ފާރުގައި ހުރި ލިޔުން ތަކުން ވެސް، އަމިއްލަ އަށް އިސްތިއުފާ ދޭން ޖެހޭކަން ބޮޑު ވަޒީރަު ޤަބޫލު ކުރަން ޖެހޭ: އޭނާ ޑިކްސަން
22 ޖޫން 2026 | ހޯމަ 08:14އިނގިރޭސި ބޮޑުވަޒީރު ކިއާ ސްޓާމާ އަމިއްލަފުޅަށް މަގާމުން ދުރުވުމަށް ލޭބަރ ޕާޓީގެ މެންބަރު އޭނާ ޑިކްސަން ގޮވާލައްވައިފިއެވެ. ގައުމުގެ ހަމަޖެހުމަށްޓަކައި އޮމާންކަމާއެކު ވެރިކަން ބަދަލުކުރުމުގެ ތާވަލެއް އެކުލަވާލަންޖެހޭ ކަމަށާއި، ޕާޓީގެ އެތެރޭގެ ކޯޅުންތަކަކަށް ނުގޮސް އެންޑީ ބާންހަމްއާ ލީޑަރޝިޕް ހަވާލުކުރުމަކީ އެންމެ ރަނގަޅު ގޮތް ކަމަށް އޭނާ ފާހަގަކުރެއްވިއެވެ. ބާންހަމްއަކީ ސިޔާސީ ގޮތުން ތަޖުރިބާކާރު، ގައުމު ހިންގުމުގެ ގާބިލުކަން ހުރި ބޭފުޅެއްކަންވެސް ޑިކްސަން ފާހަގަކުރެއްވިއެވެ.
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ. | ގެޓީ އިމޭޖަސް
އިނގިރޭސިވިލާތުގެ ބޮޑު ވަޒީރު ކިއާ ސްޓާމާ މަގާމުން އިސްތިއުފާ ދެއްވަން ޖެހޭ ވަގުތު ޖެހިއްޖެކަން އެމަނިކުފާނަށް މިހާރު ގަބޫލު ކުރެއްވޭނެ ކަމަށް އުންމީދު ކުރައްވާ ކަމަށް ލޭބާ ޕާޓީގެ ޤާނޫނު ހަދާާ މަޖިލީހުގެ މެމްބަރު އޭނާ ޑިކްސަން ވިދާޅުވެއްޖެ އެވެ.
ބޮޑު ވަޒީރުގެ މަގާމަށް ދެން ވަޑައިގަންނަވާނެ ކަމަށް ބެލެވޭ އެންޑީ ބާންހަމް އަށް ތާއީދު ކުރައްވާ ޑިކްސަން މިހެން ވިދާޅުވީ، ބީބީސީ ރޭޑިއޯ 4 ގެ ޓުޑޭ ޕްރޮގްރާމުގައި ވާހަކަ ދައްކަވަމުންނެވެ.
ޑިކްސަން ވިދާޅުވީ ބޮޑު ވަޒީރު ކަމުން ވަކިވެ ވަޑައިގަންނަވަންވީ ވަގުތު ޖެހިއްޖެކަން ސްޓާމާ އަށް މިހާރު ސާފު ވާނެ ކަމަށާއި، މަގާމުން ދުރުވާން ޖެހޭނެކަން "ފާރުގައި ލިޔެފައިވާ ލިޔުން ތަކުން" ނުވަތަ ފެންނަން ހުރި ހެކި ތަކުން އެނގި ވަޑައިގަންނަވާނެ ކަމަށެވެ. އަދި ޕާޓީގެ އެތެރޭގެ އިންތިޚާބަކަށް ނުގޮސް، އަމިއްލަފުޅަށް މަގާމުން ދުރުވުމަށް އޭނާ ވަނީ ބޮޑު ވަޒީރަށް ގޮވާލައްވާފައި އެވެ.
މީގެ އިތުރުން ޤައުމުގެ ހަމަޖެހުން ގާއިމު ކުރުމަށްޓަކައި، ކުރިއަށް އޮތް ހަފުތާ ތަކެއް ނުވަތަ މަސް ތަކެއްގެ ތެރޭގައި ވެރިކަން ބަދަލު ކުރުމުގެ ތާވަލެއް ސްޓާމާ އެކުލަވާލައްވާނެ ކަމަށް އުންމީދު ކުރައްވާ ކަމަ ށްވެސް ޑިކްސަން ވިދާޅުވި އެވެ. އޭނާ ފާހަގަ ކުރެއްވި ގޮތުގައި ޤައުމަށް މިވަގުތު އެންމެ މުހިންމީ އޮމާންކަމާ އެކު ވެރިކަން ބަދަލުވުމެވެ. އަދި ލީޑާޝިޕް ކާމިޔާބު ކުރަން ބޭނުންވާ ބޭފުޅުން ބަހުސް ތަކުގައި އެކަކު އަނެކަކަށް ފާޑު ކިޔައި، ޕާޓީ ބައިބައިވާ މަންޒަރު ފެންނަން ބޭނުން ނުވާ ކަމަށް ވެސް އޭނާ ވިދާޅުވި އެވެ.
ލީޑާޝިޕް އިންތިޚާބަކާ ނުލައި، އެންޑީ ބާންހަމްއާ މަގާމު ހަވާލުކުރަން ބޭނުންވޭތޯ ސުވާލު ކުރުމުން ޑިކްސަން ވިދާޅުވީ، ބާންހަމް އަކީ ވޭތުވެދިޔަ 25 އަހަރު ދުވަހު ސިޔާސީ ދާއިރާގައި ކާމިޔާބު މަސައްކަތް ތަކެއް ކުރައްވާފައިވާ ބޭފުޅެއްކަން ސާބިތު ކޮށްދެއްވާފައިވާ ބޭފުޅެއް ކަމަށެވެ.
މީގެ އިތުރުން ބާންހަމް އަކީ މީގެ ކުރިން ކެބިނެޓު މިނިސްޓަރުކަން ކުރައްވާފައިވާ ބޭފުޅެއްގެ އިތުރުން، ފާއިތުވި ނުވަ އަހަރު ދުވަހު މޭޔަރެއްގެ ގޮތުގައި ބޮޑު ސިޓީއެއް ހިންގަވާފައިވާ ބޭފުޅެއްކަން ޑިކްސަން ފާހަގަ ކުރެއްވި އެވެ. އެހެންކަމުން ބާންހަމް އަކީ ގައުމުގެ ލީޑާޝިޕްއާ ހަވާލުވުމުގެ ގާބިލުކަން ހުރި، އިމްތިހާނު ތަކުން ފާސް ވެފައިވާ ބޭފުޅެއް ކަމަށް ޑިކްސަން ވިދާޅުވި އެވެ.
މަސްދަރު: ބީބީސީ
