ޕެނަމާ ބަލިކޮށް، ކްރޮއޭޝިއާ އިން ދެ ވަނަ ބުރުގެ އުންމީދުގައި

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ސްޓޭޖުގައި ޕެނަމާއާ ދެކޮޅަށް ކުޅުނު މެޗުން މޮޅުވެ، ކްރޮއޭޝިއާ އިން މުބާރާތުގެ ދެ ވަނަ ބުރުގެ އުންމީދު ހޯދައިފި އެވެ.

ބުދަ ދުވަހުގެ ފަތިހު ކުޅުނު މެޗު ކްރޮއޭޝިއާ އިން ކާމިޔާބު ކުރީ 1-0 އިންނެވެ. މެޗުގައި ކްރޮއޭޝިއާ އިން އެ ޓީމުގެ ލަނޑު ޖެހީ ވެސް ދެ ވަނަ ހާފުގައި އެވެ. 

މެޗު ފަށައިގެން ދެ ޓީމުން ވެސް ރަނގަޅަށް ކުޅެމުން ދިޔައިރު، ލަނޑު ޖަހާނެ ފުރުސަތު ވެސް ލިބިފައިވެ އެވެ. ޕެނަމާ އަށް ލީޑު ނަގައިދޭން ލިބުނު ފުރުސަތުގައި އެ ޓީމުން ފޮނުވާލި ހަމަލާތައް ކްރޮއޭޝިއާގެ ގޯލު ކީޕަރު މަތަ ކުރި އެވެ. ކްރޮއޭޝިއާ އިން ވެސް ވަނީ ލަނޑު ޖަހަން ހަމަލާއެއް އުފައްދައިފަ އެވެ.

މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި ކްރޮއޭޝިއާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ކްރޮއޭޝިއާ އަށް ޖަހައިދިނީ އަންޓޭ ބުޑިމީރް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖޯސިޕް ސްޓަނިސިޗް އެވެ. 

މޮޅާ އެކު ކްރޮއޭޝިއާ އިން ގުރޫޕު އެލްގެ ތިން ވަނައިގައި އޮތީ ތިން ޕޮއިންޓާ އެކު އެވެ. ދެ ވަނައިގައި އޮތް ގާނާ އަށް ހަތަރު ޕޮއިންޓު ލިބޭއިރު، ފަހު މެޗުގައި ބައްދަލު ކުރާނީ މި ދެ ޓީމެވެ. އެ މެޗުން މޮޅުވެގެން ކްރޮއޭޝިއާ އަށް ދެ ވަނަ ބުރުން ޖާގަ ލިބޭނެ އެވެ. އެ މެޗުން ބަލި ނުވެ ފަރުޖައްސާލައިގެން ގާނާ އަށް ދެ ވަނަ ބުރުގެ ޖާގަ ހޯދޭނެ އެވެ.