ހަމާސްގެ ކަނޑުގެ ބާރު ތަކުގެ ކޮމާންޑަރު ޝަހީދު ކޮށްލާފައިވާ ކަމަށް އިޒްރޭލް އިން އިއުލާން ކޮށްފި
އިޒްރޭލް އިން ބުނެފައި ވަނީ ހުކުރު ދުވަހު ޣައްޒާގެ މެދު ތެރޭގެ ސަރަހައްދަކަށް ދިން ވައިގެ ހަމަލާއެއްގައި ޝަހްތޫތުގެ އިތުރުން، ހަމާސްގެ އިތުރު ދެ ހަނގުރާމަވެރިޔަކު ވެސް މަރުވެފައިވާ ކަމަށް.
ޣައްޒާގައި އިޒްރޭލް އިން ހިންގަމުން ގެންދާ ހަނގުރާމައިގެ ތެރެއިން. | ރޮއިޓާސް
ހަމާސްގެ ކަނދުގެ ބާރު ތަކުގެ ކޮމާންޑަރެއް ކަމަށްވާ މަންސޫރު ސާމީ މަހްމޫދު ޝަހްތޫތު ޝަހީދު ކޮށްލާފައިވާ ކަމަށް، އިޒްރޭލްގެ އަސްކަރިއްޔާ އިން ބުނެފި އެވެ.
އިޒްރޭލް އިން ބުނެފައި ވަނީ ހުކުރު ދުވަހު ޣައްޒާގެ މެދު ތެރޭގެ ސަރަހައްދަކަށް ދިން ވައިގެ ހަމަލާއެއްގައި ޝަހްތޫތުގެ އިތުރުން، ހަމާސްގެ އިތުރު ދެ ހަނގުރާމަވެރިޔަކު ވެސް މަރުވެފައިވާ ކަމަށެވެ.
އިޒްރޭލްގެ އަސްކަރިއްޔާ އިން ނެރުނު ބަޔާނެއްގައި ބުނެފައި ވަނީ، މި ތިން މީހުން މަރާލާފައި ވަނީ ހަތިޔާރާ އެކު އުޅަނދެއްގައި ދަތުރު ކުރަމުން ދަނިކޮށެވެ. އަދި އެ ވަގުތު އެ މީހުން ތިބީ އިޒްރޭލްގެ ސިފައިންނަށް ނުރައްކާވާ ފަދަ ޙާލަތެއްގައި ކަމަށް ވެސް އެ ބަޔާނުގައި ފާހަގަ ކޮށްފައިވެ އެވެ.
ޝަހްތޫތު އަކީ ހަމާސްގެ އަސްކަރީ ކޮމާންޑެއް ކަމަށްވާ އިއްޒުއްދީން އަލް-ގައްސާމް ބްރިގޭޑްސްގެ ދަށުން ހިންގާ ކަނޑުގެ ބާރު ތަކުގައި އިސް ދައުރެއް އަދާ ކުރަމުން ދިޔަ މީހެއް ކަމަށް އިޒްރޭލް އިން ބުނެފައިވެ އެވެ. މި ބާރުތަކަކީ ޣައްޒާގައި ހަރަކާތްތެރިވާ އިޒްރޭލްގެ އިސްތިއުމާރީ ސިފައިންނާއި، އިޒްރޭލްގެ ސަރަހައްދު ތަކަށް އަމާޒު ކޮށްދޭ ހަމަލާތައް ރާވައި ހިންގުމުގައި އިސްކޮށް އުޅޭ ފަރާތް ތަކެއް ކަމަށް ވެސް އިޒްރޭލް އިން ބުނެފައިވެ އެވެ.
މި ހަމަލާއާ ގުޅޭ ގޮތުން ހަމާސް އިން މިހާތަނަށް ވަކި އެއްޗެއް ބުނެފައި ނުވެ އެވެ. އިޒްރޭލް އިން ޣައްޒާ އަށް ދެމުންދާ ހަމަލާތައް ވަރުގަދަ ކޮށްފައިވާ މި ދަނޑިވަޅުގައި، ހަމާސްގެ އިސް ކޮމާންޑަރުންނަށް އަމާޒުކޮށް އިޒްރޭލް އިން ގެންދަނީ ސިލްސިލާ ގޮތެއްގައި ހަމަލާތައް ދެމުންނެވެ.
އިޒްރޭލް އިން ޣައްޒާގެ އެކި ސަރަހައްދު ތަކަށް ދެމުންދާ ހަމަލާ ތަކުގައި މިހާތަނަށް އެތައް ހާސް ބަޔަކު ވަނީ ޝަހީދު ކޮށްލައިފަ އެވެ.
މަސްދަރު: އަލް ޖަޒީރާ
