ބޮޑު ވަޒީރުގެ ރޭހަށް ނުނިކުންނަވާ، ސްޓްރީޓިންގެ ތާއީދު ބާންހަމް އަށް

އިނގިރޭސިވިލާތުގެ ލޭބާ ޕާޓީގެ ލީޑަރު ކަމަށް އަދި ބޮޑު ވަޒީރުގެ މަގާމަށް ވާދަ ކުރައްވާނެ ކަމަށް ބެލެވުނު ސްޓްރީޓިން، މަގާމަށް ވާދަ ކުރެއްވުމުގެ ބަދަލުގައި އެންޑީ ބާންހަމް އަށް ތާއީދު ކުރަން ނިންމާފައިވާ ކަމަށް އިއުލާން ކުރައްވައިފި އެވެ. 

މިއާ އެކު، އަންނަ ޖުލައި މަހުގެ ތެރޭގައި އިނގިރޭސިވިލާތުގެ ބޮޑު ވަޒީރުގެ މަގާމަށް ވަޑައިގަންނަވާނީ މޭކާފީލްޑު ދާއިރާ ތަމްސީލު ކުރައްވާ އަދި ގްރޭޓަރ މެންޗެސްޓަރގެ ކުރީގެ މޭޔަރު ބާންހަމް ކަމަށް މިހާރު ވަނީ ވަރަށް ބޮޑަށް ބެލެވިފައި އެވެ. 

މިދިޔަ ހަފުތާގައި ބޭއްވި މޭކާފީލްޑް ބައި އިލެކްޝަން ކާމިޔާބު ކުރެއްވުމަށް ފަހު، ހޯމަ ދުވަހުގެ ވަގުތެއްގައި ބާންހަމް ވަނީ މެންބަރުކަމުގެ ހުވާ ކުރައްވައިފަ އެވެ. އެކްސްގައި ކުރެއްވި ޕޯސްޓެއްގައި ބާންހަމް ވިދާޅުވީ، ބޮޑު ވަޒީރު ކިއާ ސްޓާމާ މަގާމުން އިސްތިއުފާ ދެއްވުމަށް ނިންމެވި ނިންމެވުމަކީ ވެރިކަން ބަދަލުވުމުގެ މަރުހަލާގެ ފެށުން ކަމަށެވެ. އަދި މި މަރުހަލާ އިންތިޒާމު ވެފައިވާ، ޒިންމާދާރު ގޮތެއްގައި ކުރިއަށް ގެންދިއުމަކީ މުހިންމު ކަމެއް ކަމަށާއި، އެ މަރުހަލާގެ ތެރެއިން ޕާޓީގެ ލީޑަރު ކަމަށް ކުރިމަތިލައްވާނެ ކަމަށް އޭނާ ވިދާޅުވި އެވެ.

ބާންހަމްގެ މި ވާހަކަތަކަށް ފަހު، ސްޓާމާގެ ސަރުކާރުގެ ހެލްތު ސެކްރެޓަރީގެ މަގާމުގައި ވެސް ހުންނެވި ސްޓްރީޓިން ވިދާޅުވީ، ބާންހަމް މަސައްކަތް ކުރައްވަނީ އެންމެން ބައިވެރިވާ ޝާމިލު ޕާޓީއެއް ބިނާ ކުރުމަށް ކަމަށް ގަބޫލު ކުރައްވާ ކަމަށެވެ. އެހެންކަމުން ލީޑަރު ކަމަށް ވާދަ ނުކުރައްވާނެ ކަމަށް ސްޓްރީޓިން ވަނީ އިއުލާން ކުރައްވާފައި އެވެ. ސްޓްރީޓިން ވަނީ މިދިޔަ މެއި މަހު ސްޓާމާގެ ސަރުކާރުން އިސްތިއުފާ ދެއްވައިފަ އެވެ. 

ބޮޑު ވަޒީރު ސްޓާމާ މަގާމުން ވަކިވެ ވަޑައިގަންނަވާނެ ތާވަލެއް އިއުލާން ކުރެއްވީ، ޕާޓީގެ މެންބަރުންނާއި މިނިސްޓަރުންގެ ފަރާތުން ކުރިމަތިވި ބޮޑު ފިއްތުންތަކާ ގުޅިގެންނެވެ. މިއީ އާންމު އިންތިޚާބުގައި ބޮޑު އަޣުލަބިއްޔަ ތަކުން ކާމިޔާބު ހޯއްދެވިތާ ދެ އަހަރު ވެސް ނުވަނީހެވެ،

ސްޓްރީޓިން ވާދަ ނުކުރައްވަން ނިންމެވުމުން، ބާންހަމްއާ ދެކޮޅަށް އެހެން ކެންޑިޑޭޓަކު ނުނިކުމެ، އިންތިޚާބަކާ ނުލައި އޭނާ އަށް މަގާމު ލިބުމުގެ ފުރުސަތު ބޮޑެވެ. އެހެން ވެއްޖެ ނަމަ، ޖުލައި 16 ގައި ޤާނޫނު ހަދާ މަޖިލިސް ޗުއްޓީ އަށް ދާއިރު އޭނާ މަގާމާ ހަވާލުވެ ވަޑައިގަންނަވާނެ އެވެ. ބައެއް މެންބަރުން ގަބޫލު ކުރާ ގޮތުގައި އިންތިޚާބަކާ ނުލައި ލީޑަރަކު އައްޔަން ކުރުމުން، ފާއިތުވި 10 އަހަރު ތެރޭގައި ހަތް ވަނަ ބޮޑު ވަޒީރަކު އައްޔަންކުރާ އިރު އުފެދި ދާނެ ހަލަ ބޮލިކަން ކުޑަ ވާނެ އެވެ.

މީގެ ކުރިން ލޭބާ ޕާޓީގެ ލީޑަރު ކަމަށް ވާދަ ކުރައްވާނެ ކަމަށް ސްޓްރީޓިން ވިދާޅުވި ނަމަވެސް، އޭނާ އަށް ބޭނުންވާ 81 މެންބަރުންގެ ތާއީދު ލިބޭނެ ކަމާ މެދު ސުވާލު އުފެދިފައި އޮތެވެ. އޭނާ ވިދާޅުވީ ސަރުކާރުން އިސްތިއުފާ ދެއްވީ ގައުމީ ފިކުރުގެ މީހުންގެ ކުރިމަތީގައި ޕާޓީ ބަލިވަމުން ދާތީ ކަމަށާއި، ބާންހަމް އާއެކު ކުރެވުނު މަޝްވަރާ ތަކުން އޭނާގެ ވިސްނުން ތަކަށް ޖާގަ އޮތްކަން ކަށަވަރު ވެފައިވާ ކަމަށެވެ.