ލުބުނާނުގައި އިސްރާއީލުގެ ހަމަލާއެއްގައި ދެ މީހަކު މަރުވެއްޖެ

ލުބުނާނުގެ ދެކުނުގައި އަންގާރަ ދުވަހު އިސްރާއީލު ސިފައިން ދިން ބަޑީގެ ހަމަލާތަކެއްގައި ދެ މީހަކު މަރުވެފައިވާ ކަމަށް އެ ގައުމުގެ ސިވިލް ޑިފެންސާއި ދައުލަތުގެ މީޑިއާއިން ރިޕޯޓްކޮށްފިއެވެ. މިއީ ވޭތުވެދިޔަ ތިން ދުވަހުގެ ތެރޭގައި އިސްރާއީލުގެ ހަމަލާއެއްގައި ލުބުނާނުން މީހަކު މަރުވި ކަމަށް ރިޕޯޓްކުރި ފުރަތަމަ ފަހަރެވެ.

އީރާނުގެ މަދަދުލިބޭ ހިޒްބުالله ޖަމާއަތާއި އިސްރާއީލު ސިފައިންނާ ދެމެދު ލުބުނާނުގެ ދެކުނުގައި އާދީއްތަ ދުވަހުން ފެށިގެން ހަމަލާބަދަލުކުރުން ހުއްޓާލުމުގެ އެއްބަސްވުމަކަށް އަމަލުކުރަމުންދާއިރު، މިއީ އެމެރިކާއާއި އީރާނާ ދެމެދު އުފެދިފައިވާ ހަމަނުޖެހުންތަކުގެ ތެރެއިން ފެށުނު މި ހަނގުރާމައިގައި މިހާތަނަށް ހަމަލާތައް މެދުކެނޑިފައި އޮތް އެންމެ ދިގު މުއްދަތެވެ.

ލުބުނާނުގެ ދައުލަތުގެ ނިއުސް އެޖެންސީ (އެން.އެން.އޭ) އިން ރިޕޯޓްކޮށްފައިވާ ގޮތުގައި، އިސްރާއީލު ސިފައިން ބަޑިޖަހާފައިވަނީ ލުބުނާނުގެ ދެކުނުގެ ނަބަތިއްޔާ އަލް-ފައުގާގެ އަލް-ދައިރު އަވަށުގައި ބުލްޑޯޒަރެއް ބޭނުންކޮށްގެން މަގެއް ސާފުކުރަން ތިބި ބަޔަކަށެވެ.

މި ހާދިސާއާ ގުޅޭ ރިޕޯޓްތައް ބަލަމުން އަންނަ ކަމަށް އިސްރާއީލުގެ އަސްކަރިއްޔާއިން ވަނީ ބުނެފައެވެ.

މިދިޔަ ހަފުތާގައި އެމެރިކާއާއެކު ސޮއިކުރި ވަގުތީ އެއްބަސްވުމެއްގެ ދަށުން، އިސްރާއީލުން ލުބުނާނަށް ދޭ ހަމަލާތައް ހުއްޓާލުމަށް އީރާނުން ވަނީ ބާރުއަޅާފައެވެ.

ޕާކިސްތާނާއި ގަތަރު މެދުވެރިވެގެން ސްވިޒަލޭންޑުގައި އެމެރިކާއާއި އީރާނާ ދެމެދު ކުރިއަށްދިޔަ މަޝްވަރާތަކަށްފަހު ހޯމަ ދުވަހު ނެރުނު ގުޅިފައިވާ ބަޔާނެއްގައި ބުނެފައިވަނީ، ލުބުނާނުގައި ހަމަލާބަދަލުކުރުން ހުއްޓާލުމަށް ވެފައިވާ އެއްބަސްވުމާ އެއްގޮތަށް އަމަލުކުރަމުންދާކަން ކަށަވަރުކުރުމަށްޓަކައި "ޑި-ކޮންފްލިކްޝަން ސެލް" އެއް އުފެއްދުމަށް ދެ ފަރާތުން އެއްބަސްވެފައިވާ ކަމަށެވެ.

އީރާނަށް ތާއީދުކޮށް ހިޒްބުالله އިން މާރިޗު މަހުގެ 2 ވަނަ ދުވަހު އިސްރާއީލަށް ހަމަލާދޭން ފެށިފަހުން، ލުބުނާނަށް އިސްރާއީލުން ދެމުންދާ ހަމަލާތަކުގައި މިހާތަނަށް 4،100 އަށްވުރެ ގިނަ މީހުން މަރުވެފައިވާ ކަމަށް ލުބުނާނުގެ ހެލްތު މިނިސްޓްރީން ބުނެއެވެ. މީގެ ތެރޭގައި 773 އަންހެނުންނާއި، ކުޑަކުދިންގެ އިތުރުން ސިއްހީ ޚިދުމަތްތެރިން ހިމެނެއެވެ. ނަމަވެސް މަރުވި މީހުންގެ ތެރޭގައި ހިމެނޭ ހަނގުރާމަވެރިންގެ އަދަދެއް އެ މިނިސްޓްރީން ހާމަކޮށްފައެއް ނުވެއެވެ.

ލުބުނާނުގެ ކަމާބެހޭ އިދާރާތަކުން ހާމަކޮށްފައިވާ ގޮތުގައި، އިސްރާއީލުގެ ހަމަލާތަކުގެ ސަބަބުން ލުބުނާނުގެ ގާތްގަނޑަކަށް 1.2 މިލިއަން މީހުން ވަނީ އެމީހުންގެ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން މަޖުބޫރުވެފައެވެ.

ހިޒްބުالله އާއެކު ކުރިއަށްދާ މި ކުރިމަތިލުންތަކުގައި އިސްރާއީލުން މަރުވި މީހުންގެ އަދަދަށް ބަލާއިރު، އޭގެ ތެރޭގައި މަދުވެގެން 32 ސިފައިންނާއި އިސްރާއީލުގެ 4 އާންމުން ހިމެނެއެވެ.