އުދުހެމުންދިޔަ މަތިންދާ ބޯޓެއްގެ ކުޑަދޮރެއް ނެއްޓުމުން ފަސިންޖަރަކު ބޯޓުން ބޭރަށް ދަމައިގަނެފި

ރަޔަންއެއާގެ ފްލައިޓެއްގެ ކުޑަދޮރެއް އުދުހެމުން ދަނިކޮށް ނެއްޓުމުގެ ސަބަބުން، އެ ދޮރު ކައިރީގައި އިން ފަސިންޖަރެއްގެ ހަށިގަނޑުގެ ދެބައިކުޅަ އެއްބައި ބޯޓުން ބޭރަށް ދަމައިގަނެފި އެވެ.

ޖަރުމަނުގެ މެމިންގެން އަށް ދަތުރުކުރި މި ބަޖެޓް އެއާލައިންގެ ފްލައިޓް ހުކުރު ދުވަހުގެ ހެނދުނު ގްރީސްގެ ތެސަލޮނީކީން ފުރިތާ މާގިނައިރުތަކެއް ނުވަނީސް ކުޑަދޮރެއް ހަލާކުވުމާ ގުޅިގެން، އަނބުރާ އެއާޕޯޓަށް ޖައްސަން ވަނީ މަޖުބޫރުވެފަ އެވެ.

ގްރީސްގެ ދައުލަތުގެ މީޑިއާ، އީ.އާރް.ޓީ އިން ރިޕޯޓްކޮށްފައިވާ ގޮތުގައި،  އެ ފަސިންޖަރު އިނީ ކުޑަދޮރު ކައިރީގަ އެވެ. ކުއްލިއަކަށް ދޮރު ނެއްޓުމާއެކު އޭނާގެ ބޯކޮޅުން ފެށިގެން ކޮނޑާ ހަމައަށް ބޯޓުން ބޭރަށް ދަމައިގަތް ނަމަވެސް، ބޯޓުގައި ތިބި އެހެން ފަސިންޖަރުން އޭނާ ހިފަހައްޓައި އިތުރަށް ބޭރަށް ދިޔަނުދީ ސަލާމަތްކުރި އެވެ.

ބައެއް ރިޕޯޓުތައް ބުނާ ގޮތުގައި ކުޑަދޮރު ނެއްޓުނީ އިންޖީނުން ނެއްޓުނު އެއްޗެއް ވިއްސައިގެން އައިސް ބޭރުން ކުޑަދޮރުގައި ޖެހުމާ އެކު ބިއްލޫރިގަނޑު ތަޅައިގެން ދިއުމުގެ ސަބަބުންނެވެ.

މި ހާދިސާއާ ގުޅިގެން ބޯޓު އަނބުރާ ތެސަލޮނީކީއަށް ޖެއްސުމަށްފަހު، ސިހުން ލިބިފައިވާ އެ ފަސިންޖަރަށް ވަނީ އެކި އަނިޔާތަކަށް ފަރުވާދީފަ އެވެ. ރަޔަންއެއާ އިން ނެރުނު ބަޔާނެއްގައި ބުނެފައިވަނީ، ބޯޓުގައި ތިބި އެހެން ފަސިންޖަރުން ފަހުން އެހެން ފްލައިޓެއްގައި އެމީހުންގެ މަންޒިލަށް ފޮނުވާލާފައިވާ ކަމަށެވެ.

އެ ވަގުތު ބޯޓުގައި އިން ފަސިންޖަރަކު ރޭޑިއޯ ތެސަލޮނީކީއަށް މައުލޫމާތު ދެމުން ބުނީ، އެމީހުން ތިބީ ހާދިސާ ހިނގި ތަނަށްވުރެ ތަންކޮޅެއް ފަހަތުގައި ކަމަށާއި، އިވުނީ ވަރަށް ބާރު އަޑެއް ކަމަށެވެ. އަދި އެއާއެކު އޮކްސިޖަން މާސްކްތައް ތިރިވި ކަމަށާއި، އަނިޔާވި މީހާގެ ހަށިގަނޑުން ލޭ އަންނަމުން ދިޔައިރު އޭނާ އޮތީ ހޭނެތިފައި ކަމަށްވެސް އެ ފަސިންޖަރު ބުންޏެވެ.

ފްލައިޓް ޓްރެކް ކުރާ ސައިޓެއް ކަމަށްވާ އެއާނޭވް ރާޑާގެ ތަފާސްހިސާބުތަކުން ދައްކާ ގޮތުގައި، އެފް.އާރް1879 ފްލައިޓް ފުރާފައިވަނީ އެ ގައުމުގެ ގަޑިން ހެނދުނު 05:57 ގައެވެ. އަދި ފުރިތާ އެއް ގަޑިއިރާއި 13 މިނެޓް ފަހުން ބޯޓު ވަނީ އަނބުރާ އެއާޕޯޓަށް ޖައްސާފަ އެވެ. އެ ސައިޓުގެ މައުލޫމާތުތަކުން އެނގޭ ގޮތުގައި، މިއީ 18 އަހަރުވީ ބޮއިންގް 737-8 އޭ.އެސް މަރުކާގެ ބޯޓެކެވެ. އަދި ބޯޓު އަނބުރާލާފައިވަނީ 16،000 ފޫޓު މަތިން އުދުހެމުން ދަނިކޮށެވެ.

ރަޔަންއެއާ އިން މީޑިއާ ތަކަށް ދިން ބަޔާނެއްގައި މި ހާދިސާ ކަށަވަރުކޮށްދެމުން ބުނީ، ޖުލައި 10 ވީ ހުކުރު ދުވަހުގެ ހެނދުނު ތެސަލޮނީކީން މެމިންގެންއަށް ދަތުރުކުރި ފްލައިޓް އަނބުރާ ޖައްސަން ޖެހުނީ، އުދުހެމުން ދަނިކޮށް ފަސިންޖަރަކު އިން ދިމާލުން ކުޑަދޮރެއް ނެއްޓުމާ ގުޅިގެން ކަމަށެވެ. ބޯޓު އާންމު ހާލަތުގައި ރަންވޭއަށް ޖެއްސުމާއެކު ފަސިންޖަރުން ވަނީ ޓާމިނަލަށް ގެންގޮސްފަ އެވެ.

އެ އެއާލައިނުން އިތުރަށް ބުނީ، އެއް ފަސިންޖަރަކު ބޭސްފަރުވާއަށް އެދުމުން ތެސަލޮނީކީ އެއާޕޯޓުގައި އޭނާއަށް ފަރުވާ ދީފައިވާ ކަމަށެވެ. އަދި ދަތުރު ލަސްވުން ކުޑަކުރުމަށްޓަކައި، އެހެން ބޯޓެއް ހަމަޖައްސައި، އެ ގައުމުގެ ގަޑިން ހެނދުނު 09:53 ގައި ފަސިންޖަރުން މެމިންގެންއަށް ފޮނުވާލާފައިވާ ކަމަށްވެސް ރަޔަންއެއާ އިން ބުންޏެވެ.

ތެސަލޮނީކީ އެއާޕޯޓް ހިންގާ ފްރަޕޯޓް ގްރީސް އިން ނެރުނު ބަޔާނެއްގައި ބުނެފައިވަނީ، މި ހާދިސާ މިހާރު ތަހުގީގު ކުރަން ފަށާފައިވާ ކަމަށެވެ. މި މައްސަލަ ތަހުގީގު ކުރަމުންދަނީ ގްރީސްގެ އޭވިއޭޝަން ކަންކަން ބަލަހައްޓާ ހެލެނިކް އެއާ އެންޑް ރެއިލް ސޭފްޓީ އިންވެސްޓިގޭޝަން އޮތޯރިޓީ (ހާސިއާ) އިންނެވެ.