ހާލަންޑުގެ މޮޅު ކުޅުމާ އެކު، ސެނެގާލް ބަލިކޮށް ނޯވޭ އަނެއް ބުރަށް

ފީފާ ވޯލްޑް ކަޕްގެ ގުރޫޕު އައިގައި ސެނެގާލްއާ ދެކޮޅަށް ކުޅުނު މެޗުން މޮޅުވެ، ނޯވޭ އިން މުބާރާތުގެ ގަދަ 32 އިން ޖާގަ ކަށަވަރު ކޮށްފި އެވެ.

އަންގާރަ ދުވަހުގެ ފަތިހު ކުޅުނު މެޗު ނޯވޭ އިން ކާމިޔާބު ކޮށްފައި ވަނީ 3-2 އިންނެވެ. މެޗުގެ ފުރަތަމަ ހާފުގައި ނޯވޭ އިން އެއް ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގައި އެވެ. 

މެޗު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނުއިރު، ފުރަތަމަ ހާފުގެ ފަހު ވަގުތުގައި ނޯވޭ އިން ލަނޑު ޖަަހައި ލީޑު ނެގި އެވެ. އެގޮތުން ފުރަތަމަ ހާފުގެ 43 ވަނަ މިނެޓުގައި ނޯވޭ އަށް ލީޑު ނަގައިދިނީ މާކަސް ޕެޑަސަން އެވެ.

އޭގެ ފަހުން މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި އާލިން ހާާލަންޑް ވަނީ ނޯވޭގެ ދެ ވަނަ ލަނޑު ޖަހައިފަ އެވެ. ނޯވޭ އިން ދެ ލަނޑު ޖެހި ފަހުން، މެޗުގެ 53 ވަނަ މިނެޓުގައި ސެނެގާލްގެ ފުރަތަމަ ލަނޑު ޖެހީ އިސްމާއިލާ ސާ އެވެ. 

އޭގެ ތިން މިނެޓު ފަހުން ހާލަންޑް ވަނީ އޭނާގެ ދެ ވަނަ ލަނޑު ޖަހައި ނޯވޭގެ ލީޑު ފުޅާ ކޮށްފައި އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ސެނެގާލްގެ ދެ ވަނަ ލަނޑު ޖެހީ ސާ އެވެ. 

މޮޅާ އެކު ނޯވޭ އިން މުބާރާތުގެ ގަދަ 32 ވަނަ ބުރުގެ ޖާާގަ ހޯދީ، ހަ ޕޮއިންޓާ އެކު ދެ ވަނައިގައި އެވެ. ގުރޫޕު ސްޓޭޖުގައި ބާކީ ނޯވޭ އަށް އޮތީ ފްރާންސްއާ ދެކޮޅަށް ކުޅޭ މެޗެވެ. މިއީ 1998 ވަނަ އަހަރުގެ ފަހުން ނޯވޭ އިން ވޯލްޑް ކަޕްގައި ވާދަ ކުރާ ފުރަތަމަ ފަހަރެވެ.