އެމެރިކާ އިން ކުރިން ބޮން އެޅި ނިއުކްލިއާ މަރުކަޒުތަކަށް، އދ. ގެ އިންސްޕެކްޓަރުންނަށް ވަނުމުގެ ހުއްދަ ނުދޭނެ ކަމަށް އީރާނުން ބުނެފި

އީރާނާ ދެކޮޅަށް އިސްރާއީލާއި އެމެރިކާއިން މިދިޔަ އަހަރު ހިންގި ހަނގުރާމައިގެ ތެރޭގައި ބޮން އެޅި އީރާނުގެ ނިއުކްލިއާ މަރުކަޒުތަކަށް، އދ. ގެ ނިއުކްލިއާ ވޮޗްޑޮގްގެ އިންސްޕެކްޓަރުންނަށް ވަނުމުގެ ހުއްދަ ނުދޭނެ ކަމަށް އީރާނުން އަންގާރަ ދުވަހު ބުނެފިއެވެ.

އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަޣާއީ ވިދާޅުވީ، އިންޓަނޭޝަނަލް އެޓޮމިކް އެނާޖީ އެޖެންސީ (އައި.އޭ.އީ.އޭ) ގެ ޑައިރެކްޓަރ ޖެނެރަލްއާ ބައްދަލުކޮށްފައި ނުވާނެ ކަމަށާއި، އަދި އެމެރިކާއާއި ޒަޔަނިސްޓުންގެ އަސްކަރީ ހަމަލާތަކުގައި ގެއްލުން ލިބުނު އީރާނުގެ ނިއުކްލިއާ މަރުކަޒުތައް އެ އެޖެންސީން އިންސްޕެކްޓް ކުރުމުގެ އެއްވެސް ޕްލޭނެއް ނެތް ކަމަށެވެ.

އީރާނުގެ މި ނިންމުން ހާމަކޮށްފައި މިވަނީ، އދ. ގެ ނިއުކްލިއާ އިންސްޕެކްޓަރުން އެނބުރި އައުމަށް އީރާނުން ހުއްދަ ދޭނެ ކަމަށް އެމެރިކާގެ ނައިބު ރައީސް ޖޭ.ޑީ ވޭންސް ހޯމަ ދުވަހު ވިދާޅުވެ، އެއީ ލިބުނު "ބޮޑު ކުރިއެރުމެއް" ކަމަށް ސިފަކުރައްވާފައި ވަނިކޮށެވެ.