ބާންހަމް، ޤާނޫނު ހަދާ މަޖިލީހުގެ މެމްބަރު ކަމުގެ ހުވާ ކުރައްވައިފި

އިނގިރޭސިވިލާތުގެ ގާނޫނު ހަދާ މަޖިލިސް، ހައުސް އޮފް ކޮމަންސްގެ މޭކާފީލްޑް ދާއިރާގެ މެންބަރު ކަމުގެ ހުވާ އެންޑީ ބާންހަމް ކުރައްވައިފި އެވެ.

ފުރިބާރުވެފައިވާ މަޖިލީހުގެ ތަޅުމަށް ބާންހަމް ވަޑައިގަތުމާ އެކު، ވެރިކަން ކުރާ ލޭބާ ޕާޓީގެ މެންބަރުންގެ ފަރާތުން އޭނާ އަށް ވަނީ ވަރަށް ހޫނު މަރުހަބާއެއް ކިޔާފައި އެވެ.

މަޖިލީހުގެ ތަޅުމަށް ވަޑައިގެން ބާންހަމް މެންބަރު ކަމުގެ ހުވާ ކުރެއްވީ، އެސްއެންޕީގެ އައު މެންބަރު ލާރާ ބާޑް އަދި ކޮންޒަވޭޓިވް ޕާޓީގެ އައު މެންބަރު ޑަގްލަސް ލަމްސްޑަން ހުވާ ކުރެއްވުމަށް ފަހުގައި އެވެ. ހުވާ ކުރެއްވުމަށް ފަހު މަޖިލީހުގެ ތަޅުމުގެ ތެރެއިން ހިންގަވާފައި ވަޑައިގެންނެވި އިރު، އޭނާ ވަނީ މަޖިލީހުގެ އިހުތިރާމް އަދާ ކުރުމުގެ ގޮތުން ބޯ ޖައްސަވާލައްވައިފަ އެވެ. 

މި ރަސްމިއްޔާތުގެ ތެރެއިން ބާންހަމް އަށް ތާއީދު ކުރައްވާ މެންބަރުން އޭނާ އަށް މަރުހަބާ ދަންނަވަމުން ދިޔައިރު، އޭނާ ހުންނެވީ ވަރަށް އުފާވެރި ހިނިތުންވުމަކާ އެކުގައި އެވެ. މީގެ އިތުރުން، މޭކާފީލްޑް ދާއިރާގެ މެންބަރުގެ ގޮތުގައި ރަސްމީކޮށް މަގާމާ ހަވާލުވެ ވަޑައިގަތުމުގެ ކުރިން، ހައުސް އޮފް ކޮމަންސްގެ ސްޕީކާ ލިންޑްސޭ ހޮއިލްއާ ބައްދަލު ކުރައްވައި ބާންހަމް ވަނީ ވަރަށް ގާތް އެކުވެރި މުއާމަލާތް ތަކެއް ކުރައްވާފައި އެވެ.

އެންޑީ ބާންހަމް މަޖިލީހަށް ވަޑައިގަތުމުން ލޭބާ ޕާޓީގެ ބެންޗު ތަކުން އިވުނު ބާރު އަޑުފަށް ގަނޑާއި އުފާވެރި ކަމުގެ ސަބަބުން، އޭނާ އަކީ އެ ޕާޓީގެ ތެރޭގައި ނުފޫޒު ގަދަ އަދި މަގުބޫލު ބޭފުޅެއްކަން ވަނީ ހާމަ ވެގެން ގޮސްފައި އެވެ. މި ހުވާ ކުރުމުގެ ރަސްމިއްޔާތާ އެކު އޭނާ މިހާރު ވަނީ ރަސްމީކޮށް މޭކާފީލްޑް ދާއިރާގެ ރައްޔިތުން ތަމްސީލު ކުރައްވާ މެންބަރުގެ ޒިންމާތަކާ ހަވާލުވެ ވަޑައިގެންފައި އެވެ.

ޤާނޫނު ހަދާ މަޖިލީހުގެ މެމްބަރު ކަމުގެ ހުވާ ބާންހަމް ކުރެއްވިއިރު، އޭނާ އަކީ އިނގިރޭސިވިލާތުގެ ބޮޑު ވަޒީރުގެ މަގާމަށް ވަޑައިގަންނަވާނެ ކަަމަށް ބެލެވޭ ބޭފުޅާ އެވެ. ބާންހަމް މެމްބަރު ކަމުގެ ހުވާ ކުރެއްވުމުގެ ކުރިން، ބޮޑު ވަޒީރުގެ މަގާމުގައި ހުންނެވި ސްޓާމާ ވަނީ މަގާމުން އިސްތިއުފާ ދެއްވާނެ ކަމަށް އިއުލާާން ކުރައްވައި، ޓައިމްލައިނެއް ކަނޑައަޅުއްވައިފަ އެވެ.