އީރާނުން ހުރްމުޒް ކަނޑުއޮޅީގެ ކޮންޓްރޯލް ދޫނުކުރާނެ ކަމަށް ބުނެފި
ސްވިޒަލޭންޑުގައި އެމެރިކާއާއެކު ކުރިއަށްދިޔަ މަޝްވަރާތަކަކީ ހަނގުރާމަ ހުއްޓާލުމަށް އެޅުނު މުހިންމު ބިންގަލެއް ކަމަށް އެމެރިކާގެ ނައިބު ރައީސް ވިދާޅުވި ނަމަވެސް، ހުރްމުޒް ކަނޑުއޮޅީގެ ކޮންޓްރޯލާއި ނިއުކްލިއާ މައްސަލައިގައި އަދިވެސް ގޮތްތަކެއް ނުނިންމޭ. މި މަޝްވަރާތަކަށްފަހު ނިއުކްލިއާ މައްސަލަތަކާއި ދަތިކުރުމުގެ ފިޔަވަޅުތަކާ ގުޅޭގޮތުން މަސައްކަތް ކުރާނެ ޚާއްޞަ ގްރޫޕްތަކެއް އެކުލަވާލުމަށް ވަނީ ނިންމާފައި. އެހެންނަމަވެސް، ހުރްމުޒް ކަނޑުއޮޅި އެއްވެސް ޝަރުތަކާ ނުލައި ހުޅުވާލުމަށް އެމެރިކާއިން ބާރުއެޅި ނަމަވެސް، އެ ސަރަހައްދު ބަލަހައްޓާނީ އީރާނުން ކަމަށް ބުނެ އެ ގައުމުން ވަނީ އެކަމަށް ދެކޮޅު ހަދާފައި.
އީރާނުގެ އަސްކަރިއްޔާއިން ބަންދުކޮށްފައިވާ ހުރްމުޒް ކަނޑުއޮޅިން ދަތުރުކުރަން އުޅުމުގެ ތެރޭގައި، އޮޅިގެން ނުބައި މަގަކުން ދެވުމުގެ ސަބަބުން ފަރަށް އެރި ދެކުނު ކޮރެއާގެ ކޮންޓޭނަރު އުފުލާ މަނަވަރު ސަލާމަތްކުރުމުގެ މަސައްކަތް ކުރަނީ. | ގެޓީ އިމޭޖަސް
ސްވިޒަލޭންޑުގައި އެމެރިކާއާއެކު ދާދި ފަހުން ނިމިގެންދިޔަ މެދުއިރުމަތީގެ ހަނގުރާމައިގެ މަޝްވަރާތަކުގައި އެންމެ ބޮޑު ބަހުސެއް އުފެދުނު އެއް މައްސަލަ ކަމަށްވާ ހުރްމުޒް ކަނޑުއޮޅީގެ ކޮންޓްރޯލް ދޫނުކުރާނެ ކަމަށް އީރާނުން އަންގާރަ ދުވަހު ބުނެފިއެވެ.
މި ހަނގުރާމަ ހުއްޓާލުމަށްޓަކައި އެކުލަވާލާ ފައިނަލް އެއްބަސްވުމަކަށް ދިއުމަށް މި މަޝްވަރާތަކަކީ "ވަރަށް ރަނގަޅު ބިންގަލެއް" ކަމަށް އެމެރިކާގެ ނައިބު ރައީސް ޖޭޑީ ވޭންސް ވަނީ ސިފަކުރައްވާފައެވެ. އަދި އީރާނުގެ ތެލާ ދެކޮޅަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތައް މިދިޔަ ހޯމަ ދުވަހު މެދުކަނޑާލާފައިވާކަން ވެސް އޭނާ ފާހަގަކުރެއްވިއެވެ.
ނަމަވެސް، ވޮޝިންޓަނާއި ތެހެރާނާ ދެމެދު އިބްތިދާއީ އެއްބަސްވުމަކަށް އާދެވުނު ނަމަވެސް، ދުނިޔޭގެ ތެލުގެ ސަޕްލައިގައި މުހިންމު ދައުރެއް އަދާކުރާ ހުރްމުޒް ކަނޑުއޮޅީގެ މައްސަލައާއި އީރާނުގެ ނިއުކްލިއާ ޕްރޮގްރާމް ފަދަ ނާޒުކު ކަންކަމުގައި އަދިވެސް ގޮތްތަކެއް ނިންމިފައެއް ނުވެއެވެ.
ސްވިޒަލޭންޑުގައި ކުރިއަށްދިޔަ މަތީ ފަންތީގެ މަޝްވަރާތަކަށްފަހު ބޭއްވި ފަންނީ ވާހަކަތައް މިހާރު ނިމިފައިވާ ކަމަށާއި، ނިއުކްލިއާ މައްސަލަތަކާއި ދަތިކުރުމުގެ ފިޔަވަޅުތަކާ ގުޅޭގޮތުން މަސައްކަތް ކުރާނެ ޚާއްޞަ ވޯކިން ގްރޫޕްތަކެއް އެކުލަވާލުމަށް ނިންމާފައިވާ ކަމަށް އީރާނުގެ ދައުލަތުގެ މީޑިއާއިން އަންގާރަ ދުވަހު ވަނީ ރިޕޯޓްކޮށްފައެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އެއްވެސް ޝަރުތަކާ ނުލައި ހުރްމުޒް ކަނޑުއޮޅި ކަނޑުދަތުރުފަތުރަށް ހުޅުވާލުމަށް ބާރުއަޅުއްވާފައެވެ. ނަމަވެސް އީރާނުން ވަނީ އަނެއްކާވެސް އެކަމަށް ވަރަށް ބޮޑަށް ދެކޮޅު ހަދާފައެވެ.
އީރާނުގެ ޗީފް ނެގޯޝިއޭޓަރު މުޙައްމަދު ބާގިރު ގާލިބާފްއާ ހަވާލާދީ އެ ގައުމުގެ ދައުލަތުގެ މީޑިއާއިން އަންގާރަ ދުވަހު ރިޕޯޓްކޮށްފައިވާ ގޮތުގައި، ހުރްމުޒް ކަނޑުއޮޅި ދެން ދުވަހަކުވެސް ހަނގުރާމައިގެ ކުރިން އޮތް ހާލަތަށް ނުދާނެއެވެ. އަދި ބައިނަލްއަގުވާމީ ގާނޫނުތަކާ އެއްގޮތްވާ ގޮތުގެ މަތިން އެ ސަރަހައްދު ބަލަހައްޓާނީ އިސްލާމިކް ރިޕަބްލިކް އޮފް އީރާނުން ކަމަށް އޭނާ ވިދާޅުވިއެވެ.
އެމެރިކާއާއި އީރާނާ ދެމެދު ވެވުނު އެއްބަސްވުމަކާ ގުޅިގެން މިދިޔަ ހަފުތާގައި ހުރްމުޒް ކަނޑުއޮޅި ހުޅުވާލި ނަމަވެސް، ލުބުނާނަށް އިސްރާއީލުން ދެމުންދާ ހަމަލާތަކާ ގުޅިގެން އެ ސަރަހައްދު އަލުން ބަންދުކޮށްފައިވާ ކަމަށް އީރާނުން މިދިޔަ ހޮނިހިރު ދުވަހު ވަނީ އިޢުލާންކޮށްފައެވެ.
