ފަހަތުން އަރައި ޖޯޑަން ބަލިކޮށް، އަލްޖީރިއާ އިން އުންމީދު ދަމަހައްޓައިފި

ފީފާ ވޯލްޑް ކަޕްގެ ގުރޫޕު ޖޭގައި ޖޯޑަންއާ ދެކޮޅަށް ކުޅުނު މެޗުން، ފަހަތުން އަރައި އަލްޖީރިއާ މޮޅުވެއްޖެ އެވެ. 

އަންގާރަ ދުވަހުގެ ހެނދުނު ކުޅުނު މެޗު އަލްޖީރިއާ އިން ކާމިޔާބު ކުރީ 2-1 އިންނެވެ. އެއީ މެޗުގައި ޖޯޑަން އިން ލަނޑު ޖަހައި ކުރި ހޯދާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ. 

މެޗު ފަށައިގެން ދެ ޓީމުން ވެސް ހަމަހަމަ ކުޅުމެއް ކުޅެމުން ދިޔައިރު، ފުރަތަމަ ހާފުގެ 36 ވަނަ މިނެޓުގައި ޖޯޑަން އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޖޯޑަން އަށް ޖަހައިދިނީ ނިޒާރު އަލް ރަޝްދާން އެވެ.

ނަމަވެސް، މެޗުގެ ދެ ވަނަ ހާފުގެ 69 ވަނަ މިނެޓުގައި އަލްޖީރިއާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފައި އެވެ. އެ ލަނޑު އަލްޖީރިއާ އަށް ޖަހައިދިނީ ނާދިރް ބެންބޯލީ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ކެޕްޓަން ރިޔާދް މަހްރޭޒް އެވެ.

އޭގެ ފަހުން މެޗުގެ ފުރިހަމަ ވަގުތު ހަމަވާން އަށް މިނެޓަށް ވެފައި ވަނިކޮށް އަމީން ގޯރީ ވަނީ އަލްޖީރިއާގެ ދެ ވަނަ ލަނޑު ޖަހައި މެޗުން އެ ޓީމު މޮޅު ކޮށްދީފައި އެވެ. 

މުބާރާތުގައި ޖޯޑަންގެ ފުރަތަމަ މެޗުގައި އޮސްޓްރިއާ އަތުން ބަލިވެފައިވާއިރު، ދެ ވަނަ މެޗުން ވެސް ބަލިވެ އެ ޓީމު ވަނީ މުބާރާތުން ކަޓައިފަ އެވެ. ފުރަތަމަ މެޗުގައި އާޖެންޓީނާ އަތުން ބަލިވި ނަމަވެސް، ޖޯޑަން ބަލިކޮށް އަލްޖީރިއާ އިން ވަނީ އުންމީދު ހޯދައިފަ އެވެ. ފަހު މެޗުގައި އޮސްޓްރިއާ އަތުން މޮޅުވެ، އަލްޖީރިއާ އަށް އަނެއް ބުރުން ޖާގަ ހޯދުމުގެ ފުރުސަތު އޮންނާނެ އެވެ.

މިއީ 2014 ވަނަ އަހަރުގެ ފަހުން އަލްޖީރިއާ އިން ކުޅޭ ފުރަތަމަ ވޯލްޑް ކަޕް އެވެ. 2018 އަދި 2022 ވަނަ އަހަރުގެ ވޯލްޑް ކަޕަށް އަލްޖީރިއާ ކޮލިފައިވެފައި ނުވެ އެވެ.