ޓްރަމްޕް: ހުރްމޫޒުން ފީ އެއް ނުނެގޭނެ، ނެގުނަސް ނެގޭނީ އެމެރިކާ އަށް
ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން ފީއެއް ނުނަގާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި ނަމަވެސް، ސުލްހައިގެ މަޝްވަރާތައް ނާކާމިޔާބުވެއްޖެ ނަމަ އެފަދަ ފީއެއް ނެގުމުގެ ފުރުސަތު އޮތްކަމަށް އެމަނިކުފާނު ވަނީ ފާހަގަކުރައްވާފައި. އިސްރާއީލުން އެއްބަސްވުމާ ހިލާފުވާކަމަށް ބުނެ އީރާނުން އެ ކަނޑުއޮޅި ބަންދުކުރާނެ ކަމުގެ އިންޒާރު ދީފައިވާއިރު، އެމެރިކާގެ އަސްކަރިއްޔާއިން ބުނީ އެ ސަރަހައްދުގެ ރައްކާތެރިކަން ކަށަވަރުކުރުމަށް ސިފައިން ފާރަވެރިވަމުންދާ ކަމަށް. މި ހާލަތާ ގުޅިގެން ދުނިޔޭގެ ހަކަތައިގެ ބާޒާރަށް ބޮޑެތި ލޮޅުންތަކެއް އެރުމުގެ ބިރު ވަނީ ހީވެފައި.
2026 ވަނަ އަހަރުގެ މޭ މަހުގެ 26 ވަނަ ދުވަހު ތެހެރާންގެ ވަލިއަސްރު މައިދާނުގައި، އެމެރިކާގެ ރައީސް ޑޮނަލްޑް ޓްރަމްޕާއި ހުރްމުޒް ކަނޑުއޮޅި ފެންނަ ގޮތަށް ހަރުކޮށްފައިވާ ސިޔާސީ ބިލްބޯޑެއްގެ ކައިރިން ދުއްވާ އެއްޗެހި ދަތުރުކުރަނީ. | ގެޓީ އިމޭޖަސް
އީރާނާއެކު ވެފައިވާ 60 ދުވަހުގެ މުއްދަތަށް ދެމިގެންދާ ވަގުތީ ހަނގުރާމަ ހުއްޓާލުމުގެ އެއްބަސްވުމުގެ ދަށުންނާއި، އެ މުއްދަތު ހަމަވުމަށްފަހުވެސް ހުރްމުޒް ކަނޑުއޮޅިން ދަތުރުކުރާ އުޅަނދުފަހަރުން އެއްވެސް ފީއެއް ނުނަގާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހޮނިހިރު ދުވަހު ވިދާޅުވެއްޖެއެވެ. ނަމަވެސް، ސުލްހައިގެ މަޝްވަރާތައް ނާކާމިޔާބުވެއްޖެ ނަމަ، އެމެރިކާއިން އެފަދަ ފީއެއް ނެގުމުގެ ފުރުސަތު އޮތްކަމަށް ޓްރަމްޕް ފާހަގަކުރެއްވިއެވެ.
ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، ހަނގުރާމަ ހުއްޓާލާފައިވާ 60 ދުވަހުގެ މުއްދަތުގައި ހުރްމުޒް ކަނޑުއޮޅިން އެއްވެސް ފީއެއް ނުނަގާނެ ކަމަށާއި، އަދި އެ މުއްދަތު ހަމަވުމަށްފަހުވެސް އެއްވެސް ފީއެއް ނުނަގާނެ ކަމަށެވެ. ނަމަވެސް، ސުލްހައިގެ އެއްބަސްވުން ފުރިހަމަނުވެއްޖެ ނަމަ، މެދުއިރުމަތީގެ ގައުމުތަކުގެ ހިމާޔަތުގައި "ގާޑިއަން އެންޖެލް" އެއްގެ ގޮތުގައި އެމެރިކާއިން ކޮށްފައިވާ އަދި ކުރަމުންދާ ހަރަދުތަކުގެ ބަދަލު ހޯދުމަށްޓަކައި، އެމެރިކާއިން ބޭނުންވެއްޖެ ހާލަތެއްގައި ފީ ނަގާނެ ކަމަށް ޓްރަމްޕް ވިދާޅުވިއެވެ.
ދުނިޔޭގެ ބާޒާރަށް ތެލާއި ގޭސް ސަޕްލައި ކުރުމުގައި މުހިންމު ދައުރެއް އަދާކުރާ ހުރްމުޒް ކަނޑުއޮޅި، ހަނގުރާމައިގެ ބޮޑު ބައެއްގައި އީރާނުން އޮތީ ބަންދުކޮށްފައެވެ. މީގެ ސަބަބުން ދުނިޔޭގެ ހަކަތައިގެ ބާޒާރަށް ބޮޑެތި ލޮޅުންތަކެއް އަރާފައިވެއެވެ.
އެމެރިކާއިން "އެއްބަސްވުމާ ހިލާފުވެފައިވާ" ކަމަށް ބުނެއާއި، ލުބުނާނުގެ ދެކުނުގައި ޒަޔަނިސްޓް އިސްރާއީލުން ހުއްޓުމެއްނެތި ހަނގުރާމަ ހުއްޓާލުމުގެ އެއްބަސްވުމާ ހިލާފުވަމުންދާ ކަމަށް ތުހުމަތުކޮށް، އީރާނުގެ މަރުކަޒީ އަސްކަރީ ކޮމާންޑުން ވަނީ ހޯރްމޫޒް ކަނޑުއޮޅި އުޅަނދުފަހަރަށް ބަންދުކުރާނެ ކަމަށް ބުނެފައެވެ.
އީރާނުގެ މި ނިންމުމާ ގުޅިގެން އެމެރިކާގެ ސެންޓްރަލް ކޮމާންޑުން ބުނީ، ބައިނަލްއަގުވާމީ އެ ކަނޑުގެ ސަރަހައްދުން ދަތުރުފަތުރު ކުރުމުގެ ރައްކާތެރިކަން އަދިވެސް އެބައޮތް ކަމަށެވެ. އަދި އެ ސަރަހައްދުގައި އެމެރިކާގެ ސިފައިން ހަރަކާތްތެރިވަމުންދާ ކަމަށާއި، އެމީހުން ތިބީ ވަރަށް ފާރަވެރިކަމާއެކު ކަމަށްވެސް އެމެރިކާގެ އަސްކަރިއްޔާއިން ބުނެފައިވެއެވެ.
