އީރާން އިން ބެލްޖިއަމްއާ އެއްވަރު ކޮށްފި
މުބާރާތުގައި އީރާންގެ ފުރަތަމަ މެޗުގައި އެ ޓީމުން ވަނީ ނިއުޒިލެންޑާ އެއްވަރު ކޮށްފައި. ދެ ވަނަ މެޗުގައި ބެލްޖިއަމްއާ އެއްވަރުކޮށް، ދެ ޕޮއިންޓާ އެކު އީރާން އޮތީ ދެ ވަނައިގައި.
މުބާރާތުގައި ބެލްޖިއަމް އާއި އީރާން ބައްދަލު ކުރި މެޗުގެ ތެރެއިން. | ރޮއިޓާސް
މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު ޖީގައި ބެލްޖިއަމްއާ ދެކޮޅަށް ކުޅުނު މެޗު ވެސް އީރާން އިން އެއްވަރު ކޮށްފި އެވެ.
އާދީއްތަ ދުވަހުގެ ރޭ ދަންވަރު ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. މެޗުގައި ދެ ޓީމަށް ވެސް ވަނީ ލަނޑު ޖަހަން ރަނގަޅު ފުރުސަތު ތަކެއް ލިބިފައި އެވެ.
މެޗުގެ ފުރަތަމަ ހާފުގެ 25 ވަނަ މިނެޓުގައި އީރާން އިން ބެލްޖިއަމް ކޮޅަށް ލަނޑެއް ވެސް ޖެހި އެވެ. އެގޮތުން އީރާންގެ ކެޕްޓަން މަހުދީ ތަރޭމީ ޖެހި ލަނޑު، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ.
މެޗުގައި ބެލްޖިއަމް އިން ވެސް ވަނީ ލަނޑު ޖަހަން ގިނަ ފުރުސަތު ތަކެއް ހޯދައިފަ އެވެ. އެގޮތުން ބެލްޖިއަމްގެ ރޮމެލޫ ލުކާކޫ އާއި ކެވިން ޑި ބްރޭނާ އަށް ވެސް ވަނީ ލަނޑު ޖަހަން ފުރުސަތު ލިބިފައި އެވެ. މެޗުގައި ބެލްޖިއަމްގެ ގިނަ ހަމަލާ ތަކެއް އީރާންގެ ގޯލު ކީޕަރު ވަނީ މަތަ ކޮށްފަ އެވެ. މެޗުގެ ދެ ވަނަ ހާފުގައި ބެލްޖިއަމްގެ ނެތަން އެންގޯއި އަށް ސީދާ ރަތް ކާޑު ދެއްކުމުން، ބާކީ ބައި އެ ޓީމުން ކުޅެން ޖެހުނީ އެއް ކުޅުންތެރިޔަކު މަދުކޮށެވެ.
މުބާރާތުގައި އީރާންގެ ފުރަތަމަ މެޗުގައި އެ ޓީމުން ވަނީ ނިއުޒިލެންޑާ އެއްވަރު ކޮށްފަ އެވެ. ދެ ވަނަ މެޗުގައި ބެލްޖިއަމްއާ އެއްވަރުކޮށް، ދެ ޕޮއިންޓާ އެކު އީރާން އޮތީ ދެ ވަނައިގަ އެވެ. ބެލްޖިއަމްގެ ފުރަތަމަ މެޗުގައި މިޞްރާ ދެކޮޅަށް ކުޅެ އެއްވަރުވީއިރު، ދެ ޕޮއިންޓާ އެކު އެ ޓީމު އޮތީ ތިން ވަނައިގަ އެވެ.
