ލުބުނާންގައި ޙަރަކާތްތެރިވާ އީރާންގެ ގުރޫޕުތައް ވަގުތުން ހުއްޓާލަން ޖެހޭ، އެހެން ނޫނީ ހަމަލާ ދޭން ފަށާނަން: ޓްރަމްޕް

ލުބުނާންގައި ޙަރަކާތްތެރިވާ އީރާންގެ މަދަދު ލިބޭ، ނުވަތަ ޕްރޮކްސީ ގުރޫޕުތައް ވަގުތުން ހުއްޓާލަން ޖެހޭ ކަމަށާއި، އެހެން ނޫނީ އީރާން އަށް އަލުން ހަމަލާ ދޭން ފަށާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ރޮއިޓާސް ނޫސް އެޖެންސީ އިން ރިޕޯޓު ކޮށްފައިވާ ގޮތުގައި ޓްރަމްޕް މި އިންޒާރު ދެއްވާފައި ވަނީ މެދު އިރުމަތީގެ ސަރަހައްދުގައި ދެމެހެއްޓެނިވި ގޮތެއްގައި ހިނގަމުންދާ ނުތަނަވަސްކަމާ ގުޅިގެންނެވެ. 

އެގޮތުން ޓްރަމްޕް ވަނީ އީރާން އިން ލުބުނާންގައި ހިންގާ އޮޕަރޭޝަންތައް ވަގުތުން ހުއްޓާލުމަށް ގޮވާލައްވައި، އިންޒާރު ދެއްވައިފަ އެވެ. ޓްރަމްޕް ވިދާޅުވީ އީރާން އިން އެ ސަރަހައްދުގައި ހިންގަމުން އަންނަ އެންމެހާ ޙަރާކާތް ތަކެއް ވަގުތުން ހުއްޓާލަން ޖެހޭނެ ކަަމަށާއި، އެހެން ނޫން ނަމަ އެމެރިކާ އިން އަލުން އީރާން އަށް ހަމަލާތައް ދޭން ފަށާނެ ކަމަށެވެ. 

ޓްރަމްޕް މިފަދަ އިންޒާރެއް ދެއްވާފައި މި ވަނީ މެދު އިރުމަތީގެ ސަރަހައްދުގައި ހަލަބޮލިކަން އިތުރު ވަމުން އަންނަ ދަނޑިވަޅެއްގައި އެވެ. އީރާން އާއި އެމެރިކާއާ ދެމެދު އޮތް ގުޅުން މިހާރު ވަރަށް ބޮޑަށް ގޯސްވެފައިވާއިރު، އީރާން އިން ލުބުނާންގައި ހިންގާ އޮޕަރޭޝަންތަކާ މެދު އެމެރިކާ އިން އަބަދު ވެސް ވަރަށް ބޮޑު ކަންބޮޑުވުމެއް ގެންގުޅެ އެވެ. 

ބައިނަލްއަޤުވާމީ ތަޖުރިބާކާރުން ބުނާ ގޮތުގައި، އެމެރިކާާ އިން އަލުން ހަމަލާ ތަކެއް ދީފި ނަމަ، ސަރަހައްދުގައި ވަރަށް ބޮޑު އަދި ނުރައްކާތެރި ހަނގުރާމައެއް ފެށިދާނެ ކަމުގެ ބިރުވެރިކަން އެބަ އޮތެވެ. އަނެއްކޮޅުން މި ދަނޑިވަޅަކީ އެމެރިކާ އާއި އީރާންއާ ދެމެދު ފުޅާ ދާއިރާއެއްގައި ވާހަކަ ދެކެވި، ގިނަ މަޝްވަރާ ތަކެއް ވެސް ކުރެވެމުން އަންނަ ދަނޑިވަޅެކެވެ. 

އެމެރިކާ އިން އަބަދު ވެސް ބުނަމުން އަންނަނީ އީރާން އިން ލުބުނާންގައި ހިންގަމުން އަންނަ އޮޕަރޭޝަން ތަކުގެ ސަބަބުން، އެ ސަރަހައްދުގެ ސަލާމަތާއި ރައްކާާތެރި ކަމަށް ބޮޑު ނުރަކާ އޮންނަ ކަމަށެވެ. އެމެރިކާ އާއި އީރާންއާ ދެމެދު އެކުލަވާލާފައިވާ އެއްބަސްވުމުގައި، އިޒްރޭލް އިން ލުބުނާން އަށް ދެމުން އަންނަ ހަމަލާތައް ހުއްޓާލުމަށް އީރާން އިން ވަނީ ހިމަނައިފަ އެވެ. އަދި އިޒްރޭލް އިން ލުބުނާާންގައި ހަމަލާ ދިނުމަކީ، އެއްްބަސްވުމާ ޚިލާފުވުން ކަމަށް ވެސް އީރާން އިން އަންނަނީ ބުނަމުންނެވެ. 

މި މައްސަލައާ ގުޅިގެން އީރާން އިން މިހާތަނަށް ރަސްމީކޮށް އެއްޗެއް ބުނެފައި ނުވެ އެވެ.