ހުޅުދޫ ގައި ހުމާއި އިންފުލުއެންޒާގެ ކޭސްތައް އިތުރުވަނީ!
މުޅި މުޖުތަމައުގެ ރައްކާތެރި ކަމަށް ފަރުދީ ގޮތުން ސަމާލުކަން ދިނުމަކީ ކޮންމެ މީހެއްގެ ވެސް ޒިންމާއެއް ކަމަށް ކައުންސިލުން ބުނޭ.
އައްޑޫ ހުޅުދޫ - ހުޅުދޫ އަކީ މިހާރު ވަކި ކައުންސިލެއް އޮންނަ ރަށެއް | އައްޑޫ ހުޅުދޫ ކައުންސިލް
އައްޑޫ ސިޓީގެ ހުޅުދޫގައި މި ދުވަސްވަރު ވައިރަލް ހުމާއި އިންފުލުއެންޒާ ބާރަށް ފެތުރެމުންދާތީ އެކަމަށް އާންމު ރައްޔިތުން ސަމާލުވާން ހުޅުދޫ ކައުންސިލުން އިލްތިމާސްކޮށްފި އެވެ.
ކައުންސިލުން އާދިއްތަ ދުވަހު ނެރުނު އެންގުމެއްގައި ބުނީ ހުމާއި އިންފުލުއެންޒާ ހުޅުދޫގައި ވަރަށް ހަލުވިކޮށް ފެތެރެމުންދާ ކަމަށާއި މުޅި މުޖުތަމައުގެ ރައްކާތެރިކަމަށް ފަރުދީ ގޮތުން ސަމާލުކަން ދިނުމަކީ ކޮންމެ މީހެއްގެ ވެސް ޒިންމާއެއް ކަމަށް ބުނެފައި ވެއެވެ.
ހުޅުދޫ ކައުންސިލުން ބުނީ ވަކިން ހާއްސަކޮށް ކުޑަކުދިންނާއި މާބަނޑު މީހުންނާއި އުމުރުން ދުވަސްވީ މީހުންގެ އިތުރަށް ދިގު މުއްދަތަކަށް ބޭސް ބޭނުން ކުރާ މީހުންނަކީ މިފަދަ ބަލިތަކުގެ ނުރައްކާ ބޮޑު ބަޔަކަށްވާތީ ރައްކާތެރިކަމުގެ ފިޔަވަޅު އެޅުމަކީ ކައުންސިލްގެ ވަރަށް ބޮޑު އެދުމެއް ކަމަށެވެ.
އައްޑޫ ސިޓީގެ ގުޅިފައިވާ ރަށްތަކުގައި ޑެންގޫ ކޭސްތައް ދަނީ އިތުރުވަމުންނެވެ. އެހެންކަމުން އަވަށްތަކުގެ އޮފީސްތަކުން ވަނީ ރަށު ތެރޭގައި ހުރި ގޯތިތައް ސާފު ކުރުމަށް އިލްތިމާސްކޮށްފަ އެވެ.
އައްޑޫ ސިޓީ ކައުންސިލްގެ ދަށުން މީގެ ކުރިން އޮތް ހުޅުދޫ އަކީ މިހާރު ވަކި ކައުންސިލްއެއް އޮންނަ ޤާނޫނީ ޝަހުސެކެވެ.
