ސްޓާމާގެ އިސްތިއުފާ އިއުލާން ކުރެއްވުމާ އެކު، އީޔޫ އިން ބާއްވަން އޮތް ސަމިޓު ކެންސަލް ކޮށްފި
ސަމިޓް ކެންސަލް ކުރިކަން އިއުލާން ކުރައްވަމުން ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވީ، މި ދަނޑިވަޅުގައި ސަމިޓު ފަސްކުރަން ޖެހޭ ކަމަށާއި، އުންމީދަކީ ސްޓާމާގެ ފަހުން ބޮޑު ވަޒީރުކަމާ ހަވާލުވާ ބޭފުޅަކު ވެސް އީޔޫ އާއެކު އޮތް ގުޅުން ބަދަހި ކުރުމުގެ ސިޔާސަތު ކުރިއަށް ގެންދިއުން ކަމަށް.
އިނގިރޭސިވިލާތުގެ ބޮޑު ވަޒީރުކަމުން އިސްތިއުފާ ދެއްވާނެ ކަމަށް އިއުލާން ކުރެއްވި ސްޓާމާ. | ގެޓީ އިމޭޖަސް
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ މަގާމުން އިސްތިއުފާ ދެއްވާނެކަން އިއުލާން ކުރެއްވުމާ ގުޅިގެން، ވިލާތުގެ އިއްތިހާދު (އީޔޫ) އާއި އިނގިރޭސިވިލާތާ ދެމެދު ބޭއްވުމަށް ހަމަޖެހިފައި އޮތް މުހިންމު ސަމިޓެއް ކެންސަލް ކޮށްފި އެވެ.
މި މަހުގެ 22 ވަނަ ދުވަހު ބެލްޖިއަމްގެ ބްރަސަލްސްގައި ބޭއްވުމަށް ތާވަލު ކުރި މި ސަމިޓް ކެންސަލް ކުރިކަން އިއުލާން ކުރައްވަމުން ޔޫރަޕިއަން ކައުންސިލްގެ ރައީސް އެންޓޯނިއޯ ކޮސްޓާ ވިދާޅުވީ، މި ދަނޑިވަޅުގައި ސަމިޓު ފަސްކުރަން ޖެހޭ ކަމަށާއި، އުންމީދަކީ ސްޓާމާގެ ފަހުން ބޮޑު ވަޒީރުކަމާ ހަވާލުވާ ބޭފުޅަކު ވެސް އީޔޫ އާއެކު އޮތް ގުޅުން ބަދަހި ކުރުމުގެ ސިޔާސަތު ކުރިއަށް ގެންދިއުން ކަމަށެވެ.
ހޯމަ ދުވަހު ޑައުނިންގް ސްޓްރީޓްގެ ބޭރުގައި ހުންނަވައި ދެއްވި ބަޔާނެއްގައި ސްޓާމާ ވިދާޅުވީ، ލޭބާ ޕާޓީގެ ލީޑަރު ކަމުން އޭނާ އިސްތިއުފާ ދެއްވާނެ ކަމަށެވެ. ނަމަވެސް އައު ލީޑަރަކު އިންތިޚާބުކޮށް ނިމެންދެން ބޮޑު ވަޒީރުގެ މަގާމުގައި ދެމި ހުންނަވާނެ ކަމަށާއި، އަމާޒަކީ އަމާންކަމާ އެކު ވެރިކަން ބަދަލު ކުރުމުގެ ކަންކަން ކުރިއަށް ގެންދިއުން ކަމަށް އޭނާ ވިދާޅުވި އެވެ.
ސްޓާމާ އިސްތިއުފާ ދެއްވަން ނިންމެވީ ކުރިއަށް އޮތް އާންމު އިންތިޚާބުގައި ޕާޓީއަށް ކާމިޔާބު ހޯދައި ދިނުމަށް އެންމެ އެކަށީގެންވާ ލީޑަރަކީ އޭނާ ކަމަށް ޕާލަމެންޓްރީ ގްރޫޕުން ގަބޫލު ނުކުރާތީ ކަމަށް ވެސް އޭނާ ފާހަގަ ކުރެއްވި އެވެ.
ސްޓާމާގެ އިސްތިއުފާއާ ގުޅިގެން ޔޫރަޕިއަން ކޮމިޝަންގެ ރައީސާ އުރުސުލާ ވޮން ޑަ ލެޔަން ވަނީ އޭނާ އަށް ވަރަށް ބޮޑަށް ތައުރީފު ކުރައްވާފައި އެވެ. ވަކިން ހާއްސަކޮށް ޔޫކްރެއިންގެ ދިފާއުގައި އިނގިރޭސިވިލާތުން ދެމުންދާ އެއްބާރުލުން ދެމެހެއްޓެވުމުގައި ސްޓާމާ އަދާ ކުރެއްވި ދައުރު އޭނާ ފާހަގަ ކުރެއްވި އެވެ. އުރުސުލާ ވިދާޅުވީ އެހެން ލީޑަރުންނަށް ދައުލަތެއްގެ އިސްވެރިއެއްގެ ގޮތުގައި ފައިތިލަ ސާބިތު ކުރަން ގިނަ އަހަރު ތަކެއް ނެގި ނަމަވެސް، ސްޓާމާ އެކަން އެންމެ ދެ އަހަރު ތެރޭގައި ސާބިތު ކޮށްދެއްވާފައިވާ ކަމަށެވެ.
ލޭބާ ޕާޓީގެ އައު ލީޑަރު ކަމަށް ކުރިމަތި ލުމުގެ ފުރުސަތު ޖުލައި މަހުގެ ނުވަ ވަނަ ދުވަހު ހުޅުވާލުމަށް ވަނީ ހަމަޖެހިފައި އެވެ. އަދި ޤާނޫނު ހަދާ މަޖިލިސް ޗުއްޓީ އަށް ދިއުމުގެ ކުރިން، ޖުލައި 16 ގެ ނިޔަލަށް މި ފުރުސަތު ބަންދުވާނެ އެވެ. މިހާރު ބެލެވޭ ގޮތުގައި ސްޓާމާގެ ބަދަލުގައި ބޮޑު ވަޒީރު ކަމަށް ވަޑައިގަތުން އެންމެ ގާތީ މެންޗެސްޓަރގެ ކުރީގެ މޭޔަރު އެންޑީ ބާންހަމް އެވެ. ބާންހަމް ވަނީ މިދިޔަ ހަފުތާގައި ބޭއްވި ބައި އިލެކްޝަން ކާމިޔާބު ކުރައްވައި، ހޯމަ ދުވަހު މެންބަރު ކަމުގެ ހުވާ ކުރައްވާފައި އެވެ.
މަސްދަރު: ބީބީސީ
