ހަނގުރާމައިގެ ކުރިން އޮތް ޙާލަތަށް ހޮރްމޫޒް ކަނޑު އޮޅި ދުވަހަކު ވެސް ނުދާނެ: އީރާންގެ ޤާނޫނު ހަދާ މަޖިލީހުގެ ރައީސް

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދިޔަ ހަނގުރާމައިގެ ސަބަބުން ދަތުރު ކުރުމަށް ދަތިވެފައިވާ ހޮރްމޫޒް ކަނޑު އޮޅި، ހަނގުރާމައިގެ ކުރިން އޮތް ޙާލަތަށް ދެން ދުވަހަކު ވެސް ނުދާނެ ކަމަށް އީރާންގެ ޤާނޫނު ހަދާ މަޖިލީހުގެ ރައީސް މުޙައްމަދު ބާގިރު ޣަލިބާފް ވިދާޅުވެއްޖެ އެވެ.

އީރާންގެ ފަރާތުން މަޝްވަރާ ތަކުގައި އިސްކޮށް ހުންނަވާ ޣަލިބާފް މިހެން ވިދާޅުވެފައި ވަނީ، އެމެރިކާ އާއެކު ސްވިޒަލެންޑުގައި ކުރިއަށް ގެންދިޔަ މަޝްވަރާ ތަކުގެ ބައްދަލުވުމަށް ފަހު އެނބުރި ޤައުމަށް ވަޑައިގެން ދެއްވި ބަޔާނެއްގައި އެވެ. 

ޣަލިބާފް ވިދާޅުވީ ސަރަހައްދީ މަސްރަހަށް އައިސްފައިވާ ބަދަލުތަކާ އެކު ހޮރްމޫޒް ކަނޑު އޮޅީގެ ސަލާމަތީ އަދި ސިޔާސީ މަސްރަހަށް ބޮޑެތި ބަދަލު ތަކެއް އައިސްފައިވާ ކަމަށެވެ. އަދި ހަނގުރާމައިގެ ކުރިން އެ ސަރަހައްދު އޮތް ހާލަތަށް ދެން އެނބުރި ނުދާނެ ކަމަށް އޭނާ ފާހަގަ ކުރެއްވި އެވެ. ނަމަވެސް، މި ބަދަލުތަކާއެކު ވެސް އީރާން އިން ބައިނަލްއަގުވާމީ ގާނޫނު ތަކަށް ފުރިހަމަ އަށް ބޯލަނބާނެ ކަމުގެ ޔަގީންކަން އޭނާ ވަނީ ދެއްވާފައި އެވެ.

މި މަޝްވަރާ ތަކަކީ މެދު އިރުމަތީގެ ނުތަނަވަސްކަން ކުޑަ ކުރުމަށާއި، ސަރަހައްދީ ރައްކާތެރިކަން ކަށަވަރު ކުރުމަށް އެމެރިކާ އާއި އީރާންއާ ދެމެދު ސުވިޒަލެންޑުގައި ކުރިއަށް ދިޔަ މުހިންމު ބައްދަލުވުން ތަކެކެވެ. މި ބައްދަލުވުން ތަކުގައި ހޮރްމޫޒް ކަނޑު އޮޅީގެ ސަލާމަތާ ގުޅޭ ގޮތުން ދެ ގައުމުގެ ދެމެދުގައި ފުޅާ ދާއިރާއެއްގައި ވާހަކަ ދެކެވުނު ކަމަށް ރިޕޯޓުތައް ބުނެ އެވެ.

ހޮރްމޫޒް ކަނޑު އޮޅި އަކީ ދުނިޔޭގައި އުފައްދާ ތެލުގެ ބޮޑު އިންސައްތައެއް ބޭރު ކުރާ އެންމެ މުހިންމު އެއް މަގަށް ވާއިރު، އެ ސަރަހައްދުގެ ހަމަޖެހުމަކީ ދުނިޔޭގެ އިގްތިސާދާ ސީދާ ގުޅިފައިވާ ކަމެކެވެ. އީރާން އިން މިފަދަ މޭރުމަކުން ވާހަކަ ދައްކާފައި މިވަނީ، ސަރަހައްދީ ހަނގުރާމައިގެ ސަބަބުން ކަނޑު ދަތުރު ފަތުރަށް ކުރިމަތި ވެފައިވާ ގޮންޖެހުންތަކާ ގުޅިގެން ބައިނަލްއަގުވާމީ މުޖުތަމައުގެ ކަންބޮޑުވުން އިންތިހާ އަށް ބޮޑު ވެފައިވާ ދަނޑިވަޅެއްގައި އެވެ.

އީރާންގެ ފަރާތުން މަޝްވަރާ ތަކުގައި އިސްކޮށް ހުންނަވާ ޣަލިބާފްގެ މި ވާހަކަ ތަކުން ދޭހަ ވަނީ، ކުރިއަށް އޮތް ތަނުގައި އެ ސަރަހައްދުގެ ސަލާމަތީ ކަންކަން ބެލެހެއްޓުމުގައި އީރާންގެ ދައުރު މިހާރަށް ވުރެ ވަރުގަދަ ވެގެންދާނެ ކަމެވެ. އެހެން ނަމަވެސް، ބައިނަލްއަގުވާމީ ގާނޫނު ތަކަށް އިހުތިރާމް ކުރާނެ ކަމަށް ބުނުމަކީ، ދުނިޔޭގެ ބާރު ތަކަށް އީރާން އިން ދިން ޔަގީން ކަމެއްގެ ގޮތުގައި މަސްރަހު ދިރާސާ ކުރާ ފަރާތް ތަކުން ދެކެ އެވެ.