އިކުއެޑޯ ގައި އެމެރިކާގެ އަސްކަރީ އޮޕަރޭޝަނެއް ފަށައިފި

އިކުއެޑޯގައި ހަރަކާތްތެރިވާ "ޓެރަރިސްޓުންނާ" ދެކޮޅަށް މަސައްކަތް ކުރުމަށް އެ ގައުމުގެ ސަރުކާރާ ގުޅިގެން އެމެރިކާގެ އަސްކަރީ އޮޕަރޭޝަނެއް ފަށާފައިވާކަން އެމެރިކާ ސަރުކާރުން އިއުލާނުކޮށްފިއެވެ.

މެދުތެރޭ އަދި ދެކުނު އެމެރިކާގެ އަސްކަރީ ކަންކަން ބަލަހައްޓާ އެމެރިކާގެ ސަަދަން ކޮމާންޑުން ބުދަ ދުވަހު ހާމަކުރި ގޮތުގައި، އިކުއެޑޯއާ ގުޅިގެން ހިންގާ މި އޮޕަރޭޝަންތައް މިހާރު ވަނީ ފަށާފައެވެ. ޖެނެރަލް ފްރާންސިސް ޑޮނޮވަން ވިދާޅުވި ގޮތުގައި، މާރިޗު މަހުގެ 3 ވަނަ ދުވަހުން ފެށިގެން އިކުއެޑޯ އާއި އެމެރިކާގެ އަސްކަރީ ބާރުތަކުން ދަނީ އެ ގައުމުގައި ކަނޑައަޅާފައިވާ ޓެރަރިސްޓް ޖަމާއަތްތަކާ ދެކޮޅަށް އޮޕަރޭޝަންތައް ހިންގަމުންނެވެ.

މި އޮޕަރޭޝަންތަކަކީ ލެޓިން އެމެރިކާ އާއި ކެރީބިއަން ސަރަހައްދުގެ ގައުމުތަކުން މަސްތުވާތަކެތީގެ ޓެރަރިޒަމް ނައްތާލުމަށް ކުރާ މަސައްކަތުގެ ވަރުގަދަ މިސާލެއް ކަމަށް ވެސް އޭނާ ވިދާޅުވިއެވެ.

މި އިއުލާނާއެކު އާންމުކުރި ވީޑިއޯތަކުން އަސްކަރީ ހެލިކޮޕްޓަރުތައް އުދުއްސާލާ މަންޒަރާއި، ބިމުގައި ތިބި ބަޔަކު ހެލިކޮޕްޓަރުތަކަށް އަރާ މަންޒަރު ފެންނަ ކަޅާއި ހުދުގެ އޭރިއަލް ސަވައިލަންސް ފޮޓޯތައް ފެންނަން ހުއްޓެވެ.

މި އޮޕަރޭޝަނަކީ ލެޓިން އެމެރިކާގައި ހަރަކާތްތެރިވާ ކުށްކުރާ ނެޓްވޯކްތަކާއި މަސްތުވާތަކެތީގެ ކާޓެލްތަކާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ހަރުކަށި ސިޔާސަތުގެ ބައެއް ކަމަށް ބެލެވެއެވެ.

އިކުއެޑޯގައި ހިންގާ މި އޮޕަރޭޝަންގެ ފުޅާ މިނެއް އަދި ސާފެއް ނުވެއެވެ. ނަމަވެސް، އެމެރިކާގެ ބައެއް މީޑިއާތަކުން ސަރުކާރުގެ މަސްދަރުތަކާ ހަވާލާދީ ރިޕޯޓްކޮށްފައިވާ ގޮތުގައި، މިހާތަނަށް މި އޮޕަރޭޝަން ބިނާވެފައިވަނީ ލޮޖިސްޓިކްސް އާއި އިންޓެލިޖެންސްގެ އެހީތެރިކަން އިކުއެޑޯގެ ސިފައިންނަށް ފޯރުކޮށްދިނުމުގެ މައްޗަށެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި، ވައިޓް ހައުސްގެ ޕްރެސް ސެކްރެޓަރީ ކެރޮލީން ލީވިޓް ވަނީ މި ގުޅިފައިވާ އޮޕަރޭޝަނަށް ތައުރީފު ކުރައްވާފައެވެ.

އޭނާ ނޫސްވެރިންނަށް މައުލޫމާތު ދެއްވަމުން ވިދާޅުވީ، މި ސަރަހައްދުގެ ރައްޔިތުންނަށް ބިރުވެރިކަމާއި، އަނިޔާވެރިކަމާއި، ކޮރަޕްޝަން ކުރިމަތިކުރުވަމުންދާ މަސްތުވާތަކެތީގެ ޓެރަރިސްޓުންނާ ދެކޮޅަށް ދެ ގައުމު ގުޅިގެން ވަރުގަދަ ފިޔަވަޅުތަކެއް އަޅަމުންދާ ކަމަށެވެ.

ކާޓެލްތަކާ ދެކޮޅަށް ހިންގާ އަސްކަރީ ކެމްޕޭން

ވޭތުވެދިޔަ އަހަރު ދެވަނަ ދައުރަކަށް ވެރިކަމާ ހަވާލުވެވަޑައިގަތުމަށްފަހު، ޓްރަމްޕް ވަނީ މަސްތުވާތަކެތި ވިއްކާ ބޮޑެތި ގްރޫޕްތަކަކީ "ބޭރުގެ ޓެރަރިސްޓް ޖަމާއަތްތައް" ކަމަށް ކަނޑައަޅުއްވާފައެވެ. މިއީ އާންމުކޮށް ސިޔާސީ މަގްސަދުތަކެއް އޮންނަ ހަތިޔާރު އެޅި ޖަމާއަތްތަކަށް ބޭނުންކުރާ ނަމެކެވެ.

ޓްރަމްޕްގެ ސަރުކާރުން ވަނީ މަސްތުވާތަކެތީގެ ވިޔަފާރި ހުއްޓުވުމަށް އަސްކަރީ ބާރުގެ ބޭނުންކުރުން އިތުރުކޮށްފައެވެ. މީގެ ތެރޭގައި މަސްތުވާތަކެތި އުފުލާ ކަމަށް ޝައްކުކުރެވޭ އުޅަނދުތަކަށް ބޮން އެޅުން ވެސް ހިމެނެއެވެ.

ނަމަވެސް، ފާޑުކިޔާ ފަރާތްތަކުން ފާހަގަކުރާ ގޮތުގައި ބައިނަލްއަގުވާމީ ގާނޫނުތަކުގެ ދަށުން މަސްތުވާތަކެތީގެ ވިޔަފާރިއަކީ ކުށެކެވެ. އެއީ ހަނގުރާމައިގެ އަމަލެއް ނޫނެވެ. އެހެންކަމުން، މިފަދަ ހަމަލާތަކަކީ ޝަރީއަތަކާ ނުލައި މީހުން މެރުން ނުވަތަ "އެކްސްޓްރާޖުޑީޝަލް ކިލިންގްސް" ގެ ގޮތުގައި ބެލެވިދާނެއެވެ.

ކެރީބިއަން ކަނޑާއި އިރުމަތީ ޕެސިފިކް ކަނޑުގައި މަސްތުވާތަކެތި އުފުލާ ކަމަށް ތުހުމަތުކުރެވޭ ބޯޓުފަހަރަށާއި އެހެނިހެން އުޅަނދުތަކަށް އަމާޒުކޮށް މިހާތަނަށް މަދުވެގެން 44 ވައިގެ ހަމަލާ ވަނީ ދީފައެވެ.

މި ހަމަލާތަކުގައި މިހާތަނަށް 150 މީހުން މަރުވެފައިވާކަން އެނގެން އޮތް ނަމަވެސް، އެމެރިކާގެ އޮފިޝަލުން އަދި އެ މީހުންގެ ވަކިވަކި މައުލޫމާތެއް ކަށަވަރުކޮށްދީފައެއް ނުވެއެވެ. އަދި އެ މީހުންގެ މައްޗަށް ކުރެވޭ އެއްވެސް ދައުވާއެއް ވެސް އާންމުކޮށްފައެއް ނުވެއެވެ.

އޮކްޓޯބަރު މަހު ސަބްމެރިންއަކަށް ދިން ހަމަލާއަކުން ސަލާމަތްވި ދެ މީހަކު ވަނީ ވަގުތުން އެ މީހުންގެ ގައުމުތައް ކަމަށްވާ އިކުއެޑޯ އަދި ކޮލަމްބިއާއަށް ފޮނުވާލާފައެވެ. އެ ގައުމުތަކަށް ދިއުމުން އެ މީހުން ވަނީ މިނިވަންކޮށްފައެވެ.

މި ހަމަލާތަކުގައި މަރުވި ބައެއް މީހުންގެ އާއިލާތަކުން ބުނާ ގޮތުގައި، އެ މީހުންނަކީ މަސްތުވާތަކެތީގެ ވިޔަފާރިވެރިންނެއް ނޫނެވެ. އެއީ ވެނެޒުއޭލާ އާއި ކައިރި ރަށްތަކާ ދެމެދު ދަތުރުކުރި މަސްވެރިންނާއި އާންމު މަސައްކަތްތެރިން ކަމަށް ކޮލަމްބިއާ އަދި ޓްރިނިޑާޑް އެންޑް ޓޮބޭގޯގެ އާއިލާތަކުން ބުނެއެވެ.

ޓްރަމްޕްގެ ސަރުކާރުން ވަނީ ވެނެޒުއޭލާގެ ބިމަށް ވެސް އަސްކަރީ ހަމަލާތަކެއް ދީފައެވެ. އެއީ މިދިޔަ ޑިސެމްބަރު މަހުގެ ފަހުކޮޅާއި ޖެނުއަރީ 3 ގައެވެ. މި ދެ ފަހަރު ވެސް އެމެރިކާއިން ބުނީ އެއީ މަސްތުވާތަކެތީގެ ވިޔަފާރި ހުއްޓުވުމަށް ގާނޫނު ތަންފީޒުކުރުމުގެ ގޮތުން ދިން ހަމަލާތަކެއް ކަމަށެވެ.

ފުރަތަމަ ހަމަލާ އަމާޒުކުރީ "ޓްރެން ޑި އަރަގުއާ" ނަމަކަށް ކިޔާ ބައިނަލްއަގުވާމީ ގޭންގަކުން ބޭނުންކުރާ ކަމަށް ބުނާ ބަނދަރަކަށެވެ. ދެވަނަ އޮޕަރޭޝަންގައި ވެނެޒުއޭލާގެ ރައީސް ނިކޮލަސް މަޑޫރޯ ވަނީ ވަގަށް ނަގައި، އެމެރިކާގެ ފެޑަރަލް ކޯޓެއްގައި މަސްތުވާތަކެތީގެ ވިޔަފާރި އާއި ހަތިޔާރުގެ ދައުވާ އުފުލައި ޖަލަށްލާފައެވެ.

އެ އޮޕަރޭޝަނަކީ ބައިނަލްއަގުވާމީ ގާނޫނުތަކާ ޚިލާފު އަމަލެއްގެ ގޮތުގައި ކުށްވެރިކޮށްފައިވާއިރު، އދ. ގެ މާހިރުން އިންޒާރު ދެއްވާފައިވަނީ މިއީ އެއްވެސް އުދުވާނަކާ ނުލައި އެމެރިކާއިން ހިންގާ އަސްކަރީ ހަމަލާތަކުގެ ނުރައްކާތެރި ސިލްސިލާއެއްގެ ބައެއް ކަމަށެވެ.

ޓްރަމްޕްގެ މަސްތުވާތަކެއްޗާ ދެކޮޅު ކެމްޕޭންގެ އާ މައިދާނެއް

ޓްރަމްޕްގެ ސަރުކާރުން ވަނީ މަސްތުވާތަކެތީގެ ވިޔަފާރިކުރާ ކަމަށް ޝައްކުކުރެވޭ ފަރާތްތަކާ ދެކޮޅަށް ހިންގާ އަސްކަރީ އޮޕަރޭޝަންތައް އެއްގަމުގެ އަމާޒުތަކަށް ވެސް ފުޅާކުރަން ރާވާފައިވާކަމުގެ އިޝާރާތެއް ދީފައެވެ. އިކުއެޑޯއިން ހާމަ ކުރި މި މައުލޫމާތުން އެތަނަކީ އެމެރިކާގެ އަސްކަރީ ހަމަލާތަކުގެ އާ މައިދާނެއް ކަމަށް ބެލެވެއެވެ.

މީގެ ކުރިން އިކުއެޑޯއަކީ އެ ސަރަހައްދުގައި ކުށްކުރުން އެންމެ މަދު ގައުމުތަކުގެ ތެރޭގައި ހިމެނޭ، ލެޓިން އެމެރިކާގެ "އަމާންކަމުގެ ޖަޒީރާ" އެއްގެ ގޮތުގައި މަޝްހޫރުވެފައި އޮތް ގައުމެކެވެ.