ލުބުނާން އަކީ އިސްރާއީލުގެ "ޕްލޭގްރައުންޑް" އެއް: ނޭޝަނަލް ސެކިއުރިޓީ މިނިސްޓަރ
ލުބުނާނުގައި ހިންގާ އަސްކަރީ އޮޕަރޭޝަންތައް ހުއްޓާލުމަށް އެމެރިކާއާއި އީރާނުން އެއްބަސްވި ނަމަވެސް، އެ ގައުމުގައި ހަރަކާތްތެރިވުމުގެ ފުރިހަމަ އިޚްތިޔާރު އިސްރާއީލަށް އޮންނަންޖެހޭނެ ކަމަށް އެ ގައުމުގެ އިސްވެރިން ވިދާޅުވެއްޖެ. މިކަމާ ގުޅިގެން ބޮޑުވަޒީރު ނަތަންޔާހޫއާއި ޑިފެންސް މިނިސްޓަރު ވިދާޅުވީ، އިސްރާއީލަށް ކުރިމަތިވާ ކޮންމެ ނުރައްކަލަކުން ސަލާމަތްވުމަށް ބޭނުންވާ ކޮންމެ ތަނެއްގައި އަސްކަރީ ފިޔަވަޅު އެޅުމުގެ މިނިވަންކަން އޮންނާނެ ކަމަށް.
2026 ވަނަ އަހަރުގެ ޖޫން މަހުގެ 18 ވަނަ ދުވަހު، ލުުބުނާނާ އިންވެގެން އޮންނަ އިސްރާއީލުގެ އުތުރު ސަރަހައްދު ކަމަށްވާ އަޕަރ ގަލީލީގައި، އިސްރާއީލު ސިފައިންގެ ހަމްވީ އުޅަނދެއް ފޯރިމަރަމުންދަނީ. | ގެޓީ އިމޭޖަސް
ލުބުނާނަކީ އިސްރާއީލުގެ "ޕްލޭގްރައުންޑް" އަކަށް ހަދަންޖެހޭ ކަމަށް އެ ގައުމުގެ ހަރުކަށި ފިކުރުގެ ނޭޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު ހޯމަ ދުވަހު ވިދާޅުވެއްޖެއެވެ. އޭނާ ވިދާޅުވީ އެމެރިކާގެ ފިއްތުންތައް ކުރިމަތިވި ނަމަވެސް، އިސްރާއީލުގެ އަސްކަރިއްޔާއިން ލުބުނާނުގައި ހިންގާ އޮޕަރޭޝަންތައް ކުރިއަށް ގެންދަންޖެހޭ ކަމަށެވެ.
އީރާނަށް ތާއީދުކުރާ ހިޒްބުالله ޖަމާއަތުން އިސްރާއީލަށް ރޮކެޓް ހަމަލާތަކެއް ދޭން ފެށުމާ ގުޅިގެން، މާރިޗު މަހުގެ ކުރީކޮޅުން ފެށިގެން އިސްރާއީލް ޑިފެންސް ފޯސަސް (އައި.ޑީ.އެފް) އިން ވަނީ ލުބުނާނުގެ ދެކުނުގައި އެ ގައުމުގެ އަސްކަރީ ހަރަކާތްތައް ފުޅާކޮށްފައެވެ. އީރާނުގެ ވެރިރަށް ތެހެރާނުން މިހާރު ވަނީ އެމެރިކާއާއެކު ކުރިއަށްދާ ސުލްހައިގެ ވާހަކަތަކުގައި ލުބުނާނުގެ ހަނގުރާމަ ހުއްޓާލުމަކީ މައިގަނޑު ޝަރުތެއްގެ ގޮތުގައި ކަނޑައަޅާފައެވެ. މިއާއެކު އެމެރިކާގެ ރައީސް ޑޮނަލްޑް ޓްރަމްޕް ވަނީ އިސްރާއީލުން ލުބުނާނަށް ދެމުންދާ ވައިގެ ހަމަލާތައް ކުށްވެރިކުރައްވާފައެވެ.
ނޫސްވެރިންނާ ވާހަކަދައްކަވަމުން ބެން-ގްވީރު ވިދާޅުވީ، ލުބުނާނުގައި ހަނގުރާމަ ހުއްޓާލުމަށް އިސްރާއީލަށް އެއްބަސްނުވެވޭނެކަން ރައީސް ޓްރަމްޕަށް ސާފުކޮށްދޭންޖެހޭ ކަމަށެވެ. އިސްރާއީލުން އަލުން އަސްކަރީ އޮޕަރޭޝަންތައް ފެށި ފަހުން ލުބުނާނުން މިހާތަނަށް 4,000 އަށްވުރެ ގިނަ މީހުން ވަނީ މަރުވެފައެވެ. މީގެ އިތުރުން އިސްރާއީލުގެ ސިފައިން ލުބުނާނުން ފޭބުމަކީ ހިޒްބުالله އަށް އަލުން ހަތިޔާރު އެޅުމަށް ލިބޭ ފުރުސަތަކަށް ވާނެތީ، ސިފައިން ބާލައިގެން ނުވާނެ ކަމަށްވެސް އޭނާ ވިދާޅުވިއެވެ.
ލުބުނާނަކީ "ޓެރަރިޒަމަށް ތާއީދުކުރާ ގައުމެއް" ގޮތުގައި ސިފަކުރައްވަމުން ބެން-ގްވީރު ވިދާޅުވީ، ލުބުނާނަކީ އިސްރާއީލުގެ ކުޅޭބިމަކަށް ހަދައިފިނަމަ މަދު އަދަދެއްގެ ސިފައިންނާއެކުވެސް ނަތީޖާ ނެރެވިދާނެ ކަމަށެވެ. މީގެ ކުރިން ހިޒްބުالله އިން ދިން ހަމަލާތަކަކާ ގުޅިގެން އެކްސްގައި ކުރި ޕޯސްޓެއްގައި އޭނާ ވަނީ "މުޅި ލުބުނާނު އަންދާލަންޖެހޭ" ކަމަށްވެސް ވިދާޅުވެފައެވެ.
އެމެރިކާއާއި އީރާނާ ދެމެދު މިދިޔަ ހަފުތާގައި ސޮއިކުރި ފަހުމުނާމާގެ ދަށުން، ލުބުނާނު ހިމެނޭހެން ހުރިހާ ފްރަންޓްލައިންތަކެއްގައި އަސްކަރީ އޮޕަރޭޝަންތައް "ވަގުތުން އަދި ދާއިމީކޮށް ހުއްޓާލުމަށް" ދެ ފަރާތުން ވަނީ އިޢުލާންކޮށްފައެވެ.
ސްވިޒަލޭންޑުގައި އީރާނާއެކު ބޭއްވި މަޝްވަރާތަކުގައި ލުބުނާނުގެ ހަމަނުޖެހުންތައް ހުއްޓުވުމާ ގުޅޭގޮތުން "ވަރަށް ރަނގަޅު ކުރިއެރުންތަކެއް" ލިބިފައިވާ ކަމަށް އެމެރިކާގެ ނައިބު ރައީސް ޖޭ.ޑީ. ވޭންސް ހޯމަ ދުވަހު ވިދާޅުވިއެވެ. މި މަޝްވަރާތަކުގައި މެދުވެރިއެއްގެ ދައުރު އަދާކުރާ ގަތަރާއި ޕާކިސްތާނުން ނެރުނު ގުޅިފައިވާ ބަޔާނެއްގައި ބުނެފައިވަނީ، ހަމަނުޖެހުންތައް ކުޑަކުރުމަށްޓަކައި "ޑީކޮންފްލިކްޝަން ސެލް" އެއް އުފެއްދުމަށް ދެ ފަރާތުން އެއްބަސްވެފައިވާ ކަމަށާއި، މިކަމާ ގުޅޭ ފަންނީ މަޝްވަރާތައް މި ހަފުތާގައި ކުރިއަށްދާނެ ކަމަށެވެ.
ނަމަވެސް އިސްރާއީލުގެ ޑިފެންސް މިނިސްޓަރު އިސްރާއީލް ކަޓްޒް ވިދާޅުވީ، ލުބުނާނުގައާއި އަދި ބޭނުންވާ ކޮންމެ ތަނެއްގައި އަސްކަރީ ހަރަކާތް ހިންގުމުގެ "ފުރިހަމަ މިނިވަންކަން" އިސްރާއީލަށް އޮންނާނެ ކަމަށެވެ. ބޮޑުވަޒީރު ބެންޖަމިން ނަތަންޔާހޫވެސް ވަނީ ކުރިމަތިވާ ކޮންމެ ނުރައްކަލެއް ހުއްޓުވުމަށް އިސްރާއީލުގެ އަސްކަރިއްޔާއަށް ފުރިހަމަ އިޚްތިޔާރު އޮތް ކަމަށް ވިދާޅުވެފައެވެ.
ޓައިމްސް އޮފް އިސްރާއީލުން ރިޕޯޓްކޮށްފައިވާ ގޮތުގައި، މިކަމުގައި އައި.ޑީ.އެފް އަށް އެއްވެސް ހުރަހެއް ނެތް ކަމަށް ނަތަންޔާހޫ ވަނީ ވިދާޅުވެފައެވެ. އިސްރާއީލުގެ ސިޔާސީ ފަރާތްތަކުން ވަނީ އެމެރިކާއާއި އީރާނުން އެކުލަވާލި ސުލްހައިގެ މަގުޗާޓަކީ އިސްރާއީލުގެ ހަނގުރާމައިގެ މަގްސަދުތައް ހާސިލްކުރުމަށް އެހީތެރިވެދޭނެ އެއްޗެއް ނޫން ކަމަށް ބުނެ އެކަމަށް ފާޑުކިޔާފައެވެ.
