ފަހަތުން އަރައި ކޭޕް ވާޑް އިން އުރުގުއޭއާ ވެސް އެއްވަރު ކޮށްފި
ކޭޕް ވާޑްގެ ފުރަތަމަ މެޗުގައި އެ ޓީމުން ވަނީ ވަރުގަދަ ސްޕެއިންއާ ވެސް އެއްވަރު ކޮށްފައި. ދެ މެޗުން ދެ ޕޮއިންޓާ އެކު ކޭޕް ވާޑް އޮތީ ގުރޫޕުގެ ތިން ވަނައިގައި. ދެ ވަނައިގައި އުރުގުއޭ އަށް ވެސް ދެ ޕޮއިންޓު ލިބޭއިރު، ލަނޑުގެ ގޮތުން ކުރި ހޯދަނީ އުރުގުއޭ.
މެޗުގައި ލަނޑު ޖެހުމަށް ފަހު ކޭޕް ވާޑްގެ ކުޅުންތެރިން އުފާ ފާޅު ކުރަނީ. | ރޮއިޓާސް
ފީފާ ވޯލްޑް ކަޕްގެ ގުރޫޕު އެޗްގައި އުރުގުއޭއާ ދެކޮޅަށް ކުޅުނު މެޗު ވެސް، ފަހަތުން އަރައި ކޭޕް ވާޑް އިން އެއްވަރު ކޮށްފި އެވެ.
ހޯމަ ދުވަހުގެ ފަތިހު ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ކޭޕް ވާޑް އިން ލަނޑު ޖަހައި ކުރި ހޯދާފައި ވަނިކޮށް، އުރުގުއޭ އިން ފަހަތުން އަރައި ދެ ލަނޑު ޖަހައިގެން ލީޑު ނެގި އެވެ. ނަމަވެސް ކޭޕް ވާޑް އިން ނަތީޖާ ހަމަހަމަ ކުރި އެވެ.
މެޗުގެ ފުރަތަމަ ހާފުގެ 21 ވަނަ މިނެޓުގައި ކޭޕް ވާޑް އަށް ލީޑު ނަގައިދިނީ ކެވިން ޕީނާ އެވެ. ނަމަވެސް، ފުރަތަމަ ހާފުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް ރޮނާލްޑް އަރައުހޯ ވަނީ އުރުގުއޭ އަށް ނަތީޖާ ހަމަހަމަ ކޮށްދީފައި އެވެ. އަދި އިތުރު ވަގުތުގައި އޮގަސްޓިން ކަނޯބިއޯ ވަނީ އުރުގުއޭގެ ދެ ވަނަ ލަނޑު ޖަހައި ލީޑު ނަގައިފަ އެވެ.
މެޗުގެ ދެ ވަނަ ހާފު ފަށައިގެން ކޭޕް ވާޑް އިން ނަތީޖާ ހަމަހަމަ ކުރުމަށް މަސައްކަތް ކުރަމުން ދިޔައިރު، އެ ޓީމުން ވަނީ 61 ވަނަ މިނެޓުގައި ނަތީޖާ ހަމަހަމަ ކޮށްފައި އެވެ. އެ ލަނޑު ކޭޕް ވާޑް އަށް ޖަހައިދިނީ ހެލިއޯ ވަރޭލާ އެވެ.
ކޭޕް ވާޑްގެ ފުރަތަމަ މެޗުގައި އެ ޓީމުން ވަނީ ވަރުގަދަ ސްޕެއިންއާ ވެސް އެއްވަރު ކޮށްފައި އެވެ. ދެ މެޗުން ދެ ޕޮއިންޓާ އެކު ކޭޕް ވާޑް އޮތީ ގުރޫޕުގެ ތިން ވަނައިގަ އެވެ. ދެ ވަނައިގައި އުރުގުއޭ އަށް ވެސް ދެ ޕޮއިންޓު ލިބޭއިރު، ލަނޑުގެ ގޮތުން ކުރި ހޯދަނީ އުރުގުއޭ އެވެ. ކޭޕް ވާޑްގެ ފަހު މެޗުގައި ކުޅޭނީ ސައުދީ އަރަބިއްޔާއާ ދެކޮޅަށެވެ.
