އަލްކާ ޔަގްނިކަށް ޕަދުމާ ބޫޝަން އެވޯޑު ލިބުން.

އަލްކާ ޔަގްނިކަށް ޕަދުމާ ބޫޝަން އެވޯޑު ލިބުމާއެކު، އޭނާގެ ސިއްހީ ހާލަތާ މެދު ކަންބޮޑުވުން ފާޅުކޮށް ސަޕޯޓަރުން ލޯބި އޮއްސާލައިފިއެވެ. ޖޫން މަހުގެ 23 ވަނަ ދުވަހު ރާޝްތުރަޕަތީ ބަވަންގައި ބޭއްވި ރަސްމިއްޔާތެއްގައި، އިންޑިއާގެ ރައީސް ދުރޫޕަދީ މުރުމޫގެ އަތްޕުޅުން އަލްކާ ޔަގްނިކް ވަނީ ޕަދުމާ ބޫޝަން އެވޯޑާ ހަވާލުވެފައެވެ. މި ރަސްމިއްޔާތުގެ ވީޑިއޯ އާންމުވުމާއެކު، އަލްކާ ވަރަށް ބަލިކަށިކޮށް ހުރުމުން އޭނާގެ ސިއްހީ ހާލަތާ މެދު ކަންބޮޑުވުން ފާޅުކޮށް ގިނަ ބަޔަކު ދަނީ ހެޔޮދުއާ ފޮނުވަމުންނެވެ.

ޖޫން 23 ގައި ރާޝްތުރަޕަތީ ބަވަންގައި ބޭއްވި ދެވަނަ އިންވެސްޓިޗަރ ރަސްމިއްޔާތުގައި ރައީސް ދުރޫޕަދީ މުރުމޫ ވަނީ ލަވަކިޔުންތެރިޔާ އަލްކާ ޔަގްނިކަށް ޕަދުމާ ބޫޝަން އެވޯޑު އަރުވާފައެވެ. މި ރަސްމިއްޔާތުގެ ވީޑިއޯ އިންޓަނެޓުގައި އާންމުވުމާއެކު، އިންޑިއާގެ މިއުޒިކީ ދާއިރާގެ މި ޝަޚްސިއްޔަތު ފެންނަނީ ވަރަށް ބަލިކަށިކޮށް ކަމަށް ބުނެ، ކަންބޮޑުވެފައި ތިބި ސަޕޯޓަރުން ދަނީ އޭނާއަށް ހެޔޮ އެދުންތައް ފޮނުވަމުންނެވެ.

އުމުރުން 60 އަހަރުގެ މި ލަވަކިޔުންތެރިޔާއަށް ގިނަ ބަޔަކު މަރުހަބާ ކިޔަމުންދާއިރު، އޭނާއަށް ދިމާވެފައިވާ އަޑުއިވުމުން މަހުރޫމްވުމުގެ މައްސަލައިން އަވަސް ޝިފާއަކަށް އެދިވެސް ގިނަ ބަޔަކު ދަނީ ދުއާކުރަމުންނެވެ. ނުވަދިހައިގެ އަހަރުތަކުގައި އޭނާގެ ފުރިހަމަ އަޑުން ބޮލީވުޑްގައި ބޮޑު މަގުބޫލުކަމެއް ހޯދި މި ޕްލޭބެކް ސިންގާއަށް 2024 ވަނަ އަހަރު ވަނީ "ސެންސަރީނިއުރަލް ހިއަރިންގ ލޮސް" (އެސް.އެން.އެޗް.އެލް) ނަމަކަށް ކިޔާ ނާދިރު ބައްޔެއް ޖެހިފައެވެ. ކުއްލިއަކަށް ކުރިމަތިވި ވައިރަލް އެޓޭކެއްގެ ސަބަބުން ޖެހުނު މި ބަލީގެ ސަބަބުން އޭނާގެ އަޑުއިވުމުގެ ހިއްސަށް ބޮޑެތި ގެއްލުންތަކެއް ލިބި، ލަވަކިޔުމުގެ މަސައްކަތްތަކާ ދުރުވާން ވަނީ މަޖުބޫރުވެފައެވެ. އަދި ބާރު އަޑުން މިއުޒިކް އެހުމުގެ ނުރައްކާތެރިކަމާ މެދު އޭނާ ވަނީ އާންމުންނަށް އިންޒާރުވެސް ދީފައެވެ.

އެކްސްގައި ޚިޔާލު ފާޅުކުރި މީހަކު ބުނެފައިވަނީ، މަޝްހޫރު ޕްލޭބެކް ސިންގާ އަލްކާ ޔަގްނިކަށް ރައީސް ދުރޫޕަދީ މުރުމޫ ޕަދުމާ ބޫޝަން އެވޯޑު އަރުވާފައިވާ ކަމަށާއި، ނަމަވެސް އޭނާއަށް އަޑުއިވުމުގެ މައްސަލަ ކުރިމަތިވެފައިވާކަން އެނގުމުން ވަރަށް ދެރަވި ކަމަށެވެ. އެހެން މީހަކު ލިޔެފައިވަނީ، ކުޑައިރު ލަވަކިޔުންތެރިންނާ ބެހޭގޮތުން މާ ބޮޑު އެއްޗެއް ނޭނގުނަސް، އަލްކާ ޔަގްނިކްގެ ލަވައެއް އިވުމުން ދިރިއުޅުމަށް އުފާވެރިކަން ލިބޭ ކަމަށެވެ. އަދި އަހަރުތަކަކަށް ފަހުވެސް އެ ލަވަތަކަކީ ހަނދާންތަކާއި، ދަތުރުފަތުރާއި، އުފާފާޅުކުރުންތަކުގެ ބައެއް ކަމަށާއި، އޭނާއަށް ޕަދުމާ ބޫޝަން ލިބުމަކީ ވަރަށް ޚާއްސަ ކަމެއް ކަމަށް އޭނާ ބުންޏެވެ. މީގެ އިތުރުން، ބައެއް އަޑުތަކަކީ އަބަދަށްޓަކައި ދިރިއުޅުމުގެ ބައެއް ކަމަށް ބުނެ، އަލްކާއަށް ހިތްވަރާއި ދުޅަހެޔޮ ސިއްހަތަކަށް އެ މީހާ ވަނީ އެދިފައެވެ.

ތިންވަނަ މީހަކު ބުނެފައިވަނީ، އަލްކާ ޔަގްނިކަކީ ޕަދުމާ ބޫޝަން އެވޯޑު ހައްގު ބޭފުޅެއް ކަމަށާއި، ނަމަވެސް އޭނާއަށް މަރުހަބާ ކިޔުމަށް ޖެހި ބާރު އަތްތިލަބަޑީގެ އަޑު އޭނާއަށް ނީވޭނެކަން ހިތަށް އެރުމުން ވަރަށް ދެރަވާ ކަމަށެވެ. އަދި ޖީލުތަކެއްގެ ހިތްތަކާ ކުޅެލި އެ އަޑުގެ ވެރިޔާއަށް އަވަސް ޝިފާއަކަށް އެދޭ ކަމަށްވެސް އޭނާ ބުންޏެވެ.

މި ރަސްމިއްޔާތުގެ ވީޑިއޯއިން ފެންނަ ގޮތުގައި، އަލްކާ ހިނގާފައި ދިޔައީ އެހީތެރިއެއްގެ އެހީތެރިކަމާއެކުގައެވެ. ރައީސް ދުރޫޕަދީ މުރުމޫގެ އަރިހަށް ދިއުމުގެ ކުރިން، އޭނާ ވަނީ ބޮޑުވަޒީރު ނަރެންދުރަ މޯދީގެ ފައިގައި އަތްލައި އޭނާގެ ދުއާ ހޯދާފައެވެ.

މި ޝަރަފުވެރި ރަސްމިއްޔާތުގައި އަލްކާގެ އިތުރުން މަމޫޓީ، އާރް މާދަވަން އަދި މަރުވެފައިވާ އެކްޓަރު ސަތީޝް ޝާހަށްވެސް ވަނީ ޝަރަފު އަރުވާފައެވެ.

މަރުވެފައިވާ އެކްޓަރު ސަތީޝް ޝާހްގެ ފަރާތުން އެވޯޑާ ހަވާލުވީ އޭނާގެ ކޮއްކޮ އަރުވިންދު ޝާހްއެވެ.

މި އަހަރު ރައީސް ވަނީ 131 ޕަދުމާ އެވޯޑެއް ދިނުމަށް ފާސްކުރައްވާފައެވެ. މީގެ ތެރޭގައި ފަސް ޕަދުމާ ވިބޫޝަން، 13 ޕަދުމާ ބޫޝަން އަދި 113 ޕަދުމާ ޝްރީ ހިމެނެއެވެ.

 އަލްކާ ޔަގްނިކަކީ އިންޑިއާގެ ސިނަމާގައި އެންމެ ފާހަގަކޮށްލެވޭ އެއް ޕްލޭބެކް ސިންގާއެވެ. 1990 އާއި 2000 ގެ އަހަރުތަކުގައި ބޮލީވުޑްގެ މިއުޒިކްގައި ރަސްކަންކުރި އަލްކާ ވަނީ ހިންދީ ސިނަމާގެ އެންމެ ހަނދާން އާލާވާ ފަދަ ލަވަތައް ކިޔައިދީ، އެ ދުވަސްވަރުގެ އެންމެ ނުފޫޒުގަދަ އަޑަށް ވެފައެވެ. އޭނާގެ ކާމިޔާބު ކެރިއަރުގައި ދެ ނޭޝަނަލް ފިލްމް އެވޯޑާއި، ހަތް ފިލްމްފެއާ އެވޯޑް ހޯދާފައިވާއިރު، އިންޑިއާގެ މިއުޒިކަށް ކޮށްދީފައިވާ ޚިދުމަތުގެ އަގުވަޒަންކޮށް 2024 ވަނަ އަހަރު ވަނީ ޕަދުމާ ބޫޝަން އެވޯޑު އަރުވާފައެވެ.

ޔޫޓިއުބްގައި ދުނިޔޭގެ ފެންވަރުގައި އެންމެ ގިނައިން ލަވަ އަޑުއަހާ އާޓިސްޓުންގެ ތެރޭގައި ހިމެނި، ބިލިއަނުން ވިއުސް ހޯދައިގެން އޭނާ ވަނީ ގިނިސް ވޯލްޑް ރެކޯޑުން ޖާގަ ހޯދާފައެވެ. އޭނާގެ އަބަދަށް ފެހި އަޑާއި، ކޮންމެ ކަހަލަ ލަވައެއްވެސް ކިޔުމުގެ ހުނަރާއި، ދެމިގެންވާ މަގުބޫލުކަމުގެ ސަބަބުން އޭނާ އަކީ އިންޑިއާގެ މިއުޒިކީ ތާރީޚުގައި އެންމެ ލޯބިވާ އެއް ލަވަކިޔުންތެރިޔާއެވެ.

އޭނާ ކިޔާފައިވާ މަޝްހޫރު ލަވަތަކުގެ ތެރޭގައި "ޒިންދަގީ ސޭ ޖަންގް"، "ޕަރުދޭސީ ޕަރުދޭސީ"، "ގަޔާމަތު"، "ކޮއި ޖާޔޭ ތޯ ލޭ އާޔޭ"، "ޗޯލީ ކޭ ޕީޗޭ"، "ދިލް ނޭ ޔޭ ކަހާ ހޭ ދިލް ސޭ"، "ހަމް ތުމް" އަދި "ގޫންގަޓް ކީ އާޑް ސޭ" ފަދަ އެތައް ލަވަތަކެއް ހިމެނެއެވެ.