ބޮޑު ވަޒީރު ކަމަށް ވަޑައިގަންނަވާނެ ކަމަށް ބެލެވޭ ބާންހަމް އާއި ސްޓާމާ ބައްދަލު ކުރައްވައިފި

އިނގިރޭސިވިލާތުގެ ބޮޑު ވަޒީރުގެ މަގާމުން އިސްތިއުފާ ދެއްވާނެކަން އިއުލާން ކުރައްވާފައިވާ ކިއާ ސްޓާމާ، ބޮޑު ވަޒީރުގެ މަޤާމަށް ވާދަ ކުރައްވާނެ ކަމަށް އިއުލާން ކޮށްފައިވާ އެންޑީ ބާންހަމްއާ ބައްދަލު ކުރައްވައިފި އެވެ. 

މިއީ މިދިޔަ ހަފުތާގައި އޮތް މޭކާފީލްޑް ދާއިރާގެ ބައި އިލެކްޝަން ކާމިޔާބު ކުރައްވައި، ބާންހަމް މެމްބަރު ކަމުގެ ހުވާ ކުރެއްވި ފަހުން މި ދެ ބޭފުޅުން ބައްދަލު ކުރެއްވި ފުރަތަމަ ފަހަރެވެ. 

ޓައިމްސް ނޫހުން ރިޕޯޓު ކޮށްފައިވާ ގޮތުގައި އަންގާރަ ދުވަހު އެއް ގަޑިއިރަށް ދެމިގެން ދިޔަ މި ބައްދަލުވުން ބާއްވާފައި ވަނީ، ވެރިކަން ކުރާ ލޭބާ ޕާޓީގެ ލީޑާޝިޕް އަށް ކުރިމަތިލައްވާ ކެންޑިޑޭޓުން ސަރުކާރު ހިންގުމަށް ތައްޔާރުވުމުގެ ގޮތުން ސިވިލް ސާވަންޓުންނާ ބައްދަލުކޮށް، މަޝްވަރާ ކުރުމުގެ ހުއްދަ ސްޓާމާ ދެއްވާފައިވާ ވަަގުތެއްގައި އެވެ. 

މިހާތަނަށް ލީޑަރުގެ މަގާމަށް ކުރިމަތި ލައްވާނެކަން ހާމަ ކުރައްވާފައި ވަނީ ބާންހަމް އެކަންޏެވެ. އިތުރު ކެންޑިޑޭޓަކު ވާދަ ނުކުރައްވާ ނަމަ، އަންނަ ޖުލައި މަހުގެ 17 ވަނަ ދުވަހު ބާންހަމް ބޮަޑު ވަޒީރުގެ މަގާމަށް ހަވާލުވެ ވަޑައިގަންނަވާނެ އެވެ. 

ބާންހަމްގެ އަރިސް ބޭފުޅަކު ބީބީސީ އަށް މައުލޫމާތު ދެއްވަމުން ވިދާޅުވީ ބާންހަމް ބޮޑު ވަޒީރުކަމާ ހަވާލުވެ ވަޑައިގެންފި ނަމަ، މިހާރުގެ ޗާންސެލަރ ރޭޗަލް ރީވްސް އަށް ކެބިނެޓުގެ މެދު ފަންތީގެ މަގާމެއް ދެއްވާނެ ކަމަށް ބެލެވޭ ކަމަށެވެ. ބާންހަމް ރޭޗަލް އަށް ވަރަށް ބޮޑަށް އިހުތިރާމް ކުރައްވާ ކަމަށާއި، އޭނާގެ ޓީމުގައި ރޭޗަލް ހިމަނަން ބޭނުންފުޅު ވާނެ ކަމަށް ވެސް އެ ބޭފުޅާ ވިދާޅުވި އެވެ. ނަމަވެސް، ބާންހަމްގެ ތަރުޖަމާނު ވިދާޅުވީ މިކަމާ ގުޅޭ ގޮތުން އަދި ވަކި ގޮތެއް ނިންމާފައި ނުވާ ކަމަށެވެ. ރޭޗަލްގެ ބަދަލުގައި ޗާންސެލަރގެ މަގާމަށް ދެން އަތުވެދާނެ ކަމަށް ބެލެވޭ ބޭފުޅުންގެ ތެރޭގައި އެޑް މިލިބޭންޑް، ވެސް ސްޓްރީޓިން، ޖޯން ހީލީ އަދި އިވެޓް ކޫޕާ ހިމެނެ އެވެ.

މީގެ އިތުރުން، ޑައުނިން ސްޓްރީޓްގެ ޗީފް އޮފް ސްޓާފްގެ މަގާމަށް ކުރީގެ ކެބިނެޓް މިނިސްޓަރު ޖޭމްސް ޕާނެލް އައްޔަން ކުރައްވާނެ ކަމަށް ބާންހަމްގެ އަރިސް ބޭފުޅުން ލަފާ ކުރެ އެވެ. ޕާނެލް އަކީ ގޯޑަން ބްރައުންގެ ސަރުކާރުގައި ކަލްޗަރ ސެކްރެޓަރީގެ މަގާމާއި، ވޯކް އެންޑް ޕެންޝަންސް ސެކްރެޓަރީގެ މަގާމު އަދާ ކުރައްވާފައިވާ ބޭފުޅެކެވެ. އޭނާ ވަނީ ބީބީސީގެ އިސް މަގާމުތަކާއި، ޔުނިވާސިޓީއެއްގެ ވައިސް ޗާންސެލަރުކަން ވެސް ކުރައްވާފައި އެވެ.

ބޮޑު ވަޒީރުގެ ތަރުޖަމާނު ވިދާޅުވީ، ސަރުކާރު އެކުލަވާލުމާއި މުހިންމު ސިޔާސަތުތަކާ ގުޅޭ ގޮތުން ސިވިލް ސާވަންޓުންނާ އެކު ބާއްވާ މަޝްވަރާތައް ވީހާ ވެސް އަވަހަކަށް ފަށާނެ ކަމަށެވެ. މި މަޝްވަރާ ތަކުގައި ސަލާމަތީ ކަންކަމާ ގުޅޭ މައުލޫމާތު ދިނުން ވެސް ހިމެނެ އެވެ. ލޭބާ ޕާޓީގެ މެންބަރުންގެ ތާއީދު ގެއްލުމާ ގުޅިގެން، މަގާމުގައި ދެ އަހަރު ވެސް ނުވަނީސް އިސްތިއުފާ ދެއްވާނެކަން ސްޓާމާ އިއުލާނު ކުރެއްވީ މިދިޔަ ހޯމަ ދުވަހު އެވެ. 

އަންގާރަ ދުވަހުގެ ހެނދުނު ބޭއްވި ކެބިނެޓު ބައްދަލުވުމުގައި ސްޓާމާ ވިދާޅުވީ، އޭނާގެ ފަހުން ބޮޑު ވަޒީރުކަމާ ހަވާލުވާ ބޭފުޅަކަށް ކަންކަން ފަސޭހަ ކޮށްދިނުމަށްޓަކައި ކުރިއަށް އޮތް ހަފުތާ ތަކުގައި ހުރި ދަތި މައްސަލަތައް ހައްލު ކުރުމަށް މަސައްކަތް ކުރައްވާނެ ކަމަށެވެ. އަދި އައު ބޮޑު ވަޒީރަކު އައްޔަން ކުރެވެންދެން ސަރުކާރުގެ ބޮޑެތި ސިޔާސަތު ތަކާއި، ޚަރަދުތަކާ ގުޅޭ ނިންމުންތައް ނިންމުން މަޑުޖައްސާލުމަށް ވެސް ސްޓާމާ ވަނީ އެއްބަސްވެ ވަޑައިގެންފައި އެވެ.