ތާރީޚީ ދަތުރުފުޅެއްގައި މެކްރޮން ސީރިއާ އަށް ވަޑައިގެންފި

ފްރާންސްގެ ރައީސް އިމަނުއެލް މެކްރޮން، ސީރިއާ އަށް ކުރައްވާ ރަސްމީ ދަތުރުފުޅެއްގައި އެ ޤައުމަށް ވަޑައިގެންފި އެވެ. 

މިއީ 2024 ވަނަ އަހަރުގެ ތެރޭގައި ސީރިއާގެ ކުރީގެ ރައީސް ބައްޝާރުލް އައްސަދު ވެރިކަމުން ވައްޓާލި ފަހުން، ޔޫރަޕުގެ ޤައުމެއްގެ އިސްވެރިޔަކު ސީރިއާ އަށް ކުރައްވާ ފުރަތަމަ ދަތުރުފުޅެވެ.

ހޯމަ ދުވަހުގެ ރޭ މެކްރޮން ސީރިއާ އަށް ވަޑައިގެންނެވިއިރު، ދިމިޝްގުގެ ބައިނަލްއަޤުވާމީ ވައިގެ ބަނދަރުން އޭނާ އަށް މަރުޙަބާ ދެންނެވީ ސީރިއާގެ ފޮރިން މިނިސްޓަރު އަސަދު ޙަސަން އަލް ޝައިބާނީ އެވެ. މި ދަތުރުފުޅުގެ ތެރެއިން، ސީރިއާގެ ރައީސް އަޙުމަދު އަލް ޝަރާއާ ވެސް މެކްރޮން ބައްދަލު ކުރައްވާނެ އެވެ. 

މި ދަތުރުފުޅާ ގުޅޭ ގޮތުން އެކްސްގައި ކުރެއްވި ޕޯސްޓެއްގައި މެކްރޮން ވިދާޅުވީ، އޭނާ ސީރިއާ އަށް ވަޑައިގަތީ ސީރިއާގެ ރައްޔިތުންނަށް ފްރާންސް އިން ދޭ އެއްބާރުލުން ހާމަ ކޮށްދިނުމަށް ކަމަށެވެ. އަދި ސީރިއާ އަކީ މިނިވަން، މުސްތަގިއްލު، އަދި އަވަށްޓެރި ގައުމުތަކާ އެކު ސުލްހަވެރިކަމާ އެކު އޮންނަ ގައުމަކަށް ހެދުމަށް އެދިވަޑައިގަންނަވާ ކަމަށާއި، ސަރަހައްދީ ހަމަޖެހުމާއި ސުލްހައިގެ އައު ބާބެއް ފެށުމަށް ގޮވާލައްވާ ކަމަށް ވެސް މެކްރޮން ވިދާޅުވި އެވެ.

ސީރިއާގެ ދައުލަތުގެ މީޑިއާ، ސަނާ ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި މެކްރޮންގެ އަރިހުގައި ފްރާންސްގެ ވިޔަފާރިވެރިންގެ ޓީމެއް ވެސް ބައިވެރިވެ އެވެ. މި ޓީމުގެ މައިގަނޑު މަގުސަދަކީ ސަރަހައްދީ ސަލާމަތީ ކަންކަމުގެ އިތުރުން، ސީރިއާގައި ހުރި އިންވެސްޓްމަންޓުގެ ފުރުސަތުތަކާ ގުޅޭ ގޮތުން މަޝްވަރާ ކުރުމެވެ. 

ތުރުކީގައި އޮންނަ ނޭޓޯ ސަމިޓުގައި ބައިވެރިވެ ވަޑައިގެންނެވުމަށް މެކްރޮން އެ ޤައުމަށް ވަޑައިގަންނަވާނީ އަންގާރަ ދުވަހުގެ ވަގުތެއްގައި އެވެ. އެ ސަމިޓުގައި ބައިވެރިވެ ވަޑައިގެންނެވުމަށް ސީރިއާގެ ރައީސް އަލް ޝަރާ ވެސް ތުރުކީ އަށް ވަޑައިގަންނަވާނެ އެވެ. މި ސަމިޓުގެ ތެރެއިން އަލް ޝަރާ އާއި، އެމެރިކާގެ ރައީސް ޑޮނަލްޑް ޓްރަމްޕް ވެސް ބައްދަލު ކުރައްވާނެ އެވެ. 

މީގެ ކުރިން 2025 ވަނަ އަހަރު އަލް ޝަރާ ވަނީ ފްރާންސް އަށް ވަޑައިގެން، މެކްރޮންއާ ބައްދަލު ކުރައްވައިފަ އެވެ. އެ ދުވަސްވަރު މެކްރޮން ވަނީ، ސީރިއާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވާލުމަށް ޔޫރަޕުގެ ޤައުމު ތަކާއި، އެމެރިކާ އަށް ބާރު އަޅުއްވައިފަ އެވެ. އޭގެ ފަހުން ގިނަ ފިޔަވަޅު ތަކެއް ވަނީ އުވާލައިފަ އެވެ.