ކޮންގޯ ބަލިކޮށް، ކޮލަމްބިއާ ދެ ވަނަ ބުރަށް

ފީފާ ވޯލްޑް ކަޕްގެ ގުރޫޕު ކޭގައި ކޮންގޯއާ ދެކޮޅަށް ކުޅުނު މެޗުން މޮޅުވެ، ކޮލަމްބިއާ އިން މުބާރާތުގެ ދެ ވަނަ ބުރުން ޖާގަ ހޯދައިފި އެވެ.

ބުދަ ދުވަހުގެ ހެނދުނު ކުޅުނު މެޗު ކޮލަމްބިއާ އިން ކާމިޔާބު ކޮށްފައި ވަނީ 1-0 އިންނެވެ. މެޗުގައި ކޮލަމްބިއާ އިން ލަނޑު ޖެހީ ވެސް މެޗުގެ ދެ ވަނަ ހާފުގައި އެވެ.

މެޗު ފަށައިގެން ކޮލަމްބިއާ އިން ވަނީ ރަނގަޅަށް ކުޅެ، ލަނޑު ޖަހަން މަސައްކަތް ކޮށްފައި އެވެ. ނަމަވެސް، ކޮންގޯ ކޮޅަށް ލަނޑު ޖެހޭ ގޮތެއް ފުރަތަމަ ހާފުގައި ކޮލަމްބިއާ އަކަށް ނުވި އެވެ. މެޗުގެ ދެ ވަނަ ހާފު ފަށައިގެން ވެސް ރަނގަޅަށް ކުޅެ، ކޮލަމްބިއާ އިން ލީޑު ނެގި އެވެ. އެގޮތުން މެޗުގެ 76 ވަނަ މިނެޓުގައި ކޮލަމްބިއާ އަށް ލީޑު ނަގައިދިނީ ޑެނިއެލް މުނޯޒް އެވެ. 

މެޗުން މޮޅުވެ ކޮލަމްބިއާ އިން ދެ ވަނަ ބުރުގެ ޖާާގަ ހޯދީ، ދެ މެޗުން ވެސް މޮޅުވެ ހަ ޕޮއިންޓާ އެކު އެވެ. ދެ ވަނައިގައި އޮތް ޕޯޗުގަލް އަށް ދެ މެޗުން ލިބެނީ ހަތަރު ޕޮއިންޓެވެ. ގުރޫޕުގެ ފަހު މެޗުގައި ޕޯޗުގަލްއާ ދެކޮޅަށް ކުޅޭއިރު، އެ މެޗުން ބަލި ނުވެ ފަރުޖައްސާލައިގެން ކޮލަމްބިއާ އަށް ގުރޫޕުގެ އެއް ވަނަ ހޯދޭނެ އެވެ.