ޓްރަމްޕް ދެއްވި އިންޒާރާ ގުޅިގެން އީރާނުގެ ވަފުދު މަޝްވަރާ މާލަން ދޫކޮށް ނުކުމެއްޖެ

އެމެރިކާއާއެކު ކުރިއަށްދާ މަޝްވަރާތަކުގައި ބައިވެރިވާ އީރާނުގެ ވަފުދުން، އިތުރު އަސްކަރީ ހަމަލާތަކެއް ދޭނެ ކަމަށް ބުނެ ރައީސް ޑޮނަލްޑް ޓްރަމްޕް ދެއްވި އެންމެ ފަހުގެ އިންޒާރާ ގުޅިގެން އެމެރިކާގެ މަންދޫބުންނަށް ސީދާގޮތުން ޝަކުވާ ހުށަހަޅާފައިވާ ކަމަށާއި، ދެން އަޅާނެ ފިޔަވަޅުތަކާ މެދު މިހާރު ވިސްނަމުންދާ ކަމަށް ޕްރެސް ޓީވީއަށް މައުލޫމާތު ދިން މަސްދަރަކުން ބުނެފިއެވެ.

އާދީއްތަ ދުވަހު އެ މަސްދަރުން ބުނި ގޮތުގައި، އީރާނުގެ ވަފުދުން ވަނީ އެމެރިކާގެ ފަރާތްތަކަށް އެކަމުގެ ކަންބޮޑުވުން ފާޅުކޮށްފައެވެ. އަދި ޓްރަމްޕް ދެއްވި ބަހުގެ ހަމަލާތަކަށް އެކަށީގެންވާ ރައްދެއް ދިނުމަށްޓަކައި މިހާރުގެ ހާލަތު ވަޒަންކުރަމުންދާ ކަމަށްވެސް އެ މަސްދަރުން ބުންޏެވެ.

އާދީއްތަ ދުވަހު ޓްރަމްޕް ވަނީ އީރާނާއެކު އަލުން ހަނގުރާމައެއް ފަށާނެ ކަމުގެ އިންޒާރު ދެއްވާފައެވެ. އަދި ލުބުނާނުގައި ތިބި އީރާނަށް ތާއީދުކުރާ ފަރާތްތައް ކޮންޓްރޯލް ކުރުމަށް ތެހެރާނަށް އަންގަވައި، އެހެން ނޫންނަމަ އެމެރިކާއިން އީރާނަށް ވަރުގަދަ އަސްކަރީ ހަމަލާތަކެއް އަލުން ދޭނެ ކަމުގެ އިންޒާރު ޓްރަމްޕް ދެއްވިއެވެ.

ފެބްރުއަރީ މަހުގެ ފަހުކޮޅު އިސްލާމީ ޖުމްހޫރިއްޔާއާ ދެކޮޅަށް އެމެރިކާއިން ފެށި ހަނގުރާމައަށް އިޝާރާތް ކުރައްވައި، ޓްރަމްޕްގެ "ޓްރޫތު ސޯޝަލް" ޕްލެޓްފޯމުގައި ކުރެއްވި ޕޯސްޓެއްގައި ވިދާޅުވީ، ލުބުނާނުގައި ތިބި އީރާނުގެ މަދަދުލިބޭ ޖަމާއަތްތަކުން މައްސަލަ އުފެއްދުން ވަގުތުން ހުއްޓާލަން ޖެހޭ ކަމަށެވެ. އަދި އެކަން އެގޮތަށް ނުވެއްޖެނަމަ، މިދިޔަ ހަފުތާގައި ދިން ހަމަލާތަކަށްވުރެ މާ ވަރުގަދަ ހަމަލާތަކެއް އީރާނަށް އަލުން ދޭނެ ކަމަށް ޓްރަމްޕް ވިދާޅުވިއެވެ.

ޓްރަމްޕް މި އިންޒާރު ދެއްވާފައިވަނީ، ޕާކިސްތާނާއި ގަތަރު މެދުވެރިވެގެން ސްވިޒަލޭންޑުގެ މެދުތެރޭގައި އޮންނަ ބާގަންސްޓޮކް ރިސޯޓުގައި އީރާނާއި އެމެރިކާގެ ވަފުދުތަކުން 14 ނުކުތާގެ މައްޗަށް އެކުލެވޭ ފަހުމުނާމާއެއް ތަންފީޒު ކުރުމަށް މުހިންމު މަޝްވަރާތަކެއް ކުރަމުން ދަނިކޮށެވެ.

މި މަޝްވަރާތަކަކީ މީގެ ހަފުތާއެއް ކުރިން އެއްބަސްވި އިސްލާމްއާބާދު ފަހުމުނާމާގެ ދަށުން ބޭއްވުނު ފުރަތަމަ ބައްދަލުވުންތަކެވެ.

އީރާނާ ދެކޮޅަށް އިތުރު އަސްކަރީ ފިޔަވަޅު އަޅާނެ ކަމަށް ވިދާޅުވެ ޓްރަމްޕް ދެއްވި އިންޒާރަކީ، ދެ ގައުމުގެ ދެމެދުގައި ވެފައިވާ ވަގުތީ އެއްބަސްވުމާ ސީދާ ޚިލާފު ކަމެކެވެ. އެ އެއްބަސްވުމުގެ ފުރަތަމަ މާއްދާގައި ބުނެފައިވަނީ، ދެ ފަރާތުންވެސް އެއްވެސް ކަހަލަ ހަނގުރާމައެއް ނުވަތަ އަސްކަރީ އޮޕަރޭޝަނެއް އެއްބަޔަކު އަނެއް ބަޔަކާ ދެކޮޅަށް ފަށައިގެން ނުވާނެ ކަމަށާއި، ބާރުގެ ބޭނުންކުރުމުގެ އިންޒާރު ދިނުމުން ނުވަތަ ބާރުގެ ބޭނުންކުރުމުން ދުރުހެލިވާން ޖެހޭނެ ކަމަށެވެ.

އީރާނުގެ މަޝްވަރާ ޓީމާ ގާތް ގުޅުމެއް އޮންނަ މަސްދަރަކުން ފަހުން ތަސްނީމް ނިއުސް އެޖެންސީއަށް މައުލޫމާތު ދިން ގޮތުގައި، ޓްރަމްޕް ދެއްވި އެންމެ ފަހުގެ އިންޒާރާ ގުޅިގެން އިހުތިޖާޖު ކުރުމުގެ ގޮތުން އީރާނުގެ ވަފުދުން ވަނީ އެމެރިކާއާއެކު މަޝްވަރާ ކުރަމުންދިޔަ މާލަން ދޫކޮށް ނުކުމެފައެވެ.