10 އަހަރުގެ ތެރޭގައި އިނގިރޭސިވިލާތަށް ހަތް ވަނަ ބޮޑު ވަޒީރެއް، ޓައިމްލައިން ހާމަ ކޮށްްފި

އިނގިރޭސިވިލާތުގެ ބޮޑު ވަޒީރުގެ މަގާމު އަދި ވެރިކަން ކުރާ ލޭބާ ޕާޓީގެ ލީޑަރުގެ މަގާމުން އިސްތިއުފާ ދެއްވަން ކިއާ ސްޓާމާ ނިންމެވުމާ އެކު، އިނގިރޭސިވިލާތުގައި ދެން އައްޔަން ކުރައްވާ ބޮޑު ވަޒީރު ވާނީ 10 އަހަރުގެ ތެރޭގައި އެ މަގާމަށް ވަޑައިގަންނަވާ ހަތް ވަނަ ބޮޑު ވަޒީރަށެވެ.

ވެރިކަން ކުރާ ލޭބާ ޕާޓީގެ ލީޑަރުގެ މަގާމަށް ކުރިމަތިލުމުގެ ފުރުސަތު އަންނަ ޖުލައި މަހުގެ ނުވަ ވަނަ ދުވަހު ހުޅުވައިލާނެ އެވެ. އެ ޓައިމްލައިން މިހާރު ހާމަ ކޮށްފައިވާއިރު، ލީޑަރުގެ މަގާމަށް ކުރިމަތިލުމުގެ ފުރުސަތު ހަމަވާނީ ޖުލައި މަހުގެ 16 ވަނަ ދުވަހު އެވެ. 

ބޮޑު ވަޒީރުގެ މަގާމަށް ޤާނޫނު ހަދާ މަޖިލީހުގެ މޭކާފީލްޑުގެ މެމްބަރު އެންޑީ ބާންހަމް އެކަނި ކުރިމަތި ލައްވައިފި ނަމަ، ޖުލައި މަހުގެ 18 ވަނަ ދުވަހު އޭނާ ބޮޑު ވަޒީރުގެ މަގާމަށް އައްޔަން ކުރައްވާނެ ކަމަށް ލޭބާ ޕާޓީގެ މެމްބަރުން ބުނެ އެވެ. މިއީ ވަރަށް އަވަހަށް ލީޑަރު ބަދަލު ކުރުމުގެ ފުރުސަތަކަށް ވާނެ އެވެ. 

ނަމަވެސް، ބާންހަމްއާ ދެކޮޅަށް އެހެން ކެންޑިޑޭޓަކު ނިކުންނަވައިފި ނަމަ، އިންތިޚާބެއް ބާއްވަން ޖެހޭނެ އެވެ. އެއް ކެންޑިޑޭޓަކަށް ވުރެ އިތުރަށް ވާދަ ކުރައްވާ ނަމަ، އައު ބޮޑު ވަޒީރަކު އައްޔަން ކުރުން ސެޕްޓެމްބަރު މަހުގެ ފުރަތަމަ ދުވަހަށް ލަސް ވެގެން ދާނެ އެވެ. 

ބާންހަމް އަކީ ލޭބާ ޕާޓީގެ މެމްބަރުންގެ މެދުގައި ވަރަށް މަޤުބޫލު ބޭފުޅެކެވެ. ލޭބާ ޕާޓީގެ ލީޑަރުގެ މަގާމަށް އަދި ބޮޑު ވަޒީރުގެ މަގާމަށް އޭނާ ގެނައުމަށް ވެސް އެތައް މެމްބަރުންނެއް ވަނީ ތާއީދު ކޮށްފައި އެވެ. 

ސްޓާމާ އަށް ފަހު ދެން ވަޑައިގަންނަވާ ބޮޑު ވަޒީރު ވެގެން ދާނީ، ފާއިތުވި 10 އަހަރުގެ ތެރޭގައި އިނގިރޭސިވިލާތުގައި ވެރިކަން ކުރައްވާނެ ހަތް ވަނަ ބޮޑު ވަޒީރަށެވެ. އެގޮތުން 2016 ވަނަ އަހަރު ޑޭވިޑް ކެމަރޫން އަށް ފަހު، ތެރަސާ މޭ އާއި، ބޮރިސް ޖޮންސަން އާއި، ލިޒް ޓްރަމްސް އަދި ރިޝީ ސުނާކް އަދި ސްޓާމާ ވަނީ އިނގިރޭސިވިލާތުގެ ބޮޑު ވަޒީރުކަން ކުރައްވައިފަ އެވެ.