަސްކަން ބޮޑުވެފައިވާއިރު، ބައިނަލްއަޤުވާމީ މުޖުތަމައުން އަންނަނީ ކަންބޮޑުވުން ފާޅު ކުރަމުންނެ އެވެ.
އެމެރިކާ އާއި އީރާންއާ ދެމެދު ހަނގުރާމަ ހުއްޓާލުމުގެ ވަގުތީ އެއްބަސްވުމެއް އެކުލަވާލީ ޕާކިސްތާން މެދުވެރި ވެގެންނެވެ. ޕާކިސްތާން އިން އަދިވެސް އެދެނީ ދެ ޤައުމުން ސުލްޙަ އިސްކޮށް، މަޝްވަރާ ކުރުންތައް ކުރިއަށް ގެންގޮސް، ދާއިމީ ސުލްޙަވެރިކަން ހޯދުމަށެވެ. އެމެރިކާ އާއި އީރާންއާ ދެމެދު އޮތް ވަގުތީ އެއްބަސްވުމުގެ ދަށުން، 90 ދުވަހުގެ ތެރޭގައި ދާއިމީ އެއްބަސްވުމެއް ހޯދަން ޖެހެ އެވެ.
މަސްދަރު: އޭއެފްޕީ
