ގާނާ އަތުން އިންގްލެންޑަށް މޮޅު ނުވެވުނު
އެއް ވަަނައިގައި އޮތް އިންގްލެންޑާއި ދެ ވަނައިގައި އޮތް ގާނާ އަށް ވެސް ލިބެނީ ހަތަރު ޕޮއިންޓު. އިންގްލެންޑަށް ކުރި ލިބެނީ ފައިދާ ލަނޑުން.
އިންގްލެންޑާއި ގާނާ ބައްދަލު ކުރި މެޗުގެ ތެރެއިން. | ރޮއިޓާސް
ފީފާ ވޯލްޑް ކަޕްގެ ގުރޫޕު އެލްގައި ގާާނާ އާއި އިންގްލެންޑު ބައްދަލު ކުރި މެޗު އެއްވަރު ވެގެން ނިމިއްޖެ އެވެ.
އަންގާރަ ދުވަހުގެ ރޭ ދަންވަރު ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. ގާނާއާ ދެކޮޅަށް ކުޅުނު މެޗުން މޮޅުވެ، މުބާރާތުގެ ކުރިއަށް އޮތް ބުރުން ޖާގަ ހޯދުމުގެ ފުރުސަތު އިންގްލެންޑަށް އޮތެވެ.
މެޗު ފަށައިގެން ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނުނުއިރު، ދެ ޓީމުން ވެސް ވަނީ ލަނޑު ޖަހަން މަސައްކަތް ކޮށްފަ އެވެ. ނަމަވެސް، މެޗުގެ ދެ ވަނަ ހާފުގައި އިންގްލެންޑަށް ވަނީ ލަނޑު ޖަހަން ރަނގަޅު ފުރުސަތު ތަކެއް ލިބިފަ އެވެ. އެގޮތުން އިންގްލެންޑުގެ ކެޕްޓަން ހެރީ ކޭން އަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ. އަނެއްކޮޅުން ގާނާ އިން ވެސް ވަނީ ލަނޑު ޖަހަން ފުރުސަތު ހޯދައިފަ އެވެ.
މުބާރާތުގައި އިންގްލެންޑުގެ ފުރަތަމަ މެޗުގައި ވަނީ ކްރޮއޭޝިއާ ބަލިކޮށްފައި އެވެ. ގާނާގެ ފުރަތަމަ މެޗުގައި ޕަނަމާ ބަލިކޮށްފައިވާއިރު، ދެ ޓީމަށް ވެސް މުބާރާތުގެ އަނެއް ބުރުން ޖާގަ ހޯދުމުގެ ފުރުސަތު އެބަ އޮތެވެ. އެއް ވަަނައިގައި އޮތް އިންގްލެންޑާއި ދެ ވަނައިގައި އޮތް ގާނާ އަށް ވެސް ލިބެނީ ހަތަރު ޕޮއިންޓެވެ. އިންގްލެންޑަށް ކުރި ލިބެނީ ފައިދާ ލަނޑުންނެވެ.
އިންގްލެންޑުގެ ފަހު މެޗުގައި އެ ޓީމު ނިކުންނާނީ ޕެނެމާއާ ދެކޮޅަށެވެ. އަދި ގާނާގެ ފަހު މެޗުގައި އެ ޓީމު ނިކުންނާނީ ކްރޮއޭޝިއާއާ ދެކޮޅަށެވެ.
