ސުލްހައިގެ އެއްބަސްވުމަށްފަހު ޣައްޒާ ގައި ޝަހީދުކޮށްލި މީހުންގެ އަދަދު 1،000 އަށްވުރެ މައްޗަށް

އިސްރާއީލާއި ހަމާސްއާ ދެމެދު އެމެރިކާ މެދުވެރިވެގެން މިދިޔަ އޮކްޓޫބަރު މަހު އެއްބަސްވި "ސުލްހައިގެ އެއްބަސްވުމަށް" ފަހު ވެސް، ޣައްޒާ ގައި ޝަހީދުވި މީހުންގެ އަދަދު 1،000 އަށްވުރެ މައްޗަށް އަރައިފިއެވެ. އަދި އިސްރާއީލުން ބަންދުކޮށްފައިވާ ޣައްޒާގެ އިންސާނީ ހާލަތު އަދިވެސް އޮތީ ނުހަނު ނުރައްކާތެރި ފައްތަރެއްގައެވެ.

ފަލަސްތީނުގެ ހެލްތު މިނިސްޓްރީން ބުދަ ދުވަހު ހާމަކުރި ގޮތުގައި، ސުލްހައިގެ އެއްބަސްވުމަށް އައި ފަހުން އިސްރާއީލުން ޣައްޒާގެ އެކި ސަރަހައްދުތަކަށް ދިން ހަމަލާތަކުގައި 1،005 ފަލަސްތީނު ރައްޔިތުން ވަނީ ޝަހީދުވެފައެވެ. މެޑިކަލް އެއިޑް ފޯ ޕަލަސްޓީނިއަންސްގެ ޣައްޒާ ޑައިރެކްޓަރު ފިކްރް ޝަލްތޫތު ވިދާޅުވީ، ޣައްޒާގެ ހާލަތު މިހާ ހިތާމަވެރި މިންވަރަކަށް ދިއުމުން އެކަމާ ހިތާމަކުރާ ކަމަށާއި، އެންމެ ނުރައްކާތެރި ދުވަސްތައް ފާއިތުވެއްޖެ ކަމަށް ބުނެ އުންމީދު ދީފައިވާ އެތައް ހާސް ބަޔަކު އަދިވެސް ދަނީ އެމީހުންގެ އާއިލާގެ މެންބަރުން ވަޅުލަމުން ކަމަށެވެ.

މި "ސުލްހައިގެ އެއްބަސްވުމުގެ" ސަބަބުން ބޮޑެތި ކުރިމަތިލުންތައް ހުއްޓިފައި އޮތް ނަމަވެސް، އެއްބަސްވުމުގެ ދެވަނަ މަރުހަލާ ތަންފީޒު ކުރުމަށް އަދިވެސް އެއްބަސްވުމަކަށް އާދެވިފައެއް ނުވެއެވެ. މި މަރުހަލާއަކީ ޣައްޒާއިން އިސްރާއީލު ސިފައިން ފޭބުމާއި ހަމާސްގެ ހަތިޔާރު އަތުލުމާ ގުޅޭ އެންމެ ނާޒުކު މަރުހަލާއެވެ.

އޮކްޓޫބަރު މަހުން ފެށިގެން އިސްރާއީލުން ވަނީ ފަލަސްތީނުގެ ބިންތަކުގައި އެގައުމުގެ ބާރު އިތުރަށް ވަރުގަދަކޮށްފައެވެ. އެގޮތުން ކުރިން އެއްބަސްވުމުގައި ކަނޑައަޅާފައިވާ 53 އިންސައްތައިގެ ބަދަލުގައި، މިހާރު ޣައްޒާގެ 64 އިންސައްތަ ބިން އޮތީ އިސްރާއީލުގެ ކޮންޓްރޯލްގެ ދަށުގައެވެ.

އިސްރާއީލު ސިފައިން "ޔެލޯ ލައިން" ހުޅަނގަށް އިތުރަށް ފުޅާކުރުމުގެ ނިޝާނެއްގެ ގޮތުން ރީނދޫ ކުލައިގެ ސިމެންތި ގައުތަކެއް ޖެހުމާ ގުޅިގެން، މިދިޔަ ހުކުރު ދުވަހު ޣައްޒާ ސިޓީގެ އިރުމަތީ ސަރަހައްދުތަކުގައި ދިރިއުޅޭ އެތައް އާއިލާއަކަށް ވަނީ އެ ސަރަހައްދު ދޫކޮށް ދާން މަޖުބޫރުވެފައެވެ. މިކަން ހާމަކޮށްފައިވަނީ އދ. ގެ އޮފީސް ފޯ ދަ ކޯޑިނޭޝަން އޮފް ހިއުމަނިޓޭރިއަން އެފެއާޒް (އޯޗާ) އިންނެވެ.

މި މަހުގެ ކުރީކޮޅު ހަމާސްގެ ސިޔާސީ ގޮފީގެ މެންބަރު ހުސާމް ބަދްރާން އަލްޖަޒީރާއަށް ދެއްވި އިންޓަވިއުއެއްގައި ވިދާޅުވީ، އެ ޖަމާއަތުގެ ހަތިޔާރުތައް އަދި ހަވާލުނުކުރާނެ ކަމަށެވެ. އަދި ހަތިޔާރުތަކާ މެދު ގޮތެއް ނިންމާނީ ފަލަސްތީނުގެ އެހެން ފެކްޝަންތަކާއެކު ބާއްވާ ފުޅާ ދާއިރާއެއްގެ މަޝްވަރާތަކަށް ފަހު ކަމަށް އޭނާ ވިދާޅުވިއެވެ.

މި "ސުލްހައިގެ އެއްބަސްވުމުގެ" މަގްސަދަކީ ޣައްޒާ އަލުން ބިނާކުރުމާއި އެ ސަރަހައްދުގެ ސިއްހީ ނިޒާމު ރަނގަޅު ކުރުމުގެ ފުރުސަތު ހޯދައިދިނުން ކަމަށް ވީ ނަމަވެސް، އެކަން އެގޮތަކަށް ނުދެއެވެ.

އޯޗާގެ ތަފާސްހިސާބުތަކުން ދައްކާ ގޮތުގައި، ޣައްޒާގައި ހުރި 37 ހޮސްޕިޓަލުގެ ތެރެއިން މިހާރު ބޭނުންކުރެވެނީ އެންމެ 20 ހޮސްޕިޓަލެވެ. އަދި އޭގެ ތެރެއިން އެއްވެސް ހޮސްޕިޓަލަކީ ފުރިހަމަ ހިދުމަތް ދެވޭ ފެންވަރުގައި ހުރި ތަންތަނެއް ނޫނެވެ.

"ބޮން އެޅުން މެދުނުކެނޑި ކުރިއަށްދާއިރު އަދި ޣައްޒާ އެއްކޮށް ބަންދުކޮށްފައި އޮތްއިރު، ދުނިޔޭގެ ލީޑަރުން ގަބޫލުކުރީ ހަމައެކަނި ކަރުދާސްގަނޑެއްގައި ސޮއިކޮށްލުމުން ޒިންމާދާރުކުރުވުމާއި، ބަންދުކޮށްފައިވާ ބަންދު ހުޅުވުމާއި، ބޭނުންޖެހިފައިވާ މީހުންނަށް ބޭސް ފޯރުކޮށްދިނުން ފަދަ ކަންކަން ހައްލުވާނެ ކަމަށް،" ޝަލްތޫތު ވިދާޅުވިއެވެ.

"މިހާރު ވެސް ޣައްޒާއަށް ވަދެނިކުމެވޭ މަގުތައް ވަނީ ވަރަށް ބޮޑަށް ހަނިކޮށްފައި. އަދި ބަނޑަށްޖެހިފައިވާ ރައްޔިތުންނާ ދެކޮޅަށް އެހީގެ ސާމާނު ހަތިޔާރެއްގެ ގޮތުގައި ބޭނުންކުރަމުންދާއިރު ވެސް، ދުނިޔޭގެ ލީޑަރުން ތިއްބެވީ ހަނު،" އޭނާ އިތުރަށް ވިދާޅުވިއެވެ.

އޮކްޓޫބަރު 23 ގައި އިސްރާއީލުން ޣައްޒާގައި ފެށި ނަސްލު ނައްތާލުމުގެ ހަނގުރާމައިގައި މިހާތަނަށް 73،000 އަށްވުރެ ގިނަ މީހުން ވަނީ ޝަހީދުވެފައެވެ. ޣައްޒާގެ ބޮޑު ބައެއް ސުންނާފަތިވެފައިވާއިރު، ގާތްގަނޑަކަށް 1.9 މިލިއަން މީހުން ވަނީ ގެދޮރު ދޫކޮށް ހާލުގައި ޖެހިފައެވެ.