މެމްބަރެއްގެ ގޮތުގައި ސްޓާމާ ދެމި ހުންނަވާނެ، ބާންހަމްގެ ކެބިނެޓުން މަޤާމެއް ދޭން އުޅޭ ކަމުގެ އަޑު ތަކެއް!

އިނގިރޭސިވިލާތުގެ ބޮޑު ވަޒީރުގެ މަޤާމުން އިސްތިއުފާ ދެއްވި ނަމަވެސް، ޤާނޫނު ހަދާ މަޖިލީހުގެ މެމްބަރެއްގެ ގޮތުގައި ކިއާ ސްޓާމާ ދެމި ހުންނަވާނެ ކަމަށް ޑައުނިން ސްޓްރީޓް އިން ހާމަ ކޮށްފި އެވެ. 

އިނގިރޭސިވިލާތުގެ ބޮޑު ވަޒީރު ކަމަށް ވަޑައިގަންވަނެ ކަމަށް ބެލެވޭ އެންޑީ ބާންހަމްގެ އަރިސް ބޭފުޅުން ވިދާޅުވެފައި ވަނީ، އޭނާގެ ކެބިނެޓުން ސްޓާމާ އަށް ޖާގަ ދެއްވުމަކީ އެކަށީގެންވާ ކަމެއް ކަމަށެވެ. އެގޮތުން ފޮރިން ސެކްރެޓަރީގެ މަޤާމު ސްޓާމާ އަށް ދެއްވުމުގެ ފުރުސަތު އޮތް ކަމަށް ބައެއް ފަރާތް ތަކުން ވިދާޅުވެފައިވެ އެވެ. 

އެކަމާ ގުޅޭ ގޮތުން ސްޓާމާގެ ތަރުޖަމާނު ވިދާޅުވެފައި ވަނީ، ޤާނޫނު ހަދާ މަޖިލީހުގެ މެމްބަރެއްގެ ގޮތުގައި ދެމި ހުންނަވައި، ލޭބާ ޕާޓީގެ މެމްބަރެއްގެ ގޮތުގައި ދެމި ހުންނަވަން ސްޓާމާ ނިންމަވާފައިވާ ކަމަށެވެ. ނަމަވެސް، ބާންހަމްގެ ކެބިނެޓުން މަޤާމެއް ހުށަހެޅުއްވި ނަމަވެސް. އެކަން ޤަބޫލު ކުރުމުގެ ވިސްނުމެއް މިވަގުތު ސްޓާމާގެ ނެތް ކަމަށް ވެސް ތަރުޖަމާނު ވަނީ ވިދާޅުވެފައި އެވެ. 

ކެބިނެޓުގެ މަޤާމެއް ބާންހަމް ހުށަހަޅުއްވާ ހިނދެއްގައި، ސްޓާާމާ އެކަން ޤަބޫލު ކުރައްވާނެތޯ ސުވާލު ކުރުމުން ތަރުޖަމާނު ވިދާޅުވީ، އޭނާގެ ދައުރު ނިމިފައިވާ ކަމަށް ސްޓާމާ، ކެބިނެޓުގެ މެމްބަރުންނަށް އަންގަވާފައިވާ ކަމަށެވެ. ނަމަވެސް، ކެބިނެޓު މެމްބަރުންގެ ދައުރު ނިމުނީ ނޫން ކަމަށް ވެސް ސްޓާމާ ވިދާޅުވެފައިވެ އެވެ. 

ޤާނޫނު ހަދާ މަޖިލީހުގެ މެމްބަރު ކަމަށް ސްޓާމާ އިންތިޚާބު ކޮށްފައި ވަނީ އެ ދާއިރާގެ ބޮޑު އަޣުލަބިއްޔަތަކުންނެވެ. އެ މަޤާމުން ސްޓާމާ އިސްތިއުފާ ދެއްވައިފި ނަމަ، އެއީ ގްރީން ޕާޓީ އަށް އެ ގޮނޑި ކާމިޔާބު ކުރުމަށް ލިބޭ ވަރަށް ބޮޑު ފުރުސަތަކަށް ވާނެ އެވެ. 

ބުދަ ދުވަހު ބޭއްވުނު ބޮޑު ވަޒީރުގެ ސުވާލު ތަކުގެ ޖަލްސާގައި ވާހަކަ ދައްކަވަމުން ސްޓާމާ ވިދާޅުވީ، ހަފްތާއަކު އެއްފަހަރު ބޭއްވޭ މި ޖަލްސާތަކުގެ މަތިން އޭނާ ވަރަށް ހަނދާން ވާނެ ކަމަށެވެ. އަދި އެކި ދާއިރާ ތަކުން ޤާނޫނު ހަދާ މަޖިލީހަށް ވަޑައިގެން ތިއްބެވި ލޭބާ ޕާޓީގެ މެމްބަރުންނާ މެދު ވަރަށް ބޮޑަށް ފަޚުރުވެރިވެ ވަޑައިގަންނަވާ ކަމަށް ވެސް ސްޓާމާ ވިދާޅުވި އެވެ. 

ސްޓާމާ އާއި ބާންހަމް ވަނީ އަންގާރަ ދުވަހުގެ ވަގުތެއްގައި ބައްދަލު ކުރައްވައިފަ އެވެ. މިއީ ބައި އިލެކްޝަން ކާމިޔާބު ކުރައްވައި، ބާންހަމް މެމްބަރު ކަމުގެ ހުވާ ކުރެއްވި ފަހުން ދެ ބޭފުޅުން ބައްދަލު ކުރެއްވި ފުރަަތަމަ ފަހަރެވެ. އެކި އެކި މީޑިއާ ތަކުން ބުނެފައި ވަނީ، މި ބައްދަލުވުން ބާއްވާފައި ވަނީ ޑައުނިން ސްޓްރީޓް އިން ބޭރުގައި ކަމަށެވެ.