އެމެރިކާ އާއި އީރާންގެ މަޝްވަރާ ތަކުގައި ފާހަގަ ކުރެވުނު މުހިންމު ނުކުތާތައް ހާމަ ކޮށްފި

އެމެރިކާ އާއި އީރާންއާ ދެމެދު ކުރިއަށް ގެންދިޔަ މަޝްވަރާ ތަކުގެ މުހިންމު ނުކުތާތައް ހާމަ ކޮށްފި އެވެ. 

އާދީއްތަ ދުވަހު ކުރިއަށް ގެންދިޔަ މަޝްވަރާތަކާ ގުޅޭ ގޮތުން އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެފައި ވަނީ، މަޝްވަރާ ތަކުގައި ބޮޑެތި ކުރިއެރުން ތަކެއް ލިބިފައިވާ ކަމަށެވެ. އަދި މަޝްވަރާ ތަކަށް ފަހު، ޓެކްނިކަލް ޓީމު ތަކުގެ މަޝްވަރާތައް މި ހަފުތާގައި ކުރިއަށް ދާނެ ކަމަށް ވެސް ވަނީ ހާމަ ކޮށްފައި އެވެ. 

މަޝްވަރާތަކަށް ފަހު ޤަތަރާއި ޕާކިސްތާން އިން ނެރުނު ގުޅިފައިވާ ބަޔާނުގައި ބުނެފައި ވަނީ، ކުރިއަށް އޮތް 60 ދުވަހުގެ ތެރޭގައި ދާއިމީ އެއްބަސްވުމަކަށް އައުމަށްޓަކައި ބޭނުންވާ "ރޯޑްމެޕް" އަކަށް ދެ ގައުމުން މިހާރު އެއްބަސްވެފައިވާ ކަމަށެވެ. މި މަޝްވަރާތައް ބެލެހެއްޓުމަށް އެމެރިކާ އާއި އީރާން އިން އުފައްދާފައިވާ ހައި ލެވެލް ކޮމިޓީ އިން ވަނީ، ފަންނީ މަޝްވަރާތައް ވަގުތުން ފެށުމަށް ބޭނުންވާ ބިންގާ އަޅާފައި އެވެ.

މި ބައްދަލުވުމުގައި ނިންމި އެންމެ މުހިންމު އެއް ނިންމުމަކީ، ލުބުނާންގައި ހިނގަމުންދާ އަސްކަރީ ހަރަކާތްތައް ހުއްޓާލާފައިވާކަން ކަށަވަރު ކުރުމަށްޓަކައި "ޑީ-ކޮންފްލިކްޝަން ސެލް" އެއް އުފެއްދުމެވެ. މިއީ އެމެރިކާ އާއި އީރާން އަދި ލުބުނާން ސަރުކާރު ހިމެނޭ ގޮތަށް، މެދުވެރިންގެ އެހީތެރިކަމާ އެކު ހިންގާނެ ނިޒާމެކެވެ. މިއަހަރުގެ މާރިޗު މަހު އީރާންގެ ރޫހީ ލީޑަރު އަވަހާރަކޮށްލުމާ ގުޅިގެން ހިޒްބުﷲ އިން އިޒްރޭލް އަށް ހަމަލާ ދޭން ފެށުމާ އެކު ލުބުނާން ވަނީ މި ހަނގުރާމައިގެ ތެރެއަށް ވަދެފަ އެވެ. މި ސެލް އަކީ ސުލްހައިގެ އެއްބަސްވުމަށް އޮތް އެންމެ ބޮޑު އިމްތިހާނު ކަމަށް އަރާގްޗީ ވަނީ ސިފަ ކުރައްވައިފަ އެވެ. 

މީގެ އިތުރުން، ހޮރްމޫޒް ކަނޑު އޮޅިން ދަތުރުކުރާ މުދާ އުފުލާ އުޅަނދު ފަހަރަށް ރައްކާތެރިކަން ކަށަވަރު ކުރުމަށާއި، ދިމާވެދާނެ ހާދިސާ ތަކުން ސަލާމަތްވުމަށްޓަކައި ދެ ގައުމުގެ ދެމެދުގައި ސީދާ މުއާސަލާތީ ލައިނެއް ގާއިމު ކުރުމަށް ވެސް ވަނީ އެއްބަސްވެފަ އެވެ. މިއީ 60 ދުވަހުގެ މުއްދަތަށް އެކުލަވާލި އެއްބަސްވުމެއްގެ ދަށުން ނިންމި ނިންމުމެކެވެ. އިޒްރޭލް އިން ލުބުނާން އަށް ދެމުންދާ ހަމަލާތަކާ ގުޅިގެން ހޮރްމޫޒް ކަނޑު އޮޅި ބަންދު ކުރާނެ ކަމުގެ އިންޒާރު އީރާން އިން މިދިޔަ ހޮނިހިރު ދުވަހު ދީފައި ވާތީ، މި ނިންމުމަކީ ބައިނަލްއަގުވާމީ ވިޔަފާރި އަށް ލިބުނު މުހިންމު ކުރިއެރުމެކެވެ. 

އީރާންގެ ފޮރިން މިނިސްޓަރު އަރާގްޗީ ވިދާޅުވި ގޮތުގައި، މި މަޝްވަރާ ތަކުގެ ނަތީޖާއެއްގެ ގޮތުން އީރާންގެ ތެލާއި ޕެޓްރޯކެމިކަލް އެކްސްޕޯޓަށް އޮތް ހުރަސްތައް ނައްތާލައި، ހިފަހައްޓާފައިވާ ބައެއް ފައިސާތައް ވަނީ ދޫކޮށްލާފަ އެވެ. ނަމަވެސް ޕާކިސްތާން އާއި ގަތަރުގެ ބަޔާނުގައި ފައިސާ ދޫކުރިކަމުގެ ވާހަކަ ސީދާ ބުނެފައި ނުވެ އެވެ. އެހެން ނަމަވެސް، އެމެރިކާ އިން އީރާންއާ ދެކޮޅަށް އަޅާފައިވާ ހުރިހާ ދަތި ކުރުމުގެ ފިޔަވަޅުތަކެއް އުވާލުމަށާއި، ހިފަހައްޓާފައިވާ މުދަލާއި ފައިސާ ބޭނުން ކުރެވޭނެ ގޮތް ހެދުމަށް އެއްބަސްވުމުގައި ހިމަނާފައިވެ އެވެ. މިކަމާ ގުޅޭ ގޮތުން އެމެރިކާގެ ރިޔާސީ ގަނޑުވަރު، ވައިޓް ހައުސް އިން ރަސްމީކޮށް އެއްޗެއް ބުނެފައި ނުވެ އެވެ.

މި މުހިންމު މަޝްވަރާތައް ކާމިޔާބުކަމާ އެކު ކުރިއަށް ގެންދިއުމުގައި ޕާކިސްތާން އާއި ޤަތަރުން އަދާކުރި ދައުރަށް ބައިނަލްއަގުވާމީ މުޖުތަމައުގެ ތައުރީފު ވަނީ ލިބިފަ އެވެ. އީރާންގެ ފޮރިން މިނިސްޓަރު އަރާގްޗީ ވެސް ވަނީ އެ ދެ ގައުމުން ކުރި ބުރަ މަސައްކަތަށް ޝުކުރު އަދާ ކުރައްވާފަ އެވެ.

މެދުވެރިންގެ ގޮތުގައި ހަރަކާތްތެރިވާ ދެ ގައުމުން ބުނީ، ދާއިމީ ސުލްހައިގެ އެއްބަސްވުމަކަށް ދިއުމަށްޓަކައި ބިނާ ކުރަނިވި މާހައުލެއްގައި މަޝްވަރާތައް ކުރިއަށް ގެންދިއުމަށް ކުރެވެން ހުރި ހުރިހާ މަސައްކަތެއް ކުރަމުން ދާނެ ކަމަށެވެ.