ނިއުޒިލެންޑާ ދެކޮޅަށް ކުޅުނުއިރު، މިޞްރުގެ ސަޕޯޓަރުން އަޑު އުފުލީ ފަލަސްޠީނުގެ ޙައްގުގައި

ފީފާ ވޯލްޑް ކަޕްގައި މިޞްރުން ނިއުޒިލެންޑާ ދެކޮޅަށް ކުޅުނު މެޗުގައި، މިޞްރުގެ ސަޕޯޓަރުން ފަލަސްޠީނުގެ ޙައްގުގައި އަޑު އުފުލައިފި އެވެ. 

ކެނެޑާގެ ވެންކޫވާގެ ބީސީ ޕްލޭސް ސްޓޭޑިއަމްގައި ނިއުޒިލެންޑާ ދެކޮޅަށް ކުޅުނު މެޗު ފެށުމުގެ ކުރިން ވެސް، މިޞްރުގެ ސަޕޯޓަރުން ވަނީ ދަނޑު ބޭރުގައި އެއްވެ ތިބެ، ފަލަސްޠީނުގެ ހައްގުގައި އަޑު އުފުލައިފަ އެވެ. 

އެގޮތުން މިޞްރުގެ ސަޕޯޓަރުން ވަނީ ފަލަސްޠީނުގެ ދިދަ ހިފައިގެން ސްޓޭޑިއަމްގެ ބޭރުގައި ތިބެފަ އެވެ. އެއާ އެކު މިޞްރުގެ ސަޕޯޓަރުން ވަނީ ފަލަސްޠީނުގެ ޙައްގުގައި އަދި ފަލަސްޠީނަށް ތާއީދު ކުރުމުގެ ގޮތުން ތަފާތު ޝިއާރުތައް ހަރު އަޑުން ގޮވައިފަ އެވެ. 

އާންމު ގޮތެއްގައި ވޯލްޑް ކަޕްގެ މެޗު ތަކުގައި ޓީމު ތަކުގެ ސަޕޯޓަރުން އެއްވެ އަޑު އުފުލަނީ އެ ޤައުމަކަށް ތާއީދު ކުރުމުގެ ގޮތުންނެވެ. ނަމަވެސް، މިޞްރުގެ ސަޕޯޓަރުން ފަލަސްޠީނުގެ ޙައްގުގައި އަޑު އުފުލުމަކީ، މިޞްރާއި ފަލަސްޠީންއާ ދެމެދު އޮންނަ ގާތް ގުޅުން ރަމްޒު ކޮށްދޭ ކަމެއް ކަމަށް ބައެއް ފަރާތް ތަކުން ފާހަގަ ކުރެ އެވެ. 

ޚާއްސަކޮށް ފަލަސްޠީނުގެ މިނިވަން ދައުލަތެއް ޤާއިމު ކުރުމާއި، ޣައްޒާގައި ހިންގަމުން އަންނަ ޖަރީމާތައް ހުއްޓާލައި، އަދި ޣައްޒާގެ ރައްޔިތުން ޖެހިފައިވާ ބިކަ ޙާލުން ސަލާމަތް ކުރުމަށް ވެސް މިޞްރުގެ ސަޕޯޓަރުން ވަނީ ގޮވާލައިފަ އެެވެ.

ކެނެޑާ އަކީ މިފަހަރުގެ ވޯލްޑް ކަޕް ބާއްވާ ތިން ޤައުމުގެ ތެރެއިން އެއް ޤައުމެވެ. ކެނެޑާގެ އިތުރުން ދެން ވޯލްޑް ކަޕް ހޯސްޓު ކުރަނީ އެމެރިކާ އާއި މެކްސިކޯ އިންނެވެ.  ފުޓުބޯޅައިގެ ތެރެއިން ސިޔާސީ މެސެޖުތައް ދިނުމަކީ ފީފާ އިން މަނާ ކޮށްފައިވާ ކަމަކަށް ވީ ނަމަވެސް، އެކި ޤައުމު ތަކުގެ ސަޕޯޓަރުން މިކަހަލަ ކަންކަން ކުރާކަން ފާހަގަވެފައިވެ އެވެ.