އިނގިރޭސިވިލާތުގެ ސިޔާސީ ތަޖުރިބާކާރު ސަރ ޑޮނަލްޑްސަންގެ މައްޗަށް ކުޑަކުދިންތަކަކަށް ޖިންސީ ގޯނާ ކުރި ކަމުގެ ކުށް ސާބިތުވުމާ ގުޅިގެން މަގާމުތަކާއި، ނައިޓްހުޑް ލަގަބު ދޫކޮށްލަނީ

އުތުރު އަޔަލޭންޑުގެ ސިޔާސީ ތަޖުރިބާކާރު ޖެފްރީ ޑޮނަލްޑްސަން، ރޭޕް ކުރުމާއި ކުޑަކުދިންނަށް ޖިންސީ ގޯނާކުރިކަމުގެ ކުށް ސާބިތުވުމާ ގުޅިގެން، އޭނާއަށް އަރުވާފައިވާ "ނައިޓްހުޑް" ލަގަބާއި އިނގިރޭސިވިލާތުގެ "ޕްރިވީ ކައުންސިލް" ގެ މެންބަރުކަން ދޫކޮށްލައްވާނެކަމަށް ވިދާޅުވެއްޖެއެވެ.

ޑިމޮކްރެޓިކް ޔޫނިއަނިސްޓް ޕާޓީ (ޑީ.ޔޫ.ޕީ) ގެ ކުރީގެ ލީޑަރު ޖެފްރީ ޑޮނަލްޑްސަން، ދެ އަންހެން ކުއްޖަކަށް ޖިންސީ ގޯނާކުރި މައްސަލައިގައި އޭނާގެ މައްޗަށް ކުރެވުނު 18 ތުހުމަތެއްގައި ކުށްވެރިވާކަމަށް މިދިޔަ ހޯމަ ދުވަހު ޖޫރީން ވަނީ ނިންމާފައެވެ. މީގެ ތެރޭގައި ރޭޕް ކުރުމުގެ އެއް ދައުވާވެސް ހިމެނެއެވެ.

މި ޖަރީމާތައް ހިންގާފައިވަނީ 1985 އާއި 2008 އާ ދެމެދު، އެ ދެ ކުދިންނަކީ ޕްރައިމަރީ ސްކޫލް އުމުރުގެ ކުދިންގެ ގޮތުގައި ތިއްބައެވެ. ރިޕޯޓްތައް ބުނާގޮތުން އޭނާ އެ ދެ ކުދިންގެ ތެރެއިން ދޮށީ ކުއްޖާއަށް ޖިންސީ ގޯނާކުރަން ފަށާފައިވަނީ އެ ކުއްޖާގެ އުމުރުން އެންމެ 7 ނުވަތަ 8 އަހަރުގައެވެ. އަދި އެ ކުއްޖާގެ އުމުރުން 12 ނުވަތަ 13 އަހަރު ވަންދެން އެ އަމަލުތައް ވަނީ ހިންގާފައެވެ.

ޖެފްރީ ޑޮނަލްޑްސަންގެ ދެ އަންހެން ދަރިން ތިބި ނަމަވެސް، އެ ކުދިންގެ އުމުރުގެ ތަފްސީލަކީ އާންމުކޮށްފައިވާ މައުލޫމާތެއް ނޫނެވެ. އަދި މި މައްސަލައިގައި އަނިޔާ ލިބުނު ކުދިން ކޯޓުގައި ފާހަގަކޮށްފައިވަނީ "ކޮމްޕްލެއިނަންޓް އޭ" އަދި "ކޮމްޕްލެއިނަންޓް ބީ" ގެ ނަމުންނެވެ. 1962 ވަނަ އަހަރު އުފަންވި  ޑޮނަލްޑްސަން ގެ އަންހެނުން އެލީނާއާ ކައިވެނި ކުރީ 1987 ވަނަ އަހަރުއެވެ. އެއީ ރިޕޯޓްތައް ބުނާގޮތުން މި ޖިންސީ ގޯނާގެ އަމަލުތައް ފެށުނު ފަހުންނެވެ.

ބީ.ބީ.ސީ އިން ރިޕޯޓްކޮށްފައިވާ ގޮތުގައި، މި މައްސަލަ ބެއްލެވި ފަނޑިޔާރު ޕޯލް ރަމްސޭ ވަނީ ޑޮނަލްޑްސަންއަށް ދިގު މުއްދަތުގެ ޖަލު ހުކުމެއް އަންނާނެކަމުގެ އިންޒާރު ދެއްވާފައެވެ. އޭނާގެ އަނބިކަނބަލުންގެ މައްޗަށްވެސް ފިރިމީހާގެ މި އަމަލުތަކަށް އެހީތެރިވިކަމުގެ ކުށް ސާބިތުވިއެވެ. ނަމަވެސް، ނަފްސާނީ ދުޅަހެޔޮކަން ހުރިގޮތުން އޭނާއަކީ ޝަރީއަތަށް ކުރިމަތިލެވޭ ފަދަ ހާލަތެއްގައި ހުރި މީހެއް ނޫންކަމަށް ފަނޑިޔާރު ވަނީ ކަނޑައަޅުއްވާފައެވެ. ދައުވާތަކަށް އިންކާރުކުރި ޑޮނަލްޑްސަންގެ މައްޗަށް ހުކުމް އިއްވުން އޮންނާނީ އަންނަ ސެޕްޓެމްބަރު މަހުގެ 25 ވަނަ ދުވަހުއެވެ.

އިނގިރޭސިވިލާތާ އަޔަރލޭންޑް އާ ދެމެދު އޮންނަ ގުޅުން ދެމެހެއްޓުމަށް ވަކާލާތުކުރާ ޑީ.ޔޫ.ޕީ ގެ ލީޑަރުކަމުން ޑޮނަލްޑްސަން އިސްތިއުފާ ދެއްވީ 2024 ވަނަ އަހަރު އޭނާ ހައްޔަރުކުރުމާ ގުޅިގެންނެވެ. އޭނާގެ ވަކީލު ޖޯން މެކްބާނީ ބުދަ ދުވަހު ވިދާޅުވީ، ޑޮނަލްޑްސަންއަށް އަރުވާފައިވާ "ނައިޓްހުޑް" ލަގަބާއި، އިނގިރޭސި ރަސްގެފާނަށް ލަފާދޭ "ޕްރިވީ ކައުންސިލް" ގެ މެންބަރުކަން ދޫކޮށްލުމަށް އެދި ސަރުކާރަށް ހުށަހަޅާފައިވާ ކަމަށެވެ.

ޑީ.ޔޫ.ޕީ ގެ މިހާރުގެ ލީޑަރު ގަވިން ރޮބިންސަން ވިދާޅުވީ، ޝަރީއަތުގައި ހުށަހެޅުނު ހެކިތަކުގެ ސަބަބުން މުޅި ޕާޓީއަށް ބޮޑު ސިހުމެއް ލިބިފައިވާ ކަމަށެވެ. އަދި އެއްވެސް މީހަކީ، އެމީހެއްގެ މަގާމާއި ހައިސިއްޔަތަށް ބަލައި ގާނޫނަށްވުރެ މަތީގައި ހުރެވޭނެ މީހެއް ނޫންކަމަށާއި، ޖެފްރީ ޑޮނަލްޑްސަންއަކީވެސް އޭގެ އިސްތިސްނާއެއް ނޫންކަމަށް އޭނާ ވިދާޅުވިއެވެ.

އެ ޕާޓީގެ ޑެޕިއުޓީ ލީޑަރު މިޝޭލް މެކްއިލްވީން އަންގާރަ ދުވަހު ވިދާޅުވީ، ޑޮނަލްޑްސަން އުޅެމުންދިޔައީ އޮޅުވާލުމުން ފުރިގެންވާ "ދެފުށް ދެގޮތް" ދިރިއުޅުމެއް ކަމަށެވެ.