އިނގިރޭސި ބޮޑުވަޒީރު ކިއަރ ސްޓާމަރގެ އިސްތިއުފާގެ ތަގުރީރުގައި ފާހަގަކުރެއްވި މުހިންމު ކަންތައްތައް

ލޭބާ ޕާޓީގެ ލީޑަރު ކަމުންނާއި ބޮޑުވަޒީރުގެ މަގާމުން އިސްތިއުފާ ދެއްވާނެ ކަން ކިއަރ ސްޓާމަރ ހޯމަ ދުވަހު އިއުލާން ކުރައްވައިފިއެވެ. ސްޓާމަރ މި ނިންމެވުން ނިންމެވީ، ކުރިއަށް އޮތް އާންމު އިންތިޚާބުގައި އިސްކޮށް ހުންނެވުމަށް އެންމެ އެކަށީގެންވާ ބޭފުޅަކީ އޭނާ ކަމަށް ޕާޓީން ގަބޫލުނުކުރާކަން ގަބޫލުކުރެއްވުމަށްފަހުގައެވެ.

އޭނާގެ އިސްތިއުފާގެ ތަގުރީރުގައި ފާހަގަކުރެއްވި މުހިންމު ކަންތައްތަކަކީ:

• ބޮޑުވަޒީރުގެ މަގާމާ ހަވާލުވެވަޑައިގަތުމަކީ އޭނާގެ ހަޔާތުގައި ލިބުނު އެންމެ ފަޚުރުވެރި ވަގުތު ކަމަށް ސްޓާމަރ ސިފަކުރެއްވިއެވެ.

• އޭނާ ވިދާޅުވީ ލޭބާ ޕާޓީއާ ހަވާލުވިއިރު އޮތީ ސިޔާސީ ގޮތުންނާއި، މާލީ ގޮތުން އަދި އަޚުލާގީ ގޮތުން ބަނގުރޫޓުވެފައި ކަމަށާއި، އެ ޕާޓީ "ނިމިފައިވާ" ކަމަށް ތަކުރާރުކޮށް އޭނާ ގާތު މީހުން ބުނަމުންދިޔަ ކަމަށެވެ.

• ކުރިއަށް އޮތް އިންތިޚާބުގައި ޕާޓީގައި އިސްކޮށް ހުންނެވުމަށް އެންމެ އެކަށީގެންވާ ބޭފުޅަކީ އޭނާތޯ ޕާޓީގެ ތެރޭގައި ސުވާލު އުފެދިފައިވާ ކަމަށާއި، އެ ސުވާލުގެ "ޖަވާބު ލިބިއްޖެ" ކަމަށް ސްޓާމަރ ވިދާޅުވިއެވެ. އަދި އެ ނިންމުން އޭނާ ގަބޫލުކުރައްވަނީ ވަރަށް ފުރިހަމަ އިހުތިރާމާއެކު ކަމަށްވެސް ވިދާޅުވިއެވެ.

• ރަސްގެފާނާ މިހާރު ވާހަކަދައްކަވާފައިވާ ކަމަށާއި، އޭނާގެ ބަދަލުގައި އާ ލީޑަރަކު ހޮވުމުގެ މަރުހަލާއެއް ކުރިއަށްދާނަމަ، ސެޕްޓެމްބަރު މަހު ޕާލަމެންޓް އަލުން ހުޅުވުމުގެ ކުރިން ލޭބާ ޕާޓީގެ އާ ލީޑަރަކު ކަނޑައެޅޭނެ ކަމަށް ސްޓާމަރ އިއުލާން ކުރެއްވިއެވެ.

• ބޮޑުވަޒީރު އިތުރަށް ވިދާޅުވީ، ބާރުތައް ބަދަލުކުރުމުގެ ކަންކަން ތަރުތީބުން ކުރިއަށް ގެންދިއުމަށް ކުރެވެން ހުރި ހުރިހާ މަސައްކަތެއް ކުރައްވާނެ ކަމަށާއި، އޭނާގެ ބަދަލުގައި ވަޑައިގަންނަވާ ބޭފުޅަކަށް ފުރިހަމަ އެއްބާރުލުން ދެއްވާނެ ކަމަށެވެ.

• ތަގުރީރު ނިންމަވާލައްވަމުން ވަރަށް އަސަރާއެކު ސްޓާމަރ ވިދާޅުވީ، ދެން އޭނާ ވެގެންދާނީ އޭނާގެ "ފުރިހަމަ އަނބިކަނބަލުންނަށާއި" "ލޯބިވާ ދަރިންނަށް" އެންމެ ރަނގަޅު ފިރިމީހާ އަދި ބައްޕައަށް ކަމަށެވެ. މިހެން ވިދާޅުވުމަށްފަހު އަނބިކަނބަލުންގެ ގައިގައި ބައްދާލެއްވުމަށްފަހު އޭނާ ވަނީ ނަންބަރު 10 (ބޮޑުވަޒީރުގެ ރަސްމީ ގެކޮޅު) އަށް ވެދެވަޑައިގެންފައެވެ.

މިއަދު ހެނދުނުގެ ވަގުތެއްގައި ބޮޑުވަޒީރު ވަނީ ރަސްގެފާނާ ވާހަކަދައްކަވައި، އިސްތިއުފާ ދެއްވާކަން އަންގަވާފައެވެ.

އެ ބޭފުޅުން ވާހަކަދެއްކެވީ ފޯނުންނެވެ.

އޭނާ ވިދާޅުވި ގޮތުގައި، އޭނާގެ ބަދަލުގައި މަގާމާ ހަވާލުވާ ބޭފުޅަކަށް ލިބިވަޑައިގަންނަވާނީ މީގެ ދެ އަހަރު ކުރިއަށްވުރެ ވަރުގަދަ އަދި އިންސާފުވެރި އިނގިރޭސިވިލާތެކެވެ.

މީގެ އިތުރުން، ވޭތުވެދިޔަ ހަ އަހަރު ދުވަހު އޭނާގެ އަރިހުގައި މަސައްކަތް ކުރެއްވި އެކުވެރިންނާއި އެކިއެކި ބޭފުޅުންނަށާއި، ބޮޑުވަޒީރުގެ އޮފީހުގެ މުވައްޒަފުންގެ އިތުރުން "ޚިދުމަތްތެރި ސިވިލް ސާވިސް" އަށް ސްޓާމަރ ޝުކުރު އަދާކުރެއްވިއެވެ.